Mübariz Ağayevin qohum-qardaşı və adamları Göyçayda dövlətin sütunlarını dağıdır, büdcə pullarını pay-püş edir; rayon rəhbərinin talan siyasətinin müdhiş statistikası və təfsilatı “Gündəm-xəbər”də...

Göyçayın bəxti icra başçısı sarıdan gətirməyib. Rayona rəhbərlik edənlər bölgəni viran qoyub gediblər. Mübariz Ağayev də Göyçayda əvvəlki bölgələrdəki işini davam etdirir. “Gündəm-xəbər”ə verilən məlumata görə, icra başçısının əsas iş prinsiplərindən biri bəzi mətbuat orqanları ilə dostluq etmək olub.

Bu məqsədlə bəzi xəbər portallarına dəstək verməklə barəsində həm tərifli yazılar yazdırır, həm də ondan tənqid yazanlarla dostları hesabına dil tapmağa çalışır. M.Ağayev maksimum çalışır ki, ondan şikayətlər getməsin.

Amma fakt ondan ibarətdir ki, Göyçayda saysız-hesabsız şikayətlət ünvanlanır. Bu narazılıqların əsasını sosial problemlər və icra başçısının ətrafındakı kadrlar təşkil edir.

Mənsur Məmmədovun zülmündən qurtulmuş göyçaylılar ümid edirdi ki, təzə icra hakimi müəyyən müsbət işlər həyata keçirəcək. Lakin sakinlərin gözləntiləri suya düşüb. M.Ağayev və komandası Göyçaya yalnız problem gətirib.

Və ən əsası icra başçısı özünə tələm-tələsik malikanə tikdirməyə başlayıb. “Gündəm-xəbər”ə daxil olan məlumata görə, rayonun Hüngütlü kəndində villa tikdirən icra başçısı nəqliyyat naziri və sələfi ilə qonşu olub. Dəbdəbəli evə külli-mqidarda pul xərclənib. M.Ağayevin Mingəçevir, Quba rayonlarındakı biznesindən gələn vəsait onun Göyçayda da imarət ucaltmasına imkan yaradıb.

Beləcə, Göyçayın problemləri qalıb bir kənara, icra hakimi öz şəraitini yaxşılaşdırmaq barədə düşünür. Halbuki, prezident icra başçısı təyin edərkən xalqla işləməyi tapşırdığını bildirib. Görünən odur ki, M.Ağayev üçün ölkə başçısının tapşırığı quru sözdən ibarətdir. Göyçayın 2015-ci ilə aid hesabatına nəzər yetirdikdə də icra başçısının hər hansı ili nəzərə çarpmır.

Rayonda 248,6 milyon manatlıq ümumi məhsul istehsal edilib, rayonun iqtisadi və sosial sahələrinin inkişafı üçün bütün maliyyə mənbələrindən 33,4 milyon manatlıq investisiya qoyulub.

Kənd təsərrüfatında məhsul istehsalının həcmi artaraq 98,2 milyon manata çatıb. İndi isə eyni sahələr üzrə 2014-cü ilin məlumatlarına diqqət edək: Hesabat ilində rayonda ümumi məhsul buraxılışının həcmi 2013-cü ilə nisbətən 12,4 faiz artaraq 254 milyon manat olub.

Göründüyü kimi, rayon üzrə ümumi məhsul istehsalında 6 milyon manatlıq azalma müşahidə olunub. Ağayevin kənd təsərrüfatı üzrə məhsul istehsalındakı artıma da rəqəmlərdə nəzər yetirək. 2015-ci ildə bunun 98,2 milyon manat olduğu deyilir.

2014-cü ildə isə Rayonun kənd təsərrüfatında ümumi məhsul istehsalının həcmi 2,0 faiz artaraq 97,3 milyon manata çatıb. Özündən əvvəlki icra başçısının 2 faizlik artımı, Ağayev 0,9 faizlik artımla davam etdirib. Bu iqtisadi göstəricilərlə Göyçayın inkişaf etdiyini deyən icra başçısının tərəqqisi özünə kənddə villa tikdirib oliqarx-məmurlara qonşu olmaqla ölçülür. Rayon sakinlərinin isə içməli su problemindən tutmuş torpaq sahələrinin ələ keçirilməsinə qədər uzanır.

