“İsrail hökuməti və müdafiə ordusu ən yüksək səviyyədə indi Qəzzanın cənub hissəsinə hücuma başlamaq, yoxsa müvəqqəti girov razılaşmasını gözləmək lazım olduğu barədə müzakirələr aparır”.

Bu barədə “The Jerusalem Post” qəzeti məlumat verir.

Nəşrdə qeyd olunur ki, müxtəlif kanallar vasitəsilə İsrail və HƏMAS-ın girovlarla bağlı danışıqlarda hansı şərtləri irəli sürəcəklərinə dair məlumatlar yayılıb. Bu, xeyli sayda israilli mülki girovun qaytarılması və məhbusların mübadiləsi üçün müvəqqəti razılaşma ola bilərdi.

Daha əvvəl “The Washington Post” yüksəkrütbəli İsrail rəsmisinə istinadən yazıb ki, ilkin razılaşmaya əsasən, HƏMAS İsrail həbsxanalarında saxlanılan fələstinli qadın və yeniyetmələrin azad edilməsi ilə eyni vaxtda israilli qadın və uşaqları azad edəcək.

“The Jerusalem Post”, həmçinin yazır ki, “İsrail HƏMAS-ın çox ehtiyac duyduğu sövdələşməyə razı olub-olmamasından asılı olmayaraq, hazırda, hətta razılaşmaya yaxın olma ehtimalı da Qəzzanın cənubuna doğru irəliləyişi ləngidə bilər”.

Nəşr qeyd edir ki, hökumət və İsrail Müdafiə Ordusu HƏMAS-ı məhv etmək istədiklərini bildirsələr də, onlar dəfələrlə ardıcıl olaraq girovların qaytarılmasının da buna bərabər məqsəd olduğunu vurğulayıblar. Cənuba hücum baş tutarsa, bu, hazırda müzakirə olunan sövdələşmələrin aspektlərini təhlükə altına sala bilər.

Qeyd olunur ki, İsrail qərar qəbul etmək üçün vaxt tələb edə bilər, lakin bir neçə günlük hərəkətsizlik əhvali-ruhiyyəni zəiflədə bilər, ona görə də çox güman ki, məsələ çox uzun müddət açıq qalmayacaq.

Eyni zamanda, İsrailin Baş naziri Benyamin Netanyahunun “CBS” televiziyasına verdiyi məlumata görə, İsrail Qəzzada quru əməliyyatından daha çox HƏMAS tərəfindən tutulan girovları azad etməyə yaxındır.

“Biz (girovları azad etməyə) quru əməliyyatına başlamazdan əvvəl olduğundan daha yaxınıq, çünki quru əməliyyatı HƏMAS-a təzyiq göstərdi… Əgər girovlarımızı geri ala bilsək, müvəqqəti atəşkəs olacaq”, - deyə Netanyahu bildirib.