Türkiyə Milli Olimpiya Komitəsi tərəfindən təşkil edilən və ölkənin ən köklü idman tədbirləri sırasında yer alan 37-ci Boğaziçi Qitələrarası Üzgüçülük Yarışı müvafiq qurumlar tərəfindən təmin edilən ən yüksək təhlükəsizlik tədbirləri altında həyata keçirilib.

Bu barədə Türkiyə Milli Olimpiya Komitəsi tərəfindən Bosfor boğazında yoxa çıxan rusiyalı üzgüçü Nikolay Sveçnikovun axtarışları və baş verən hadisə ilə bağlı verilən açıqlamada bildirilib.

Qeyd edilib ki, yarış marşrutu boyunca hər bir üzgüçünün təhlükəsizliyini təmin edilib və onlara davamlı olaraq nəzarət edilib:

"37-ci Boğaziçi Qitələrarası Üzgüçülük Yarışının iştirakçısı, rusiyalı idmançı Nikolay Sveçnikovun yarış zamanı yoxa çıxması faktının aşkarlanmasından sonra komitəmiz və rəsmi qurumlar tərəfindən həyata keçirilən işlərlə bağlı ictimaiyyəti məlumatlandırmaq istərdik.

Sahil Mühafizəsi Komandanlığı, Təhlükəsizlik Baş İdarəsinin Dəniz Bölməsi, Sahil Mühafizəsi, AFAD (Türkiyənin Fövqəladə Halların İdarə olunması Agentliyi), Yanğından Mühafizə İdarəsi, Sualtı Axtarış-Xilasetmə qrupları və özəl qurumlar da daxil olmaqla, ümumilikdə 100 qayıq və dəniz vasitəsi cəlb edilib. Bunlardan 60-ı təhlükəsizlik gəmisi kimi xidmət edib", - deyə açıqlamada bildirilib.

Həmçinin komitə tərəfindən tədbirin xronologiyası da təqdim edilib:

"Yarış saat 10:04-də başlayıb, sonuncu üzgüçü isə saat 10:54-də suya girib.

Qaydalara əsasən, yarış sonuncu üzgüçünün suya girməsindən 2 saat sonra, saat 12:54-də başa çatıb.

Yarışın sonunda donanma rəhbərliyinin təlimatı ilə bütün marşrut ərazisi yoxlanılıb və sahədə hər hansı üzgüçünün qalmadığı ilə bağlı məlumat verilib.

Diskvalifikasiya edilmiş və sudan çıxarılan idmançıların siyahıları birləşdirilərək yoxlama aparılıb və ilkin olaraq 3 üzgüçünün əskik olduğu, daha sonra isə sadəcə 1 idmançının olmadığı müəyyən edilib.

Bu məlumat dərhal Sahil Mühafizə Komandanlığı, Təhlükəsizlik Dəniz Şöbəsi və İstanbul Valiliyinə çatdırılıb, rəsmi hesabatla axtarış-xilasetmə əməliyyatlarının aparılması tələb edilib və dərhal hərəkətə keçilib.

Aidiyyəti qurumlar yarışdan sonra hadisənin aşkarlanmasından bu yana bölgədə axtarış işlərini gücləndiriblər və işlər fasiləsiz şəkildə davam etdirilir".

"Bütün dövlət təhlükəsizlik qurumlarının koordinasiyası və Türkiyənin sayılıb-seçilən qurumlarının da töhfəsi ilə ən yüksək təhlükəsizlik standartlarına uyğun keçirilən yarış zamanı bir idmançımızın itməsi hamımızı dərindən kədərləndirib. Hadisənin aydınlaşdırılması üçün Sahil Mühafizəsi və polis bölmələri tam əməkdaşlıq şəraitində fəaliyyət göstərilir.

Türkiyə Milli Olimpiya Komitəsi olaraq gedişatı şəffaf şəkildə paylaşmağa davam edəcəyik", - deyə komitədən əlavə edilib.

16:08

Türkiyə Hərbi Dəniz Qüvvələri Bosfor boğazında yoxa çıxan rusiyalı üzgüçü Nikolay Sveçnikovun axtarışlarına qoşulub. Axtarış əməliyyatına yalnız idmançının ailəsinin şəxsi müraciətindən sonra başlanılıb.

Bu barədə "SHOT" "Telegram" kanalına istinadən xəbər verir.

Məlumata görə, Nikolay Sveçnikovun həyat yoldaşı 8 aylıq oğlunu Moskvada qoyaraq İstanbula gəlib. Yalnız bu gün (25 avqust) üzgüçünün yaxınları tərcüməçi vasitəsilə İstanbul rəsmiləri ilə əlaqə saxlaya bilib və onlara donanmanın axtarışa cəlb ediləcəyinə söz verilib.

11:36

Rusiyalı üzgüçü Nikolay Sveçnikov Türkiyədə yarış zamanı yoxa çıxıb.

Bu barədə "Gazeta.ru" "Telegram" kanalı məlumat verir.

Məlumata görə, təcrübəli idman ustası "Bosfor-2025" kütləvi qitələrarası üzgüçülük yarışı zamanı gözdən itib.

Nikolay Sveçnikov ilk start götürənlərdən biri olub, lakin təxminən üç min nəfər içində finişə çatmayan yeganə insan o olub və təşkilatçılar yalnız 12 saatdan sonra bunun fərqinə varıblar.

Üzgüçü sahil mühafizəsi, dronlar və dalğıclar tərəfindən axtarılır, lakin axtarışlar hələlik nəticəsizdir. Türkiyənin rəsmi qurumları tərəfindən də araşdırmalara başlanılıb.

SHOT "Telegram" kanalı qeyd edir ki, Bosfor boğazını üzərkən itkin düşən üzgüçü Nikolay Sveçnikovun birinci körpünün yaxınlığında gücü tükənər və ya ayağında qıcolma baş vermiş ola bilər.

İdmançıların dediyinə görə, yarış zamanı onlar kürəyi üstə üzən oxşar adam görüblər. Başqa bir versiyaya görə, onu axın digər sahilə sürüklənmiş olar və ya marşrutun sonuna yaxın qıcolma baş vermiş ola bilər.

İdmançıların sözlərinə görə, bu il güclü əks cərəyan olub. "Bosfor-2025"in iştirakçılarından biri qeyd edib ki, 6.5 kilometri 1 saata və ya 1 saat 20 dəqiqəyə üzməyi nəzərdə tutduğu halda, bu il 1 saat 46 dəqiqəyə başa vura bilib./oxu.az/