ABŞ Senatının Silahlı Qüvvələr Komitəsinin sədri Rocer Uiker ABŞ Konqresinin Tayvana gedəcək nümayəndə heyətinə rəhbərlik edəcək.

Gundemxeber.az xəbər verir ki, məlumatı "Financial Times" mənbələrə istinadən yayıb.

Bildirilir ki, səfər avqusta planlaşdırılır.

Nəşr qeyd edir ki, Uikerin səfəri “ABŞ-Tayvan münasibətlərində incə məqama təsadüf edir”, çünki “ABŞ prezidenti Donald Trampın Çin prezidenti Si Cinpinlə görüşdə israrlı olması səbəbindən Tayvana kömək etmək istəməməsi ilə bağlı Vaşinqton və Taybeydə narahatlıqlar artır”.

FT yazır ki, ada Trampın Vaşinqtonun Tayvanın müstəqilliyinə qarşı olduğunu bəyan edən bəyanatla çıxış edə biləcəyindən xüsusilə narahatdır.

Qəzet “Ağ Evin bu yaxınlarda Tayvan prezidenti Lai Jingdenin Mərkəzi Amerikaya gedərkən Nyu-Yorkda tranzit dayanacağı ilə bağlı tələbini rədd etdiyinə” diqqət çəkir.

Bir gün əvvəl Tramp bu ilin sonuna qədər Çin lideri ilə görüşməyə hazır olduğunu bildirmişdi. O, Şotlandiyada olarkən Amerikanın “Breitbart News” portalına müsahibəsində deyib: “O, mənim ora getməyimi istəyir və o, ABŞ-a gəlməyə hazırlaşır. Nə olacağını görəcəyik, lakin çox güman ki, yaxın gələcəkdə Çinə gedəcəyik, bəlkə də bu ilin sonuna qədər və o, bura gələcək".

Gundemxeber.az