Elmira Yusifova: “Hörmətli Mehriban xanım Əliyevanın şəxsi təşəbbüsü ilə, Bakı və Sumqayıt şəhərlərində oniki ilə yaxındır ki, inklüziv təhsil sistemi tətbiq edilib”
İnklüziv təhsil, xüsusi qayğıya ehtiyacı olan uşaqların ümumi təhsil müəssisələrində sağlam uşaqlarla birgə təhsil almasıdır. Bu proqram fiziki və əqli cəhətdən qüsurlu olan uşaqların öz potensiallarına nailolma imkanını dəstəkləyir. Bu təhsil sistemi xüsusi qayğıya ehtiyacı olan uşaqlarda özünə inamı artırır və digər normal uşaqlarla bərabərhüquqlu olmasını təmin edir.
Ölkəmizdə sağlamlıq imkanları məhdud təhsil ocaqlarında uşaqların dövlət qayğısı ilə əhatə olunması məqsədilə, “Heydər Əliyev Fondu”nun Prezidenti, YUNESKO və İSESKO-nun xoşməramlı səfiri, ölkəmizin birinci xanımı, hörmətli Mehriban Əliyevanın şəxsi təşəbbüsü ilə, Bakı və Sumqayıt şəhərlərində oniki ilə yaxındır ki, inklüziv təhsil sistemi tətbiq edilib. Sumqayıtda inklyuziv layihə 4 və 11 saylı orta məktəblərdə və bir neçə uşaq baxçalarında, bugünkü günə kimi özünü doğrultmaqla fəaliyyətini davam etdirməkdədir.
Sumqayıt şəhər 11 saylı tam orta məktəbə yeni direktor təyin edilmiş Roza Babayeva inklyuz layihədə çalışan 28 nəfər işçiyə şifahi şəkildə bildirib ki, Sumqayıt şəhər təhsil şöbəsinin yeni müdiri Ruhiyyə Tağıyevanın tapşırığı əsasında, layihə 15 sentyabr 2016-cı il tarixdən bağlanır, gedin özünüzə yeni iş yeri tapın. Sizin əmrləriniz düzgün verilməyib, əmriniz qeyri-qanunidir, ştatda yalnız beş iş yeri var.
Əvvəla, bu layihədə ən az stajı olan altı ildir. Əmrlərimiz qanunsuz verilibsə Təhsil Nazirliyi VƏ Sumqayıt şəhər təhsil şöbəsi vaxtında bunları görmürdümü? Biz nə kadrlar, nə də hüquq şöbəsinin işçiləri deyilik ki, işə qəbul ediləndə idarənin ştatı ilə tanış olaq. Sıravi müəllimlərik, illər öncə əmrlə işə qəbul edilmişik. On ildən çoxdur ki, burada işləyirik və ötən illər ərzində də, məktəbin fəaliyyəti müxtəlif komissiyalar tərəfindən dəfələrlə yoxlanılıb.
Ruhiyyə Tağıyeva Sumqayıt şəhər təhsil şöbəsinə müdir təyin olunduqdan sonra kəşf etdi ki, sən demə on il bundan əvvəl verilmiş əmrlər qanunsuz imiş ?!
İkincisi, uşaqların sayı getdikcə çoxaldığına və əlavə müəllim köməkçilərinə ehtiyac olduğuna görə, bu layihəni bağlamaq, işçilərin saylarını azaltmaq ən azından qəbahətdir.
Ölkəmizin birinci xanımı hörmətli Mehriban Əliyevanın şəxsi təşəbbüsü ilə açılmış bu layihəni bağlamağa və ya müəllim saylarını azaltmağa kimlərin cürət etməsi, hələ də bizə qəribə gəlir.
Dövlət başçısı möhtərəm İlham Əliyev cənabları, ölkəmizdə işsizliyin ləğvi istiqamətində mühüm göstərişlər verir, iş yerlərində ixtisarların yolverilməz olunduğu da dilə gətirir.
Gənc nəslin nümayəndələrinə geniş imkanların yaradılması, artıq dövlət siyasətimizin tərkib hissəsinə çevrildiyi bir zamanda, Təhsil Nazirliyinin və Sumqayıt şəhər Təhsil Şöbəsinin 23 nəfəri işsiz qoymasına nə ad vermək olar ? Bu sosial durumu onsuz da ağır olan sumqayıtlılara böyük bir zərbə deyilmi? Bir tərəfdən bu layihədə çalışanların sayını azaltmaq istəyirlər, digər tərəfdən isə, təhsil naziri cənab Mikayıl Cabbarov “İbtidai təhsil səviyyəsi üzrə inklüziv təhsilin tətbiqi” layihəsi üzrə pilot məktəblərin müəyyən edilməsi barədə, 06 iyun 2016-cı il tarixli əmrinə əsasən 2016-2017-ci tədris-buraxlış ilində Nərimanov rayonu 202 nömrəli tam orta məktəb, Nizami rayonu 220 nömrəli məktəb-lisey, Xətai rayonu 138 nömrəli orta məktəb, Sabunçu rayonu 252 nömrəli məktəb-lisey layihə üzrə pilot müəssisələr müəyyən edilməlidir. 11 saylı məktəbdə vəzifəsi rəsmi əmrlə xadimə gedən, amma rus-dili, dərnək və s. fənlərindən dərs keçən müəllimlərə indi məlum olur ki, ştatda onların vəzifələri illərdir xadimə kimi sənədləşdirilib. Çünki, heç kimə əmək müqavilələrinin 1 nüsxəsi təqdim olunmur.
Bəyəm Sumqayıt şəhər təhsil şöbəsi və təhsil nazirliyi bunları görmürdümü? Təhsil Nazirliyinin məqsədi ixtisardırsa, o halda zəhmət çəksin də, hal-hazırda ali məktəblərdə dərs keçən və təqaüd yaşında olan müəllimləri işlərindən azad etsin.
Layihə tətbiq ediləndən Azərbaycan Respublikası Əmək Məcəlləsinin qanunlarına zidd olaraq, bugünkü günə qədər vəzifə təlimatı ilə rəsmi olaraq tanış edilməmişik. Vəzifə borclarımız və hüquqlarımız bizə izah olunmayıb. Əldə etdiyimiz məlumatlara əsasən, gün ərzində bizim iş saatımız 2-3 saat təşkil etməlidir. Amma, bütün bunlara baxmayaraq biz hər həftənin 6 gününü 6 saatdan da çox işləyirik. Bizimlə müqayisədə Bakı məktəblərində inklüziv layihənin müəllimləri 2-3 saat dərs deyirlər və bizimlə də eyni maaş alırlar. Bunlardan əlavə, ağır iş rejiminə görə bizim maaşımız digər müəllimlərlə müqayisədə bir qədər yüksək olub. Vaxtilə bizdən aşağı maaş alan müəllimlər, bilik və bacarıqlarının diaqnostik qiymətləndirilməsi üçün imtahan olunduqlarından maaşları artırıldı, hal-hazırda bizim maaşlarımızdan da daha yüksək oldu. Biz isə imtahan düşmədik, buna görə maaşlarımız da artırılmadı. Bunlardan əlavə, əgər təhsil nazirliyi ixtisar aparmaq istəyirsə, ilk növbədə ali məktəblərdə aparsın.
Sumqayıt şəhər 4 və 11 saylı tam orta məktəblərinin bir qrup müəllimləri adından

Elmira Yusifova

gundemxeber.az