Göyçayda sosial müavinətlərin varlılara çatması, iş adamlarına divan tutulması, sahibkarlardan xərac yığılması, səhiyyə və təhsil ocaqlarında hökm sürən dərəbəylik, özbaşınalıq, son olaraq Göyçay ƏSMM-də rüşvət videosunun internet resurslarında yayılması deməyə əsas verir ki, Göyçay korrupsiyalaşmış

regionlardan birinə çevrilib. Hələ bu azmış kimi iqtisadi böhrandan çıxmağa çalışan icra başçısı məmurlara məcburi pambıq belə əkdirir.

Göründüyü kimi, 2015-ci ildə Göyçayda bütün sahələr üzrə geriləmə faktının qarşısında iqtisadi inkişafdan danışmaq gülüncdür. Eyni zamanda apardığımız araşdırmalar göstərir ki, Mübariz Ağayevin bir illik rəhbərliyi dönəmində Göyçay sosial-iqtisadi cəhətdən iflic vəziyyətə düşüb.

Belə ki, M.Ağayevin iş adamlarına qarşı repressiv tədbirləri, qardaşının adı ilə bağlı qalmaqallar haqda mediada çoxsaylı məlumatlar yayılıb. Bu xəbərlər mərkəzi dairələrin də diqqət mərkəzində olub.

Prezident dəfələrlə bəyan edib ki, məmurlar və yaxınları, o cümlədən övladları harınlıq, qudurğanlıq etməməlidir. Amma M.Ağayevin qardaşının arxayın şəkildə özünü aparması və müxtəlif qanunsuz işlərdə adının çəkilməsi onu narahat etmir.

İcra başçısı rayonun abadlaşdırılması üçün bir neçə məmuru əziyyətə salıb. Göyçay Təhsil Şöbəsinin müdiri Asif Nəbiyev, rayon Mərkəzi Xəstəxanasının baş həkimi Famil Zeynalov, Mədəniyyət və Turizm Şöbəsinin müdiri Sahib Şükürov maxinasiyalarda mahir kadrlar hesab olunur.

Bir qayda olaraq büdcə vəsaitlərinin silinməsi üçün bu üç büdcə təşkilatından yararlanırlar. Lakin bu dəfə Göyçay rayon İcra Hakimiyyətin başçısı Mübariz Ağayev bu üç büdcə təşkilatının rəhbərlərini özünəməxsus şəkildə cəzalandırıb. Onlar bir neçə icra başçısını yola salıb. Amma Ağayevin gəlişi onlara baha oturub. Hələ ki bu məbləğ açıqlanmır.

İxtisasca texnoloq olan Mübariz Ağayev Azərbaycanda "yaşlı” İH-i başçılarından hesab olunur. Ümumilikdə 4 rayona üst-üstə 10 ildir ki, rəhbərlik edir. 2006-cı ildə doğulduğu Göyçay rayonunun RİH-nin başçısı təyin olunan Mübariz Ağayev sonradan Mingəçevir və Quba rayonlarına rəhbərlik edib. Ötən ilin ilk ayında isə yenidən Göyçay RİH-nə başçı təyin olunub. Mübariz Ağayevin indiyədək başçı işlədiyi bütün rayonlarda ciddi korrupsiya hallarına yol verilib.

Bu gün də RİH-nin başçısı olduğu Göyçayda Mübariz Ağayevin rəhbərliyi altında korrupsiya və rüşvətxorluq "uğurla” davam etdirilir. Mübariz Ağayev o tip RİH-nin başçılarındandır ki, işlədiyi rayonda öz adına heç vaxt mülk olmaz.

Təkcə Qubada işləyərkən yaratdığı 1200 başlıq qoyun fermasından başqa. Məlumata görə, Mübariz Ağayev yenidən Göyçaya başçı təyin olunandan sonra bu qoyun fermasının sayını ciddi azaldıb. Mübariz Ağayevin əsas mülkü paytaxtdadır.

Məlumatda deyilir ki, Bakının ən bahalı və prestijli yerlərindən sayılan "Varovski”də Mübariz Ağayevin qiyməti 2 milyon manatdan artıq olan 3 mərtəbəli mülkü var. Bundan əlavə olaraq BDU-nin yeni korpusunun yanında inşa edilən "novostroyka”da 300 kvadrata yaxın olan mənzilinin olduğu deyilir.

Göyçay rayonunda rəsmi olaraq başqa insanların adına sənədləşdirilən, əslində isə Mübariz Ağayevə məxsus olan onlarla mağazalar, iaşə obyektləri və şadlıq evi var. Bütün bunlar əksər Göyçaylıya gün kimi aydındır.

