Sakinlərin İsrailin yeni hücumları barədə məlumat verdiyi, HƏMAS-ın isə İsrail qüvvələrini raket atəşinə tutduğunu bildirdiyi bir vaxt, İsrail ordusu çərşənbə günü Qəzzanın cənubundakı Rəfah şəhərində üç əsgərinin öldürüldüyünü bildirib.

Son hücumlar Beynəlxalq Qızıl Xaç və Qızıl Aypara Cəmiyyətləri Federasiyasının Qəzzada atəşkəsin və təxminən səkkiz aydır davam edən müharibədə yardıma çox ehtiyacı olan fələstinlilərə yardım çatdırmaq üçün humanitar qrupların girişinə ehtiyac olduğunu dediyi vaxta təsadüf edib.

"Biz vəziyyəti dəyişməyə hazırıq. Biz oraya daxil olmalıyıq və oraya daxil olmaq üçün atəşkəs olmalıdır" - deyə, Beynəlxalq Qızıl Xaç və Qızıl Aypara Cəmiyyətləri Federasiyasının prezidenti Keyt Forbs Reuters agentliyinə bildirib.

Associated Press-ə də danışan Forbs, ərzaq çatışmazlığı və adekvat sanitar şəraitin olmaması kimi problemlərin tez bir zamanda həll edilməli olduğunu deyib.

Forbsun Associated Press-ə bildirdiyinə görə, "Ancaq bu, Qəzzanın və oradakı insanların bərpası üçün onilliklər ərzində gərək olacaq yardım marafonu olacaq".

Birləşmiş Ştatlar çərşənbə axşamı İsrailin Rafahdakı qaçqın düşərgəsinə sığınan azı 45 fələstinlinin ölümünə və 200 nəfərin yaralanmasına səbəb olan açıq hava hücumundan "dərin narahatlığını" ifadə edib. ABŞ İsraili geniş araşdırma aparmağa çağırdığını bildirib.

ABŞ Dövlət Departamentinin sözçüsü Metyu Miller jurnalistlərə açıqlamasında "bu görüntülər ürək parçalayan idi" deyib.

Onun sözlərinə görə, İsrail HƏMAS-ın arxasınca getmək hüququna malik olsa da, İsrail əməliyyatları zamanı mülki zərəri minimuma endirmək üçün mümkün olan hər şeyi etməyə borcludur.

"Biz İsrailə beynəlxalq humanitar hüquqa tam riayət etmək, əməliyyatlarının mülki əhaliyə təsirini minimuma endirmək və ehtiyacı olanlara humanitar yardım axınını maksimum dərəcədə artırmaq öhdəliyini vurğulamağa davam edəcəyik" - deyə, Miller bildirib. O, İsrail ordusunun tez bir zamanda hərtərəfli və şəffaf araşdırma aparacağını vəd etdiyini deyib.

Qəzzanın Səhiyyə Nazirliyi hücumun məcburi köçkünlərin sığındığı ərazidəki çadırların yanmasına səbəb olduğunu bildirib. İsrailin dediyinə görə isə hücum zamanı iki yüksək rütbəli HƏMAS militantını öldürüb.

İsrail-HƏMAS müharibəsi HƏMAS-ın oktyabr ayında İsrailə qarşı İsrail rəsmilərinin bildirdiyinə görə, 1200 nəfərin ölümü və təxminən 250 nəfəri girov götürməsi ilə nəticələnən hücumundan sonra başlayıb. HƏMAS-ın idarə etdiyi Qəzza Səhiyyə Nazirliyinin məlumatına görə isə, İsrailin cavab hücumu nəticəsində Qəzzada, əksəriyyəti qadın və uşaq olmaqla, 35 800-dən çox insan öldürülüb.

GundemXeber.Az