Bərdənin icra başçısı son sınaqlardan uğurla çıxa bilməyib, qohumlarının ailə-klan hakimiyyəti isə rayonu çapıb talayıb; 5 ildə viran qoyulan rayondan şok faktlar və rəqəmlər Gündəm-xəbər”də

Bərdənin icra başçısı son sınaqlardan uğurla çıxa bilmədi. Vidadi İsayev cəbhə xəttində baş verənlərlə bağlı olduqca soyuqqanlı, laqeydlik nümayiş etdirdi. Bu da mərkəzi dairələr tərəfindən təqdir olunan hal deyil.

Cəbhə bölgəsinin digər regionlarının icra hakimləri fəallıq etməyə çalışdılar. Ən azı ictimaiyyətin qarşısına çıxdılar. Eyni sözləri Bərdə rəhbərliyi haqda demək çətindir. Əksinə, V.İsayev illərdir Bərdənin stadionundakı zirzəmidə yaşayan ailələrin problemləri ilə maraqlanmır.

Ört-basdır siyasəti

Əksinə, vəzifə səlahiyyətindən istifadə edərək biznes imkanlarını genişləndirməyə fürsət tapıb. Bütün bu sadalananlar işin xülasəsidir və icra başçısının biznes fəaliyyəti haqda aşağıda daha ətraflı oxumaq imkanı olacaq.

Ancaq buna qədər bir neçə yeni xəbəri bölüşmək zərurəti yaranıb. “Gündəm-xəbər”ə gələn məlumatlarda iddia olunur ki, V.İsayev də ümidləri doğrultmayıb. Onun artıq işdən çıxarılmış Laçın, Cəbrayıl, Salyanın icra başçıları ilə eyni cərgədə olduğu bildirilir. Əldə etdiyimiz bilgilərə görə, hazırlanan siyahıda V.İsayevin də adı qırmızı xətlə keçir.

Bərdə rəhbərinin geridə qalan dövrdə adı yalnız işdən çıxarılmış həmkarları kimi kommersiya işlərində hallanıb. Hətta bu faktların ört-basdır edilməsi naminə bəzi media orqanları ilə əməkdaşlıq olunur. Hazırda bir neçə xəbər portalları V.İsayevin fəaliyyətini işıqlandırır, piar kampaniyası qurur.

“Gündəm-xəbər”ə o da qeyd olunur ki, məqsəd ifşaedici materialları yaymamaqdır. İcra başçısı və qohumlarının ailə-klan hakimiyyəti yaratması Bərdədə ciddi narazılıq yaradıb. Bu şikayətlər isə mətbuatda ictimailəşir. V.İsayev isə çıxış yolunu reklamda görüb.

Kadrların şok siyahısı

Ölkə rəhbərliyinin etimadını doğrultmadıı deyilən icra başçısına deputat Çingiz Qənizadənin açıqlaması da ismarıc ola bilər. Millət vəkili bildirmişdi ki, prezident həmin yazılardan sonra icra başçılarını işindən azad etdi. Deputat çox güman ki, son sərəncamları nəzərdə tutub. Bu isə öz növbəsində Bərdə rəhərliyinə ünvanlanan gizli mesaj da ola bilər. Elə isə faktlara gəlin nəzərə salaq:

“Gündəm-xəbər”ə Bərdə rayonunun bir qrup ziyalıları tərəfindən rayonda baş alıb gedən haqsızlıqlar və qanunsuzluqlar barədə müraciət daxil olub. Prezidentə ünvanlanan məktubda deyilir: “Belə ki, rayona İcra Hakimiyyətinin başçısı kimi gələndə özü ilə Tərtər rayonundan İsmayılov İskəndəri sənədlərlə iş şöbəsinə müdir, Tərtər rayonundan Bəylərov Zauru köməkçi, (indi Ərazi idarəetmə orqanları ilə iş şöbəsinin müdiridir), Zaurun qayınatasını komendanta nəzarətçi və qayınanasını özünə yemək bişirən, Zərdab rayonundan qayını Bünyatov Çingizi isə özünə sürücü, Yevlax şəhərindən Fərzəliyev Əlini şəhər təsərrüfatı üzrə nümayəndə gətirmişdir.

