ABŞ Dövlət katibi Antoni Blinken bildirib ki, Türkiyə və Macarıstanın ratifikasiyanı gecikdirməsinə baxmayaraq, Finlandiya və İsveçin NATO-ya qəbulu tezliklə təsdiqlənəcək.

Finlandiyalı və isveçli həmkarları ilə görüşdən sonra Blinken bildirib ki, hər iki ölkə alyansa qoşulmaq niyyətində səmimiyyət nümayiş etdirib və NATO-nun Ukraynaya Rusiyanın işğalına qarşı müqavimət göstərməsinə yardım səylərinə qoşulub.

NATO-nun 30 üzvünün demək olar ki, hamısı Rusiya Ukraynada müharibəyə başladıqdan sonra Finlandiya və İsveçin alyansa qoşulmaq təkliflərini artıq təsdiqləyib.

Türkiyə və Macarıstan yeganə ölkələrdir ki, Finlandiya və İsveçin müraciətini hələ ratifikasiya etməyiblər.

“Hər iki ölkə öz öhdəliklərini yerinə yetirmək üçün mühüm, konkret addımlar, o cümlədən müttəfiqimiz Türkiyənin təhlükəsizlik problemləri ilə bağlı addımlar atıb. Qəbul prosesi davam etdiyi bir zaman, ABŞ Finlandiya və İsveçin qəbulunu güclü şəkildə dəstəkləyir” – deyə, Blinken qeyd edib.

Eyni zamanda, Blinken Türkiyənin narahatlığının, xüsusən də İsveçin Ankaranın təhlükə olaraq gördüyü kürd qruplarına keçmiş dəstəyi ilə bağlı narahatlığının yaxın gələcəkdə aradan qaldırılacağını təxmin edir.

Bu həftə İsveç qadağan olunmuş PKK üzvü olan məhkumu Türkiyəyə ekstradisiya edib. Macarıstan parlamentinin gələn ilin əvvəlində NATO-nun genişlənməsi ilə bağlı səsvermə keçirəcəyi gözlənilir.

“Mən əminəm ki, NATO tezliklə Finlandiya və İsveçi rəsmi olaraq üzv kimi qəbul edəcək” – deyə, Blinken Dövlət Departamentində İsveçin Xarici İşlər naziri Tobias Bilström və finlandiyalı həmkarı Pekka Haavisto ilə birgə mətbuat konfransında bildirib.

Blinken fürsətdən istifadə edərək bəyan edib ki, Rusiya prezidenti Vladimir Putin Ukrayna ilə müharibə etmək qərarı ilə həqiqətən NATO-nun genişlənməsinə qarşı mübarizə aparmağa ümid edirdisə, bu, əks nəticə verib.

“İsveç və Finlandiya NATO-ya daxil olmağa hazırlaşarkən, biz bilirik ki, o, bizim ittifaqımızı zəiflədə bilməyib. Əslində o, yalnız NATO-nun güclənməsinə və genişlənməsinə nail oldu” – deyə, Blinken əlavə edib.

Haavisto deyib ki, Ankara ilə PKK ilə bağlı müzakirələr hələlik yaxşı gedir, baxmayaraq ki, Türkiyə parlamentinin NATO-nun genişlənməsi məsələsini nəzərdən keçirəcəyi tarix hələ müəyyən edilməyib.

“Əlbəttə, ümid edirik ki, Türkiyə bu qərarı gecikdirməyəcək” – deyə, Haavisto qeyd edib.

Bilström məsələ ilə bağlı danışıqları davam etdirmək üçün tezliklə Türkiyəyə gedəcəyini açıqlayıb.

“Ümid edirəm ki, bu müzakirə nəticəsində biz də irəli gedə biləcəyik” – deyə, o bildirib.

Gundemxeber.az