İrəvanda istintaq təcridxanasında saxlanılan rusiyalı iş adamı Samvel Karapetyan yeni siyasi qüvvə yaratdığını bəyan edib.

Gundemxeber.az-ın xarici mediaya istinadla verdiyi xəbərə görə, bu barədə onun vəkilləri məlumat yayıblar.

Karapetyan bildirib ki, məqsədi Ermənistanda köklü şəkildə fərqli, prinsipial bir siyasi qüvvə formalaşdırmaqdır. O, indiyə qədər baş nazir Nikol Paşinyanın siyasətinə qarşı mübarizə aparanlara hörmətlə yanaşdığını qeyd etsə də, ölkənin gələcəyi ilə bağlı öz baxışlarının olduğunu vurğulayıb.

İş adamı rəhbərlik edəcəyi komandası ilə müstəqil şəkildə irəliləmək niyyətindədir, lakin eyni zamanda digər müxalif qüvvələrlə əməkdaşlığı da istisna etmir.

Xatırladaq ki, 18 iyun tarixində Ermənistan Daxili İşlər Nazirliyinin Mütəşəkkil Cinayətkarlıqla Mübarizə Baş İdarəsi "Tashir" şirkətlər qrupunun prezidenti Samvel Karapetyanı həbs edib. Ona qarşı hakimiyyətin zorla ələ keçirilməsinə çağırış ittihamı irəli sürülüb.

Eyni ittihamla daha sonra arxiyepiskop Baqrat Qalstanyan (ona qarşı, həmçinin, terror aktı hazırlamaq və hakimiyyəti zorla ələ keçirməyə cəhd maddələri üzrə şübhələr də var), Mikael Adjapaxyan və "Müqəddəs Mübarizə" müxalif hərəkatının digər tərəfdarları da saxlanılıblar.

Gundemxeber.az