Mübariz Ağayevin əsas "gəlir mənbəyi”ndən biri də rayonda vəzifələrin satışıdır. Deyilənə görə, Göyçay rayonunda kənd icra nümayəndəliyi postu inzibati ərazinin iqtisadi göstəricilərindən asılı olaraq 5000 -15000 manat arasında satılır. Bundan əlavə olaraq Mübariz Ağayev əslində müstəqil fəaliyyət göstərməli olan rayon ərazisindəki bütün bələdiyyələrə də "haqq” təyin etdiyi deyilir.

Mübariz Ağayev RİH-nin başçısı kimi tabeçiliyində olan işçilərə nümunə ola bilmədiyi kimi görünür qohumlarına da yaxşı nümunə ola bilməyib. Buna missal olaraq Ucar rayonu Ş.İ.Xətai küçəsi ev 70 sakini 2-ci qrup əlil, albinizm xəstəsi Ələkbərov Ələkbər Muxtar oğlunun ötən ay mətbuata etdiyi müraciəti göstərmək olar.

O, müraciətində bildirib ki, Göyçay Rayon İcra Hakimiyyətinin başçısı Mübariz Ağayevin qardaşı, 36 saylı Tibbi Ekspert Komissiyasının sədri Mühakim Ağayev ondan rüşvət istəyib: "Göyçay rayon İcra

Hakimiyyətinin başçısı Mübariz Ağayevin qardaşı 36 saylı Tibbi Ekspert Komissiyasının sədri Mühakim Ağayev 2-ci qrup əlilliyimi 1-ci qrup edilməsi üçün məndən rüşvət istəyir.

Hansı ki mən anadan olandan albinizm xəstəsiyəm, uzun illərdi 2-ci qrup əliləm, hazırda 65 yaşım var, gözlərim demək olar ki, tamam görmür. Albinizim xəstələri anadan olandan əlil hesab edilirlər. Sevindim ki, əlillik dərəcəsinin təyin edilməsi üçün Əmək və Əhalinin Sosial Müdafiəsi Nazirliyinin yaratdığı komissiyadan yoxlamadan keçəcəm və obyektiv qərar veriləcək. Ancaq 36 saylı TSEK-in sədri Mühakim Ağayev burada öz arşını ilə bez ölçür. Belə ki, buna da mənim maddi imkanım yoxdur ki, ona istədiyi rüşvəti verim".

Bundan əlavə, Mübariz Ağayevin qardaşı oğlu rayon Olimpiya İdman Kompleksinin müdiri vəzifəsində çalışır. O, kompleksdə rəhbər olduğu vaxtdan burada qanunsuzluqlar baş alıb gedir. Belə ki, rayondakı Olimpiya Kompleksinin zalları müxtəlif şəxslərə icarəyə verilib. Pulsuz məşq etməli olan idmançılardan belə, hər ay pul tələb olunur.

O, hələ keçmiş icra başçısı Mənsur Məmmədovun vaxtında da Kompleksdə özbaşınalıq edib. Ancaq rayon icra başçısı Mübariz Ağayev gələndən sonra sanki kompleks onun şəxsi obyektinə çevrilib və buradan öz mülkiyyəti kimi istifadə edir. Mənbənin iddiasına görə icra başçısının qardaşı oğlu kompleksdəki idman zallarını ayrı-ayrı sahibkaralara icarəyə verərək bu yolla pul qazanır.

Digər bir problem isə buradakı internat məktəblə bağlıdır. Əsasən kimsəsiz və əlil uşaqlar üçün nəzərdə tutulan və nüfuzlu ictimai təşkilatların himayəsində olan Göyçay internat-məktəbinə Mehman Salmanov rəhbərlik edir.

Daha dəqiq desək, rəhbərlik etmir, çapıb-talayır. Aztəminatlı ailələrin uşaqları üçün dövlət tərəfindən verilən müavinətlər təyinatı üzrə çatmır. İnternat direktoru Salmanov bu işdə öz vasitəçilik funksiyasını yerinə yetirmir, əmanətə xəyanət edir. Kağız üzərində qeydiyyatda 350 uşaq olsa da, gün ərzində 80-100 nəfər, yay mövsümündə isə daha az uşaq məktəbdə olur və qidalanır.

gundemxeber.az