Yayılan xəbərlərdə qeyd olunur ki, bu gündən Xankəndində yaşayan ermənilər ərzaq məhsullarını talonla alacaqlar.

GündəmXeber.Az-ın sosial şəbəkələr üzərindən apardığı araşdırmalardan məlum olub ki, bu barədə dünən qondarma qurumun "dövlət naziri" Ruben Vardanyan özünün Facebook səhifəsində həyacanlı məlumat ında qeyd edib.

O bildirib ki, "son 1 ayda Xankəndi və digər ermənilərin yaşadığı ərazilərdə ərzaq qıtlığı yaranıb. Ona görə də yerli qurumlar sərt tədbirlər həyata keçirmək zorunda qalıb."

Vardanyanın şou qurmasından aydın olur ki, bu addımı rəsmi İrəvanla və xaricdəki maraqlı qüvvələrlə razılaşdırılıb.

Əslində Vardanyan məlum müraciətində bəzi erməniləri iqtisadi sabotajda ittiham edib. Beləki, o bildirib ki, bəzi imkanlı erməni benzini evlərində gizlədərək ancaq öz yaxınlarının istifadəsinə verirlər, bir çox mağaza sahibi isə malları məqsədli şəkildə gizlədir və sair.

Vardanyan öz yerini möhkəmlətmək məqsədi ilə "Qarabağ klanı"nı neytrallaşdırmaq istəyir. 3 gün öncə "Qarabağ klanı"nın ən son liderlərindən biri olan Balasanyan vəzifəsini itirdi. Lakin, onun ermənilər arasında kifayət qədər təsir imkanları var. Vardanyan son addımı ilə Balasanyan kimiləri "iqtisadi sabotajçı" kimi "ifşa" etmək istəyir. Bu hesaba da separatçıların vahid lideri olmağa nail olmaq istəyir.

Çünki, erməni baş nazir də "Qarabağ klanı"ndan qurtulmaq istəyir. Təsadüfi deyil ki, Yeni ilin ilk günündə erməni mətbuatı belə bir məlumat yaydı ki, Vardanyan Paşinyana 150 milyon dollar ianə edib. Ona görə də Paşinyanla Vardanyan arasında razılıq əldə etdikləri şübhə yaratmır.

Bütün bunlarsa onu göstərir ki, Vardanyanın həm dünənki videomüraciəti, həm də bu günkü talon qərarının konkret hədəfləri var. Bunun birinci hədəfi Azərbaycana qarşı yeni qarayaxma kampaniyasıdırsa, ikinci məqsədi "Qarabağ klanı"nın sonunu gətirməkdir.

GündəmXeber.Az