İstanbulun tarixi və məşhur İstiqlal prospekti noyabrın 13-də baş verən bomba hücumundan sonra hələ də bərpa olunmaqdadır.

Şəhərin məşhur piyadalar yolu olan tarixi İstiqlal prospektində baş verən partlayış nəticəsində 6 nəfər ölüb, 50-dən çox insan yaralanıb. Yerli sakinlər bomba hücumunun həyata keçirildiyi yerə baş çəkir, İstanbuldakı bəzi diplomatik nümayəndəliklər əklillər göndərir.

İstanbulun bəzi sakinləri hücumdan sonra insanların sıx olduğu yerlərə getməkdən qorxduqlarını deyir. Digərləri isə terrora boyun əyməyəcəklərini deyərək, hələ də küçəyə çıxır.

Partlayışdan əvvəl şübhəlilərdən birinin skamyada 40 dəqiqədən çox oturduğunu görən Türkiyə polisi küçədəki skamyaları söküb çıxarıb. İstanbul sakini Əli Kır: "Hakimiyyət skamyaları sökməməli idi. Qorxmuruq. Qorxmayacağıq".

İstanbul sakini Mərt Karan: "Əlbəttə narahatıq, amma baş verənlərdən az sonra buranı görmək üçün uşaqlarımızla gəlmək istədik. Başqa seçimimiz yoxdur, həyat davam edir".

Türkiyə hökuməti hücumda Kürdüstan Fəhlə Partiyasını (PKK) və onun Suriyada qolu olan Demokratik Birlik Partiyasını günahlandırsa da, qruplaşma hücumda əli olduğunu inkar edir.

Bu arada, küçədə yerləşən mağazaların sahibləri bizneslərinə dəyən ziyanı aradan qaldırır. Sahibkar Mehmet Kelle: "Şüşə bu gün gələcək. Təmizləyənlər gəlib təmizləyəcək Bu gün mənəvi olaraq daha yaxşı olmaları üçün əməkdaşlarımıza bir gün istirahət verdik. İnşallah sabahdan işə başlayacağıq".

İstanbulda 2016-cı ildə Yeni İl gecəsi populyar "Reina" gecə klubuna edilən hücum da daxil olmaqla, sonuncu dəfə 2015-2017-ci illərdə bir sıra bomba hücumları həyata keçirilib.

Sakinlər son hücumun İstanbulda turizmə təsir edəcəyindən narahatdır. Turizm sahəsində işləyən Hikmet Köksal: "Mən bu partlayışdan sonra bizi çətin günlərin gözlədiyindən narahatam."

İstanbul meri Əkrəm İmamoğlu sağ qalanlar və sakinlərlə görüşmək üçün İstiqlal prospektinə gedib. "Bu gün 100-ə yaxın insanla salamlaşdım, onların 50-si müxtəlif ölkələrdən olan əcnəbilər idi. Kədərlərini ifadə etdilər və İstanbulu nə qədər sevdiklərini, nə qədər həzz aldıqlarını dedilər" deyə, o bildirib.

Bazar günü Türkiyə Suriyanın şimalında və İraqda İstanbulda partlayışa görə məsuliyyət daşıdığına inandığı kürd qruplaşmalarına qarşı hava hücumları həyata keçirib.

Bazar ertəsi Suriyanın şimalından atılan raket hücumları nəticəsində Türkiyənin sərhəd bölgəsində Karkamışda 2 nəfər ölüb, bir neçə nəfər yaralanıb.

Gundemxeber.az