Gundemxeber.az xarici mediaya istinadən xəbər verir ki, ABŞ prezidenti Donald Tramp hələ də Rusiya lideri Vladimir Putinə qarşı qəzəblidir. Axios-un ABŞ rəsmilərinə istinadən yazdığına görə, Tramp Rusiya iqtisadiyyatını zəiflətməyin tərəfdarıdır və diplomatik cəhdlər uğursuz olsa belə, NATO ölkələrinə silah sataraq onların vasitəsilə Ukraynaya ötürülməsini davam etdirəcək.

Rəsmilərin sözlərinə görə, Tramp Kiyevə birbaşa silah göndərmək əvəzinə, onu NATO müttəfiqlərinə satmağı və onların maliyyələşdirməsi ilə Ukraynaya ötürülməsini təklif edir. Trampın bəzi açıqlamaları bəzən “prorusiya” kimi səslənsə də, ABŞ rəsmiləri bunu onun razılaşma əldə etmə strategiyası kimi dəyərləndirir.

Ukrayna prezidenti Vladimir Zelenski və komandası hazırda Trampın mövqeyinə təsir göstərməyə çalışır. Axios-un məlumatına görə, çərşənbə günü Trampın Zelenski və bir qrup Avropa lideri ilə virtual görüşü planlaşdırılır. Zelenski Rusiya ordusunun son uğurlarının əhəmiyyətini azaltmağa çalışır və danışıqların Aляskada mənfi nəticələnməməsi üçün Avropa və digər region siyasətçiləri ilə fəal əlaqələr saxlayır.

Zelenski və Avropa liderləri narahatdır ki, Tramp Putinin tələblərini qəbul edə bilər. “Hazırda heç kim bilmir ki, Tramp cümə günü Putindən nə almaq istəyir. Onu nə qədər təsirləndirə biləcəyimizi bilmirik, amma çalışmaq məcburiyyətindəyik,” – deyə bir ukraynalı rəsmisi bildirib.

Keçən cümə Tramp Rusiyaya qarşı sərt sanksiyaları elan etməyi planlaşdırsa da, bunun əvəzinə Putini Alyaskaya dəvət edəcəyini açıqlayıb. Bu arada son 48 saat ərzində Rusiya ordusu Donetsk vilayətində il ərzində ən sürətli irəliləyişlərindən birini əldə edərək Ukrayna müdafiə xəttini 15-17 km dərinliyində yardı. Zelenski bu irəliləyişi “dar və taktiki” adlandırıb və onun məqsədinin Alyaska sammiti ərəfəsində informasiya effekti yaratmaq olduğunu bildirib.

Gallup sorğusuna görə, əvvəllər “qalibiyyətə qədər müharibə” tərəfdarı olan ukraynalıların əksəriyyəti indi tezliklə sülh bağlanmasının tərəfdarıdır. Respondentlərin 69%-i “mümkün qədər tez” razılaşma istədiyini, yalnız 24%-nin isə müharibənin davamını dəstəklədiyini bildirib. Müqayisə üçün, 2022-ci ildə 73% müharibənin davamından, 22% isə danışıqlardan yana idi

Gundemxeber.az