Gürcüstan parlamentinin üzvləri ölkə prezidenti Salome Zurabişvilinin dövlət başçısının MSK-nın rəhbəri vəzifəsinə namizəd irəli sürmək hüququndan məhrum edən qanun layihəsinə veto qoymasının əleyhinə səs veriblər.

Gundemxeber.az xarici mediaya istinadla bildirir ki, səsvermənin nəticələrinə görə, 22 deputat prezidentin vetosunu dəstəkləyib, 33 deputat əleyhinə səs verib. Prezidentin təklif etdiyi düzəlişlərin qəbulu üçün 76 səs, yəni bütün 150 deputatın yarısından çoxunun səsi lazım idi.

Daha sonra deputatlar qanun layihəsinin əvvəllər üç oxunuşda qəbul edilmiş ilkin variantına 78 səslə səs veriblər.

Qanun layihəsinə əsasən, parlamentin sədri MSK-nın rəhbəri və üzvləri vəzifələrinə namizədlərin axtarışını həyata keçirəcək müsabiqə komissiyasını çağıracaq. Seçimdən sonra parlament rəhbəri 150 səsdən azı 76 səslə MSK-nın tərkibini beş il müddətinə seçməli olan bir neçə namizədi deputatlara təqdim edəcək. Təşəbbüs hakim “Gürcü arzusu - Demokratik Gürcüstan” Partiyasına məxsusdur.

Mövcud qanuna əsasən, 150 deputatdan 100-ü MSK sədrinin namizədliyinə səs verərsə, o, beş il müddətinə seçiləcək, daha az sayda deputatın dəstəyini qazanarsa, onun səlahiyyətləri cəmi altı ay olacaq. Bu düzəlişlər 2021-ci ildə qəbul edilib. O vaxtdan bəri hakim partiyanın 100 mandatı olmadığından parlament beş ildir ki, MSK-nın rəhbərini seçə bilmir.

Bundan əvvəl Zurabişvili qanun layihəsinə veto qoyub. Prezidentin sözlərinə görə, MSK sədrini əvvəllər olduğu kimi 100 deyil, 76 deputatın seçə bilməsi “konsensusla qəbul edilmiş qərarı ləğv edir və qütbləşmə riskini artırır”. O, parlamentə seçkiyə və seçki administrasiyasına etimadı qorumaq üçün MSK sədrinin seçilməsi üçün baryeri 150 səsdən 76-ya deyil, ən azı 90-a endirməyi təklif edib.

Qeyd edək ki, 2021-ci ilin avqustundan Gürcüstan MSK-ya Giorgi Kalandarişvili rəhbərlik edir. O, bir neçə dəfə altı ay müddətinə seçilib. 2022-ci ilin dekabrında Gürcüstan Prezidenti Salome Zurabişvili heç bir şəkildə 100 deputatın razılığını ala bilməyəcəyini izah edərək, Kalandarişvilinin MSK rəhbəri vəzifəsinə namizədliyini yenidən parlamentə təqdim etməkdən tamamilə imtina edib. Dövlət başçısı qanunverici orqana digər namizədlər də təklif edib, lakin hakim partiya MSK-nın yeni rəhbərini ümumiyyətlə təsdiq etməyib və Kalandarişvilinin səlahiyyətləri daha altı ay uzadılıb.

Gundemxeber.az