Başçı müavini vergilərin yolunu tutdu

Nərimanov rayon İcra Hakimiyyəti haqda araşdırma məqaləsi rezonans doğurub; Abidin Fərzəliyevin müavini Şahmar İbadov “Gündəm-xəbər”ə zəng edərək açıqlama yerinə həbslə təhdid edib, barəsindəki ittihamlara reaksiya verib

Nərimanov rayon İcra Hakimiyyəti haqda araşdırma məqaləsi rezonans doğurub. “Gündəm-xəbər”in icra başçısı Abidin Fərzəliyevlə müavini Şahmar İbadov barəsində yaydığı məlumatlar sərt təpki ilə qarşılanıb.

Məqalədə yer alan detallar və media üzərindən aparılan araşdırmalardan irəli gələn xəbərlərə təhdid şəklində reaksiya verilib. Halbuki. Həmin materiallardan bəzi nüanslar vaxtilə mediada ara-sıra yayımlanıb. Həmçinin, onun 9-cu mikrorayonda villasının şəklinin elektron mediada yayımlanmasını da xatırlatmaq yerinə düşər ki, İbadov hədələmək yerinə münasibət bildirsin.

Lakin icra başçısının müavini “Gündəm-xəbər”ə məqalədəki ittiham və məqamlarla bağlı açıqlama vermək əvəzinə hədə leksionunu seçim edib. Şahmar İbadov “İki məmurun bölüşdürdüyü rayon - Nərimanov” başlıqlı məqalə ilə bağlı əlaqə saxlayaraq Vergilər Nazirliyinin tutduğu yolu davam etdirmək istəyində olduğunu açıq şəkildə söyləyib.

Belə ki, başçının müavini 012-496-91-00 telefon nömrəsindən redaksiyamıza zəng edərək bildirib ki, dərhal təkzib verilsin. İbadov unudub ki, dövət məmurudur və bir mətbu orqanla hansı dildə danışmaq lazımdır. O, yazıdakı ittihamlarla bağlı açıqlama verməli və yaxud RİH-nin mətbuat xidməti öz press-relizini yollamalıdır. Başçı müavini isə zəng edərək öz üslubunda danışıb.

Ş.İbadov deyib ki, “sizin qəzetdə “İki məmurun bölüşdürdüyü rayon-Nərimanov” dərc olunan yazıya dərhal təkzib verin, əks halda mən bütün işimi gücümü yerə qoyub səninlə məşğul olacam”. Görəsən, başçı müavini işlərini kənara qoyub bir qəzetlə məşğul olmaq deyəndə nəyi nəzərdə tutub? Gəlib diqqət edək:

Şahmar müəllim daha sonra bildirib ki, “təsisçi Şirin Cəfərinin məhkəməsi yeni qurtarıb, həbs olunmayıb, mən özüm bu işlə ciddi məşğul olacam”.

Vergilər Nazirliyinin davamçısı olmaq borcunu özündə hiss edən Fərzəliyevin müavini bu mesajla açıq şəkildə jurnalisti həbslə təhdid edib. Prezident İlham Əliyevin mətbuata verdiyi dəstəyi, media nümayəndəsinin həbsinə çox sərt şəkildə reaksiyasını deyəsən, hörmətli İbadov yaddan çıxarıb.

Məhkəmə ədalətli şəkildə Ş.Cəfəri barəsində həbs hökmü çıxarmadı, amma yarımçıq qalan işi Nərimanov rəhbərliyi başa vurmaqda iddialıdır. Halbuki, başçı müavini barəsində yazılanlarla bağlı bir məmur olaraq təhdidsiz-hədəsiz, sakit reaksiya verə bilər, fikirlərini söyləyərdi.

Necə ki bunu daha yüksək vəzifəli məmurlarda görmüşük, mətbuat xidmətləri açıqlama yayıb. Jurnalisti isə həbs, məhkəmə ilə təhdid etmək birbaşa dövlətin mətbuat siyasətinə qarşı getməkdir. Ölkə başçısının media ilə bağlı yürütdüyü siyasətin əksinə atılan bu addım heç də İbadova məmur kimi başucalığı gətirmir. Hər halda bir məmurun media nümayəndələrinə hədə-qorxu ilə mövqe bildirməsi heç bir qanun çərçivəsinə sığmır.

