Qazaxıstan prezidenti Dariqanı siyasətdən necə kənarlaşdırdı: “Mənə mane olma, bu işlərə burunu soxma...”

Daha bir Orta Asiya sultanının qızı ilə bağlı problemi ortaya çıxıb.

Virtualaz.org xəbər verir ki, Nyu-Yorkda mənzillənən müxalif yönümlü Orta Asiya saytlarından biri Qazaxıstan prezidenti Nursultan Nazarbayevin böyük qızı Dariqanın siyasətə qarışmasından qəzəblənib və onun əl-ayağını yğışdırıb. Nəticədə Nazarbayevin 50 yaşlı qızı Dariqa artıq 7 ildir ki, ölkənin siyasi həyatında fəal iştirak etmir.

Doğrudur, Dariqa Nazarbayeva atasının başçılıq etdiyi “Nor otan” partiyasından deputatdır. Ancaq Dariqanın hakimiyyət səlahiyyətləri parlamentin sosial-mədəni inkişaf komitəsi ilə məhdudlaşdırılıb. Baxmayaraq ki, bir neçə il əvvələ qədər Dariqa siyasətdə kifayət qədər ambisiyalı idi. O, “Asar” adlı partiya qurmuşdu, dəbdəbəli forumlar və konfranslar keçirir, çoxsaylı KİV-lərə nəzarəti əlində saxlayır və özünü atasının mümkün varisi rolunda təqdim edirdi.



Lakin Qazaxıstandakı mənbələrdən daxil olan məlumatlara görə, Dariqanın siyasətlə fəal məşğul olması atasını qəzəbləndirib və Nazarbayev qızına başa salıb ki, onun işlərinə qarışmasın.

Qazaxıstanın Prezident Administrasiyasının keçmiş rəhbəri, indiki müdafiə naziri Adilbek Jaksıbayev o vaxt Dariqanın siyasətdən və digər bir çox işlərdən kənarlaşdırılmasını “böyük məsələ” adlandırmışdı.

Sayt daha sonra Nazarbayevlə Jaksıbayev arasında 2007-ci ildə baş tutmuş telefon danışığının audioyazısını təqdim edib. Həmin telefon söhbətində Qazaxıstan prezidenti ilə onun administrasiyasının rəhbəri Dariqaya “yerini necə başa salmaq” məsələsindən danışır. Virtualaz.org həmin telefon danışığının aduioyazısını və stenoqramını təqdim edir:



Nazarbayev: İndi o, özü (Dariqa-red.) zəng etmişdi, mən bütün bunları onun özünə də dedim.

Jaksıbayev: A-a-a, başa düşdüm, başa düşdüm...

Nazarbayev: Partiya ilə bağlı. Mən ona dedim, bilirsən, mənə mane olma, otur orada nümayəndə kimi. O, özü nəyə görəsə oynayır... Axı sən burada olmursan, ayda bir dəfə ora gəlirsən, sənə yazırlar, başlayırsan oynamağa. Nə burnunu soxursan bu işlərə, nə vilayətlərdən nə bilirsən? Nə bilirsən ki, burada nə edirlər?

Jaksıbayev: Aha...

Nazarbayev: Qarışma, bizim proqramımız var və onu həyata keçirəcəyik. Sən sadəcə otur. Sənin vaxtın hələ gəlməyib.

Jaksıbayev: O-o-o...

Nazarbayev: Sənə heç bir xüsusi vəzifə olmayacaq. Sən elə orada otur, vəssalam.

Jaksıbayev: Aha...

Nazarbayev: Vəssalam, deyir başa düşdüm (özündənrazı gülüş).

Jaksıbayev: Əla. Bəli, o, özü də başa düşəndir...

Nazarbayev: Hə.

Jaksıbayev: Sağ ol. Böyük işdir. Siz hər şeyə vaxt çatdırırsınız. Böyük iş gördünüz (gülür).

Nazarbayev: Nə etmək olar?! Hamı burun soxur, hamıya nəsə başa salmaq lazımdır...

Jaksıbayev: Siz narahat olmayın.

Nazarbayev: Bax, siz bizim potensialımızdan istifadə etmirsiniz. Siz bizə etibar etmirsiniz. Başa düşürsən? Bezdiriblər.

Jaksıbayev: Hi-hi-hi...

Nazarbayev: Sənə daha nə lazımdır?... Sənin ananı...

Jaksıbayev: Hə də, yaşa, həyatdan zövq al.

Nazarbayev: Mütləq qalxmaq lazımdır... Mütləq.

Jaksıbayev: Belə şans dünyada az adama verilir. Əslinə baxsaq... Hi-hi-hi (gülür)...

Nazarbayev: Yaxşı, hələlik.

Jaksıbayev: Yaxşı, başa düşdüm, narahat olmayın.

***

Qeyd edək ki, D.Nazarbayeva 1992-ci ildə “Bobek” adlı xeyriyyə fonduna rəhbərlik edib, 1994-cü ildə isə artıq moda biznesinə girib və “Xabar” adlı telekanal açıb. Əri Rahat Əliyevlə birlikdə Qazaxıstanda mediamaqnata çevrilib. 2003-cü ildən isə özünü siyasətçi kimi təqdim edib.

Belə ehtimallar yaranıb ki, Nazarbayev qızını öz yerinə hazırlayır. Lakin sonradan onun əri R.Əliyev Nazarbayevin qəzəbinə tuş gəldi və ölkədən qaçmalı oldu. Dariqa boşandı, onun keçmiş əri hazırda mühacirətdədir və Nazarbayev barədə kompromatlardan ibarət kitab nəşr etdirib.

Qazaxıstandakı mənbələr deyir ki, Dariqa atasının onu siyasətdən kənarlaşdırmasından narazıdır və əlində imkan olsa, Özbəkistan prezidentinin qızı Gülnarə Kərimova kimi o da twitterdən hakim ailə barədə kompromatlar yayardı.