Hindistan və ABŞ Baş nazir Narendra Modinin üçüncü müddətə başlamasından bir neçə gün sonra yüksək texnologiya sahəsində əməkdaşlığı gücləndirmək barədə razılığa gəliblər.

Bu, Ağ Evin milli təhlükəsizlik üzrə müşaviri Ceyk Sallivanın Dehliyə səfəri zamanı baş verib.

Sallivan Hindistanın xarici işlər naziri Modi və hindistanlı həmkarı ilə görüşərək hər iki ölkənin daha sıx əlaqələr qurmaq istəyini təsdiqləyib.
"Hindistan ümumi rifah naminə Hindistan-ABŞ Hərtərəfli Qlobal Strateji Tərəfdaşlığını daha da gücləndirməyə sadiqdir" - deyə, Modi bazar ertəsi Sallivan ilə görüşdən sonra sosial mediada yazıb.
Sallivanın səfərinin əsas məqsədi Hindistanın milli təhlükəsizlik üzrə müşaviri Ajit Doval ilə iki ölkənin ötən ilin yanvarında irəli sürdüyü əlamətdar təşəbbüsü müzakirə etmək olub.
Təşəbbüs müdafiə, yarımkeçiricilər, 5G simsiz şəbəkələri və süni intellekt daxil olmaqla, yüksək texnologiyalı sahələrdə daha sıx əməkdaşlığı inkişaf etdirmək məqsədi daşıyır.
“Sallivan və Doval milli təhlükəsizliyə yönəlmiş dəqiq idarə olunan döyüş sursatları və digər elektron platformalar yaratmaq üçün ABŞ və Hindistan şirkətlərini əhatə edən yeni strateji yarımkeçirici tərəfdaşlığına başlayıb”.
Bu barədə iki ölkənin müşavirlərinin görüşünün yekunları üzrə hazırlanmış məlumat notasında deyilir.