NATO-nun baş katibi Yens Stoltenberq Finlandiyanın çərşənbə axşamı alyansa qəbul ediləcəyini, bayrağının Brüsseldəki qərargahında qaldırılacağını bildirib.

"Sabah biz Finlandiyanı NATO-nun 31-ci üzvü kimi qarşılayacağıq", - Stoltenberq Brüsseldə çıxışı zamanı deyib. Onun sözlərinə görə, “bu, Finlandiyanı daha təhlükəsiz və ittifaqı daha güclü edəcək”.

O, çərşənbə axşamı Finlandiyanın NATO-ya daxil olması ilə bağlı bütün bürokratik prosedurların tamamlanacağını və alyansın qərargahında ilk dəfə olaraq Finlandiya bayrağının qaldırılacağını diqqətə çatdırıb.

Bundan əvvəl Şimali Atlantika Alyansının bütün dövlətləri Helsinkinin ərizəsini ratifikasiya ediblər. Türkiyə və Macarıstan bunu ən son edənlər oldu.

NATO-ya üzv ölkələr 5 iyul 2022-ci ildə Finlandiya və İsveçin Şimali Atlantika Şurasına qoşulma protokollarını imzaladılar.

Türkiyə hər iki Skandinaviya ölkəsindən kürd təşkilatlarını terrorçu elan etməyi, terrorda ittiham olunanların ekstradisiyasını və Ankaraya qarşı silah qadağalarını ləğv etməyi tələb edərək, üzvlük prosesini əngəlləyib.

Bununla belə, mart ayında Ankara Türkiyədə may ayında keçiriləcək prezident seçkilərindən əvvəl Finlandiyanın namizədliyini təsdiqləməyə hazır olduqlarını açıqlayıb. Eyni zamanda, İsveç məsələsində Türkiyənin hazırda Şimali Atlantika Alyansına üzv olmasına etirazları var.

TƏRCÜMƏ GUNDEMXEBER.AZ