İbadov onu da qeyd edib ki, 80-nə yaxın saytla əməkdaşlıq edir, heç biri onu bu qədər əsəbləşdirməyib: “Ancaq sizin bu yazınız məni bərk əsəbləşdirib, Şirin Cəfəri məhkəməni bilirəm yeni qurtardı ancaq həbs olmadı. Mən bu işlə işimi gücümü atıb məşğul olaram”.

“Gündəm-xəbər” öz növbəsində heç bir qərəzi olmadan onun mövqeyini də dərc etməyə hər zaman hazır olduğumuzu bildirib. Telefon söhbətində hörmətli başçı müavininin nəzərinə çatdırılıb ki, qəzet təkzibi öz tərəfindən dərc edə bilməz, qarşı tərəfin mövqeyini dinləyib çap edə bilər.

Bu fikri dinlədikdən sonra İbadov bildirib ki, yazıdakı məqamların hamısı yalandır, həqiqəti əks etdirmir. “Gündəm Xəbər" qəzeti olaraq KİV haqqında qanunun müvafiq maddələrini əsas tutaraq, qarşı tərəfin mövqeyini qəzetimizin çoxsaylı oxucularına çatdırmağı özümüzə borc bildik.

İbadovun fikirləri yenə də çap etməyə hazırıq. Bəs, həmin məqalədəki nüanslar nədən ibarət idi, xülasəsini xatırladaq. Məqalədə deyilirdi ki, Nərimanov kimi mərkəzi rayon Abidin Fərzəliyev-Şahmar İbadov arasında bölünüb.

İcra başçısı və müavini paytaxtın ən strateji rayonlarından birini inhisara alıb. Onların nəzarətindən kənarda nə bir sahibkar, nə kommersiya obyekti var. Total şəkildə rayona nəzarət edən başçı-müavin tandeminin əsas praktiki Ş.İbadovdur.

A.Fərzəliyev Ş.İbadovu qabağa verərək məsuliyyəti onun üzərinə qoyub. Bu, həm ona olan etimaddan irəli gəlir, həm adının hallanmaması üçün bu priyomu istifadə edir. Ş.İbadovun əl-qolunun geniş açılması, rayondakı tikinti və iaşə obyektlərinə açıq şəkildə əl qoyması da bu imkanlardan yaranıb.

İddialara görə, Nərimanov rayonundakı gəlirli sahələrin yarıbayarısı Ş.İbadovun nəzarətindədir. Bu imkanlara sahiblənməsi təbii ki, onun siyasi gücünü də artırıb.

Daşınmaz əmlak qeydiyyatından əlavə, binaların sökülməsi, plana düşən tikililərə görə kompensasiyaların bölüşdürülməsi işlərinə də sahiblik edib. Bəzi qaynaqlardan gələn xəbərlərdə bildirilir ki, İbadov Nərimanov ərazisində poluiteran materialların binalara üzlənməsində belə baş məsləhətçi olub.

İddialara görə, bu keyfiyyətsiz üzlüklərin rayondakı binaların fasadına yamaq etməkdə müavinin mənfəəti olub. Mənbə qeyd edir ki, Fərzəliyev bu məsələdən heç də xəbərsiz olmayıb və onun istəkləri reallaşıb. Artıq həmin üzlüklər sökülüb. Ş.İbadov qısa müddət ərzində böyük qazanc əldə edib.

Bundan əlavə, Həsən Əliyev küçəsinin Azərbaycan Müəllimlər İnstitutu ilə bitişdiyi ərazidə 5 mərtəbəli binaların söküntü işləri aparılıb. Yerində isə yeni binaların tikintisi hələ də davam edir. Şahmar İbadov bu prosesdən çox böyük qazanc əldə edib.

Rayondakı sosial problemlərə gəlincə, Nərimanov rayon icra başçısı avtoyuma biznesi açıb. Abdin Fərzəliyev rayondakı əksər məntəqələri yaxın adamlarına həvalə edib. Nərimanov rayonunda 50 kvadrat metrlik boş yerlərin hamısı nəzarətə alınıb və onlar avtoyuma məntəqələri açmaq istəyənlərə satılır.

Hörmətli Şahmar müəllim, bu məqamlarla bağlı isə fikir demək yerinə həbslə təhdid edir. Onun ünvanına nə bir aşağılayıcı ifadə yer alıb, nə də qeyri-etik cümlə. Sadəcə, iki məmurun fəaliyyətindən yazılıb. Araşdırmalarımız davam edir. Qarşı tərəfi dinləməyə hazırıq.

Zöhrab Təmrazov