İsrail ordusunun cümə axşamı bildirdiyinə görə, qüvvələri Hizbullahın Livanın cənubunda bir neçə bölgədəki hədəflərinə hava zərbələri endirib.

Livanın Milli Xəbər Agentliyi zərbələrdən birinin Dueyr şəhərində evi dağıldığını bildirsə də, tələfat barədə məlumat verməyib.
İsrail ordusu cümə axşamı aylardır HƏMAS militantları ilə döyüşdüyü Qəzza zolağının cənubundakı Rəfah bölgəsində də reydlər keçirdiyini bildirib. Hərbçilərin dediyinə görə, İsrail qırıcıları Qəzzanın şimalında militantların hücumlar həyata keçirdiyi ərazini də məhv edib.
"World Central Kitchen" yardım qrupu cümə axşamı təşkilatın fələstinli üzvünün Qəzzanın mərkəzində öldürüldüyünü bildirib. Qrup Nadi Salautun ölümü ilə bağlı təfərrüatları araşdırdığını və onun həmin vaxt vəzifəsindən kənarda olduğuna inandığını deyib.
İsrail ordusu "son günlər təşkilatın əməkdaşının iş zamanı xəsarət alması ilə bağlı hər hansı məlumat almadığını" bildirib.
Aprel ayında İsrailin hava hücumları zamanı "World Central Kitchen" təşkilatına məxsus 3 avtomobili vurulmuş, nəticədə 7 nəfər ölmüşdü. İsrail hücum zamanı yardım işçilərini qəsdən hədəf almadığını bildirmişdi.
Hərbi əməliyyatlar İsrailin Beyrutda Hizbullah komandirinin, Tehranda isə HƏMAS-ın siyasi liderinin öldürülməsindən sonra bölgədə genişlənən münaqişə qorxusu fonunda davam edib.
Hizbullah buna cavab verəcəyinə, İsrail isə HƏMAS-ın yeni təyin olunmuş lideri Yəhya Sinvarı məhv edəcəyinə söz verib.
İsrail oktyabrın 7-də 1200 nəfərin ölümünə və 250 girovun əsir götürülməsinə səbəb olan terror hücumuna cavab olaraq, HƏMAS-ı məhv edəcəyinə söz verib.
İsrailin əks-hücumları Qəzzada əksəriyyəti qadın və uşaq olmaqla, 40 minə yaxın insanın ölümünə səbəb olub. İsrail isə ölənlər arasında minlərlə HƏMAS döyüşçüsünün olduğunu bildirib.

GUNDEMXEBER.AZ