İcra Hakimiyyətinin Hüquq şöbəsinə məsləhətçi vəzifəsinə Salyan rayonundan öz bacısı oğlu Səfərov Natiqi, Sənədlərlə iş şöbəsinə məsləhətçi vəzifəsinə Yevlax şəhərindən Səttarov Mübarizi, Sənədlərlə iş şöbəsinə Şəhər İcra

Nümayəndəsinin oğlu Fərzəliyev Fəridi gətirmiş, Telekommunikasiya Qovşağına müdir vəzifəsinə Yevlax şəhərindən Şirinov Nazimi, Əhalinin Sosial Müdafiəsi Mərkəzinə direktor vəzifəsinə Yevlax rayonundan Məmtiyev Raqufu, Mənzil İstismar Kontorunun müdiri vəzifəsinə Tərtər rayonundan olan Pənahov Raufu, Bərdə Su-kanal idarəsinin müdiri vəzifəsinə Goranboy rayonundan olan Zamanov Vilayəti, Bərdə Ərazi Yer Quruluşu idarəsinin rəisi vəzifəsinə Tərtər rayonundan olan Cəfərov Təbibi, Torpaq şöbəsinin müdiri vəzifəsinə Salyan rayonundan Şirinov Yaşarı, Bərdə Loqistik kübrə bazasına Yevlax rayonunda işdən qovulmuş Rüstəmov Sürəddini təyin etdirmişdir.

Siyahını yenə uzatmaq olar. Dəhşət ondan ibarətdir ki, onun özü ilə gətirib təyin etdiyi adamlar heç nəyə yaramayan adamlardı. Sanki V.İsayev Bərdəyə gələndə and içib ki, rayonda bir nəfər də olsun savadlı və qabiliyyətli yerli kadr qoymayacam”.

Şadlinskaya problemi

Son aylar Bərdə rayon icra başçısı Vidadi İsayevin ətrafında yaranmış problemlər səngimək bilmir. İcra başçısı xasiyyətcə yumşaq biri olsada ətrafında daha sərt məmurların olması və anlaşılmazlıqların baş verməsi Vidadi İsayevin özünü çətin vəziyyətə salıb.

Bərdə icra başçısının əsas problemlərindən biri onun müavini – ictimai-siyasi və humanitar məsələlər şöbəsinin müdiri Fəqət Şadlinskayadır. Bərdədə hər kəs icra başçısının Şadlinskyanı nəyə görə müavin vəzifəsinə gətirməsini yaxşı bilir.

Ancaq son aylar Fəqət Şadlinskya ilə Vidadi İsayevin digər yaxın adamı olan, keçmiş köməkçisi hazırda icra hakimiyyətində Ərazi idarəetmə və yerli özünüidarəetmə orqanları ilə iş şöbəsinin müdiri vəzifəsini daşıyan Zaur Bəylərovla ciddi probleminin olduğu deyilir.

Bundan başqa, icra başçısı rayonda ümumi sahəsi 36 hektar olan Heydər Əliyev Parkı inşa etdirib. Daha doğrusu, dövlət büdcəsindən bu parkın salınmasına milyonlarla vəsait ayrılıb. Lakin bütün buna baxmayaraq, icra başçısı camaatın boynuna minnət qoyur ki, guya, bu işləri öz şəxsi imkanları hesabına həyata keçirib.

Dövlət büdcəsindən pul ayrılmasına baxmayaraq, Vidadi İsayev rayondakı bütün məmurlardan həmin parkın tikintisi üçün 10 min manat pul tələb edib. Vidadi İsayevin bu hərəkətlərinə etiraz edə bilməyən məmurlar da məcburiyyət qarşısında qalaraq, borca, faizə və kreditə pul götürərək icra başçısının tələbini yerinə yetiriblər. Artıq iş işdən keçib və İsayev bir dəfə bu şəkildə varlanıb.

“Təchizat BCS" MMC oyunları

İcra başçısı həmin parkda oğlu üçün dəyəri 100 min manat olan "Ana və Uşaq" kafesi inşa etdirib. Bu kafenin tikilib başa gəlməsi üçün bütün məmurları sıxışdıran Vidadi İsayev qarşı çıxanları sərt şəkildə cəzalandırıb.

Amma İsayev təkcə oğlunu deyil, kürəkənini də yaddan çıxarmayıb. Belə ki, o, bir müddət əvvəl tikilərək istifadəyə verilmiş qaçqın şəhərciyində kürəkəni üçün ümumi sahəsi 100 kv.metr olan dükan tikdirib.

Məsələn, onun dəftərxana ləvazimatlarının satın alınması adı altında büdcədən ayrılmış 8190 manatı hara xərclədiyini özündən başqa kimsə bilmir. Bərk inventarların satın alınması üçün ayrılmış 11250 manatın da aqibəti məlum deyil.

Həmçinin ehtiyat hissələrinin satın alınması məqsədi ilə ayrılmış 3150 manat və sair xərclər maddəsi uzrə malların (işlərin və xidmətlərin) satın alınmasıı üçün ayrılmış 2160 manat da icra başçısının zavalına gəlib. Maraqlıdır ki, bu pulsilmə əməliyyatlarının böyük qismi "Təchizat BCS" MMC şirkətinin əliylə həyata keçirilib.

