Reklamlar pul mükafatları və şirnikləndirici üstünlüklər vəd edir. Ordu sıralarına cəlbetmə şirkətləri uyğun kişilərə təkliflərlə zənglər edir. Çağırış məntəqələri tələbələri və işsizləri cəlb etmək üçün universitetlər və sosial xidmət agentlikləri ilə işləyir.

Baxmut və Ukraynanın döyüş meydanlarında döyüşlər getdikcə daha çox insanın həyatını itirə biləcək əks-hücumlara hazırlaşılan bir vaxt Kremlin döyüş maşınının yeni cəlbetmələrə böyük ehtiyacı var.

Sentyabr ayında 300 000 ehtiyatda olan hərbçinin səfərbərliyi "qismən" çağırış kimi təqdim edilmişdi. Bu, 65 yaşdan aşağı kişilərin əksəriyyətinin formal olaraq ehtiyatın bir hissəsi olduğu üçün bütün ölkədə çaxnaşma yaratmışdı.

On minlərlə insan cəlbetmə məntəqələrinə xəbər vermək əvəzinə Rusiyadan qaçıb. Kreml Ukraynadakı "xüsusi hərbi əməliyyatı" adlandırdığı və artıq bir ildən artıqdır ki, davam edən müharibə üçün növbəti çağırışın planlaşdırıldığını inkar edir.

Ancaq bunun nəhayət baş verəcəyinə dair geniş yayılmış qeyri-müəyyənlik fonunda hökumət kişiləri könüllülüyə sövq edir. Rusiya bunu müxtəlif bölgələrdə açılan müvəqqəti cəlbetmə mərkəzlərində, ya da hərbi qulluqçuların telefon zəngləri ilə edir.

ABŞ-da yerləşən Müharibənin Tədqiqi İnstitutunun son hesabatına görə, birinci dalğanın bu qədər populyar olmadığı sübuta yetirildikdən sonra "formal ikinci səfərbərlik dalğası elan edilməyə bilər".

Moskva sakinlərindən biri Associated Press-ə bildirib ki, onun çalışdığı və dövlət tərəfindən maliyyələşdirilən təşkilat döyüş yaşında olan bütün kişi işçilərin hərbi qeydiyyat kartlarını toplayıb və onlara möhlət veriləcəyini bildirib. Lakin o, bu addımın hələ də onu qorxutduğunu deyib.

Repressiyadan qorxduğu üçün adının açıqlanmasını istəməyən sakin "bu bizi qorxudur. Heç kim birdən-birə əlində tüfənglə müharibəyə girmək istəməz" deyib.

Onun dediyinə görə, kartını təhvil verdiyi vaxtdan bir həftədən çox vaxt keçib və istisnalar adətən bir-iki günə həll olunur, bu da onun narahatlığını artırır.

Rusiya mətbuatı xəbər verir ki, ölkə daxilində kişilər hərbi xidmətə çağırış vərəqələri alır. Bu halların əksəriyyətində kişilərdən sadəcə olaraq qeydlərini yeniləmələri xahiş olunur; digərlərində isə hərbi təlimlərdə iştirak etmək əmri verilir.

Kremlin sözçüsü Dmitri Peskov keçən həftə hərbi xidmət orqanlarında qeydləri yeniləmək üçün çağırış vərəqələrinin verilməsinin "adi təcrübə" və "davamlı bir iş" olduğunu deyib.

Yaşı 18-dən 27-yə qədər olan bütün rus kişilər bir il hərbi xidmət göstərməlidir, lakin onların böyük bir hissəsi sağlamlıq səbəbi ilə hərbi xidmətdən yayınır və ya tələbə kimi möhlət alır.

Çağırışdan yayınan kişilərin sayı xüsusilə Moskvada və digər böyük şəhərlərdə daha çoxdur və bir çoxları çağırış vərəqələri daşıyan hərbi qulluqçulardan sadəcə gizlənir.

Hazırkı ordu sıralarına cəlbetmə səyləri Rusiya ordunun Ukraynada qüvvəyə ehtiyacı olduğunu dərk etdiyini göstərir.

Gundemxeber.az