Bu ilin avqustun 25-nə qədər Rusiyanın 2-ci Qərb dairə hərbi məhkəməsinin hakimləri 305 ukraynalı hərbçi barəsində “terror aktı” ittihamı ilə hökm çıxarıblar. Onlardan 290-ı əsir götürülənlər, 15-i isə qiyabi mühakimə olunub.

GUNDEMXEBER.AZ xarici agentliklərə istinadən xəbər verir ki, bu barədə The Insider və Kirill Parubetsin Analitik Mərkəzi məlumat yayıb.

Ümumilikdə Kursk vilayətində 525 ukraynalı hərbçi əsir düşüb. Beləliklə, əsirlərin yarıdan çoxu artıq Rusiyada mühakimə olunub. Yalnız 7 nəfər Ukraynaya dəyişdirilə bilib. Qalan 228 nəfərdən 4-nün istintaq altında olduğu dəqiqdir, digərlərinin isə ya işləri açılmayıb, ya da onlar adi hərbi əsir statusunda saxlanılır.

Əksər hökmlər “terror aktı” maddəsi ilə çıxarılıb. Lakin İstintaq Komitəsinin press-relizlərinə əsasən, hərbçilərə daha çox “sərhədi qanunsuz keçmə”, “yaşayış məntəqəsini bloklama” və “təxliyəyə mane olma” kimi ittihamlar irəli sürülüb. Hüquq müdafiəçilərinin “Siyasi məhbuslara dəstək. Memorial” layihəsi bildirir ki, əsirlər faktiki olaraq Ukrayna Silahlı Qüvvələrində xidmət etdiklərinə və Rusiyanın ərazisində hərbi əməliyyatlarda iştirak etdiklərinə görə təqib olunurlar. Bu isə onların ədalətli məhkəmə hüququnu, həmçinin Cenevrə konvensiyasında təsbit olunmuş hüquq və azadlıqları pozur.

Kursk vilayətində əsir düşən ukraynalı hərbçilərlə bağlı istintaq da sürətləndirilib. Məlumata görə, ittihamların irəli sürülməsindən məhkəməyə göndərilməsinə qədər orta müddət 5,5 ay təşkil edib. Halbuki “terrorçuluq”la bağlı digər işlərdə bu müddət adətən 12–18 ay olur.

GUNDEMXEBER.AZ