İddia edirlər ki, Vidadi İsayev özünə kiçik bir yaddaş kitabçası açıb və orada məmurların həyata keçirdiyi maxinasiyalar son qəpiyinə kimi qeyd olunub. Məhz icra başçısı idarə müdirlərinin ayda nə qədər qazanc əldə etdikləri hər kəsdən yaxşı bilir.

2011-ci ildən Bərdə rayonuna başcı gələn Vidadi İsayev rüşvətxorluğun baş alıb getdiyi bir vaxtda hecnə olmamış kimi rəhbər olduğu rayonda şəxsi maraqlarını və biznesini daha da genişləndirmək ücün vəzifə salahiyyətindən lazımınca istifadə edib. Bu barədə ölkə mətbuatında kifayət qədər faktlara əsaslanan məlumatlar yayımlanıb.

Prezidentə yalanlar

Hətta rayonda iş adamlarını qanunsuz yollarla sixişdıraraq " burda mənəm bağdad da kor xəlifə" prinsipini həyata keçirir. Əslində Vidadi İsayevin əməlləri ölkə prezidenti İlham Əliyevin yürütdüyü siyasətlə uyğunlaşmır. Təkcə 2011- 2014 -cü illərin yekunları ilə əlaqədar V.İsayevin hesabatlarından:

Şəhərin mərkəzi küçələrində 185,0 min kv metrdən çox hasar hörüldüyü, 129,4 min kv metr aqlay, 50,0 min kv metr suvaq vurulduğu, 73,6 km dəmir-beton, 2460 p/m qranit bordyor düzüldüyü, 12,2 min kv metr qranit üzlük çəkildiyi, 172,2 min kv metr tamet döşəndiyi, Şəhərin prospekt və küçələrinə 110,2 min kv metr asfalt qoyulduğu, müasir üslubda 44,8 min kv metr dam örtüyü vurulduğu göstərilmişdir. Aparılmış hörgülərə 3,6 milyon ədəd mişar daşı, 60,0 min kub metrdən artıq qum – çınqıl işlənildiyi bildirilmişdir.

V.İsayev hesabatlarında şəhərin küçələrinə 185,0 min kv metr hasar hördüyünü göstərmişdir. Bu hündürlüyü iki metr olan 92,0 km divar deməkdir. Bakı və Koroğlu küçələrinin (5,8 km) Bayraq meydanından başlayaraq dairəvi olaraq çaylaq daşından hörgü ilə hasara alındığını həzərə alsaq, başqa bir mənzərə ilə üzləşərik.

Onda belə çıxır ki, Bərdə şəhərinin heç bir küçəsində hasar olmamışdır. Eyni zamanda 76,1 km bordyor düzdüyünü, 172,2 min kv metr tamet döşəndiyini və 44,8 min kv metr müasir dam örtüyü vurulduğunu bildirmişdir.

Deməli, hesabatlardan belə görünür ki, şəhərin mərkəzi hissəsində nə küçə səkiləri və səkilərin “bort” daşları yox imiş. Sən demə şəhərdə olan kommunal binaların damları örtüksüz olublar. Əgər şəhərdə olan bütün inzibati və kommunal binaların hamısının dam örtüyünü dəyişsəydin belə, yenə də onun hesabatlarda göstərdiyi kimi 44,8 min kv metr ola bilməzdi. Göstərilənlərdən belə nəticəyə gəlinir ki, V.İsayev bilə - bilə görülmüş işləri qəsdən şişirtmiş, bununla da öz şəxsi maraqları naminə dövləti və ictimaiyyəti aldatmışdır.

İsayev kimdir?

Qeyd edək ki, İsayev Vidadi İsa oğlu 18 aprel 1959-cu ildə Ermənistan SSR-nin Əzizbəyov rayonunun Artavan kəndində anadan olub. 1980-ci ildə Azərbaycan Pedaqoji İnstitutunu (indiki ADPU) bitirib. 1980-1985-ci illərdə Ağdaş rayon Qaradeyin kənd orta məktəbində tarix müəllimi, 1986-2004-cü illərdə Mərkəzi Dövlət Arxivinin Yevlax filialının müdiri, 2004-2005-ci illərdə Yevlax Şəhər İcra Hakimiyyəti başçısının təhsil, səhiyyə və mədəniyyət üzrə müavini, 2005-2011-ci illərdə Tərtər rayon İcra Hakimiyyətinin başçısı vəzifələrində çalışmışdır.

Azərbaycan Respublikası Prezidentinin 3 mart 2011-ci il tarixli Sərəncamı ilə Bərdə Rayon İcra Hakimiyyətinin başçısı təyin edilmişdir. Yeni Azərbaycan Partiyasının üzvüdür. Tarix elmləri namizədidir. Ailəlidir, üç övladı var.

P.S. Bu iddialarla bağlı RİH-nin mövqeyini çap etməyə hazırıq.

Rafiq Qara