Samuxda əkin sahələri Gəncədən axıdılan çirkab suları ilə suvarılır. Artıq bir neçə ildir ki, bu problemə dönə-dönə toxunsaq da, hələ də əməlli-başlı bir addım atan yoxdur. Samux ərazisində yaşayan sakinlər, eyni zamanda mətbuatı izləyənlər də yəqin bilirlər ki, artıq bir neçə, bəlkə də on ilə yaxın bir müddətdir ki, Samuxun Gəncəyə yaxın kəndlərində əkin sahələri, meyvə bağları, eyni zamanda Göygöl rayonunun toxumçuluq sovxozuna məxsus ərazilərin bir hissəsi, təqribən 400 ha günəbaxan plantasiyaları, Gəncədən axıdılan kanalizasiya suları ilə suvarılır. Bu şəhərin ərazisindən keçən "Xan arxı"nın suyu adı altında suvarılan əraziləri, əsasən Samuxun Sərkar, Kolayır, Ziyadlı, o cümlədən İstixana qəsəbəsinin əkin sahələri və meyvə bağlarıdır. Gəncədən Samux istiqamətinə axıdılan çirkab sularının təmizlənmə ərazisinin istismara yararsız halda olması, həmin ərazidə yaşayanların bildirdiklərinə görə, ərazidə gözətçi işləyən Yadigar Musayevin yamança karına gəlib. Hər hektarı 20 manatın müqabilində çirkab suları ilə suvarılan əkin sahələrinin məhsullarını alıb, ondan qida məhsulu kimi istifadə edən xalqın "yaşıl soyqrım”a məruz qalması, nə həftəboyu kəndlərdə qəbul keçirməklə məşğul olan Samux rayon İcra hakimiyyətinin başçısı cənab Alı Qocayevi, nə Ekologiya və Təbii Sərvətlər Nazirliyinin Qərb zonası üzrə rəsmilərini, nə də ki, Samux rayon Sukanal idarəsinin rəhbərliyi ilə bərabər, kənd icra nümayəndələrini də heç cür narahat etmir.



Gəncənin təqribən 3-4 kilometrliyində yerləşən və ərazi baxımından hal-hazırda Gəncəyə, balans baxımından isə, Samux rayon Sukanal idarəsinin balansında olan "çirkab sularının təmizləmə qurğuları" adlanan ərazidə olduqda görünən mənzərə belə oldu; 60-cı illərdə təməli qoyulub Gəncədən axıdılan çirkab sularının təmizlənməsi üçün nəzərdə tutulan qurğulara gedən kanalları ot basmış, hətta uzun müddət baxımsızlıq ucbatından ağac bitən böyük bir ərazidə qaz, ördək otaran gözətçi Yadigar Musayevin çirkab suları hesabına varlanması, Samux və Goygöl rayonlarının ərazilərindəki əkin sahələrinə çirkab sularını satması, heç də həmin ərazilərdə yaşayanlara sirr deyil. Aidiyyəti qurumların, ələlxüsus da yerlərdə ölkə başçısı səlahiyyətlilərinin bu qədər ciddi bir məsələyə göz yummaları, hələ də müəmmalı olaraq qalmaqdadır.



Əldə etdiyimiz məlumatlara görə, Yadigar Musayevin bu cür özbaşınalığı heç də elə-belə deyil. Yəni, onu Samux rayonu Qarayeri qəsəbəsinə gedən yolda yerləşən və çirkab sularının təmizlənməsi qurğuarının (bəzən onu fəaliyyəti dayandırılmış tullantı zavodu da adlandırırlar) direktoru kimi də tanıyırlar. Məsələ ilə bağlı Samux rayon Sukanal idarəsinin müdiri cənab Süleyman müəllimlə əlaqə saxladıqa o, "ölkədə yiyəsizlikdir "dedi. Su kanal idarəsindən ayda 130 manat məvacib alan, 2-3 avtomobilə sahib olan gözətçi Yadigar Musayevi əvəz etməyə, hələlik kadr tapmadığını da bildirir. Problemin olduqca təhlükəlilik kəsb etməsi və hələlik də həllini tapmamasının səbəbi ondan ibarətdir ki, Samux rayonu göy-göyərti, meyvə-tərəvəz yetişdirilən rayon olaraq uzun müddətdir ki, Azərbaycanda, ələlxüsus da Gəncə və Bakı sakinlərini "yaşıl soyqırim”a məruz qoyması, kimlərəsə sərf edir.
Mövzuya qayıdacağıq





Mehriban Əzizqızı

gundemxeber.az