“Biz ötən ilin yazından Türkiyə Prezident Administrasiyası ilə yaxın təmasdayıq. Son günlər ünsiyyət daha da yaxınlaşıb”.

Gundemxeber.az xəbər verir ki, bu barədə Finlandiya Prezident Ofisinin dövlət başçısı Sauli Niinistönün adından yaydığı bəyanatda bildirilib.

“Məlum olub ki, Türkiyə Prezidenti Ərdoğan qismən Finlandiyanın NATO-ya üzvlüyünün ratifikasiyası ilə bağlı qərarını verərək görüşmək və verdiyi vədi yerinə yetirmək istəyir. Türklər ümid edirdilər ki, onlar burada qərarı açıqlayanda cavabı qəbul etmək üçün orada olacağam. Mən təbii ki, dəvətə müsbət cavab verdim. İl ərzində Türkiyənin fikirləri ilə bağlı çox danışılıb. Biz həmişə Türkiyə Prezident Administrasiyası ilə xüsusi işləmişik, çünki bu qərarların qəbulu mərhələsində həlledici olan Türkiyə Prezidentinin fikirləridir. İsveçlə əlaqəmiz həmişə yaxın olub, son günlər daha da sıx olub. Mən bu barədə İsveçin Baş naziri Kristerssonla danışmışam. Dünənki mətbuat konfransı da həmin əlaqəyə qismən eyham vurdu. Finlandiya üçün həm Finlandiya, həm də İsveçin mümkün qədər tez NATO-ya üzv olması çox vacibdir. İsveçin NATO-ya üzvlüyünü dəstəkləmək üçün işimi davam etdirəcəyəm”, – qeyd olunub.

Qeyd edək ki, Türkiyə Prezidenti Rəcəb Tayyib Ərdoğan bu gün Finlandiyanın NATO-ya üzvlüyü prosesindən danışıb. Ərdoğan Finlandiyanın NATO üzvlüyü ilə bağlı bildirib ki, üzərlərinə düşən vəzifəni yerinə yetirəcəklər, verdikləri sözü tutacaqlar.

Xatırladaq ki, Finlandiya Prezidenti və XİN rəhbəri 16-17 mart tarixlərində Türkiyədə səfərdə olacaq.