Yerli məmurlar hansı maliyyə fırıldaqlarına əl atır?

"Yalan ayaq açar, amma ki, yeriməz". Bunu atalarımız deyim. Ancaq Saatlıda elə hadisələr baş verir ki, düzü, adamın bu atalar sözünə inanmağı gəlmir. Bunun da səbəb var.

Məsələ burasındadır ki, düz 20 ildən çoxdur Saatlı yalan və saxtakarlıq üzərində idarə olunur. Bunun bariz nümunəsi kimi ötən ayın 26-da keçirilən referendum zamanı baş verənləri göstərmək olar. Referendum zamanı 62 saylı Seçki Dairəsinin bir sıra məntəqələrində oldum. Komissiya üzvlərindən, müşahidəçilərdən və bir də icra hakimiyyəti tərəfindən təhkim olunmuş idarə müdirlərindən savayı məntəqələrdə gözə heç kim dəymirdi. Rayon sakinləri referendumu birmənalı olaraq baykot etsə də, günün birinci yarısı şəffaf qutular bülleteinlərlə doldurulmuşdu. Rayonun mərkəzi küçələrində qarşılaşıb söhbətləşdiyim şəxslərin demək olar ki, hamısı referendumla bağlı tam məlumatsız olduqlarını bildirirdi. Hətta elələri də olurdu ki, referendumla parlament seçkisini dəyişik salırdı.

38 saylı seçki məntəqəsindən çıxırdım ki, cavan bir oğlan ( hardasa 30 yaşlarında) mənə yaxınlaşıb soruşdu: "Əmi, bu nədi, deputat seçkisidi?" Bildirdim ki, referendum keçirilir, Konstitusiyaya dəyişiklik edirlər.


Məntəqələrdə müşahidə apararkən "arzuolunmaz şəxs" elan olduğum komissiyanın sədri və üzvlərinin baxışlarından hiss olunurdu. Komissiyanın üzvləri əsasən, müəllim və həkimlərdən ibarət idi. Onu da deyim ki, seçkilərin ilkin olaraq saxtalaşdırılmasında rayonun səlahiyyət sahibləri məhz bu iki zümrənin nümayəndələrindən gen-bol istifadə edirlər. Müşahidəçilərdə, idarə və təşkilatlarda çalışan işçilər idi. Həmişə olduğu kimi, onlarla söhbət əsnasında açıq bildirdilər ki, müşahidəçi vəsiqələri onlara icra başçısının ərazi üzrə nümayəndəliyi tərəfindən verilib. Özü də məcburi qaydada. Yazan da özləri, pozan da. İndi bir özünüz fikirləşin, belə olan halda hansı haqdan və ədalətdən danışmaq olar? Hələ Saatlını deyirəm. Hər kəs bilir ki, qara camaatı Konstitusiyada təsbit olunmuş hüquqlarından tamamilə məhrum edirlər. Hələ utanıb-çəkinmədən bir şoxları səsvermənin guya ki, demokratik və şəffaf keçirilməsindən dəm vururlar.

Saatlıda danışılası o qədər dərd var ki.. Məsələn, burada bazar yandı, yoxsa yandırıldı? Kiçik iş adamlarının yüz minlərlə malı külə döndü. Bazar əhlindən cəmi-cümlətanı bir nəfər səsini çıxarıb pulunu tələb etmişdi, onu da ki, 10 sutkalıq həbsə basdılar ki, başqalarına da dərs olsun. Rayonun səlahiyyət sahibləri olan məmur işbazların məntiqinə görə, onlar vətəndaşlara, nə istəsə edə bilər. Söyə, döyə, əmlaklarını əllərindən alıb, mülklərini isə başlarına uçurda bilər.


İnformasiya azadlığına qənim kəsilən Saatlı rayon maliyyə idarəsinin müdiri Namiq Bağırov "iti görüm, qurdu görüm, amma jurnalist tayfasını görməyim" deyir. Sözügedən bu şəxsin oturduğu binaya mühasiblərdən savayı, heç kim daxil ola bilməz. Qapının girişində dayanan mühafizəçilər və Əli adlı sürücüsü gələn mətbuat işçilərinə "müdir yerində yoxdur" deyib qapıdan qovur. Bilirsiniz nəyə görə? Çünki Namiq Bağırov qaranlıq otağında qaranlıq işlərlə rahatca məşğul olsun. Deyilənə görə, Namiq Bağırovun adı olub, özü olmayan 10-a yaxın kiçik müəssiəsi var. Və hər ay tək elə buradan yüz min pul götürür. Yaxşı, bəs görəsən idarə və təşkilatlara ayrılan pulların neçə faizi Namiq Bağırovun şəxsi büdcəsinə gedir. Bununla bağlı məlumatlarda deyilir ki, əvvəllər 50 faiz idisə, hazırda nə az nə də ki çox, düz 25 faiz Namiq Bağırov tərəfindən mənimsənilir. Namiq Bağırovun saxta sənədlər əsasında taladığı pullar tək bununla bitmir. 2010-cu ildən üzü bəri müəllimlərin adına məzuniyyət və ezamiyyə pulları yazaraq həzm-rabeidən keçirib. Halbuki müəllimlərin bundan xəbəri olmayıb. Yəni ki, müəllim işdə olduğu halda onu kağız üzərində məzuniyyətə çıxarıb, ezamiyyətə yollayırlar. Bir sözlə, Namiq Bağırov istədiyi hər şeyə sahiblənib. Bakıda ferması, obyektləri, şəraitli mənzilləri var və ildə 3 dəfə də Almaniyaya baş vurur. Rayondaxili küçə yollarının təmiri adı ilə 700 min manat pul silinərək müəmmalı şəkildə yoxa çıxıb.

Göründüyü kimi, pulu hər şeydən üstün tutan Namiq Bağırovun vecinə də deyil ki, qara camaat acından ölür, bank və kredit təşkilatları tərəfindən amansızcasına soyularaq dilənçi vəziyyətinə salınır.

Yaxu Şakir Həsənov olsun. İxtisasca aşpaz olsa da, Şakir Həsənov «AQROLİZİNQ» in lojistik bazasının rəhbəridir. İndi bir özünüz fikirləşin, aşpaz hara, «Arolizinq» hara? Bəli, rayonun səlahiyyət sahiblərinin nə qədər gülünc də olsa da, apardığı kadr siyasəti belədir. 10 ildən çoxdur ki, həmin bu Şakir Həsənov «Aqrolizinq»i azərbaycançılıqsayağı idarə edir. Dövlətin verdiyi texnikaların hamısını demək olar ki, özəlləşdirib. Azot və mineral kübrələr də silinərək satılır. Kəndlinin təsərrüfatı isə baxımsızlıqdan tənəzzülə uğrayıb. Bütün bunlar göz önündə olduğu halda yaltaq və məddahlar, eyni zamanda məmur işbazlar vicdan əzabı keçirmədən kənd təsərrüfatının inkişafından danışırlar. Torpaq sahələrinin suvarılmasında istifadə olunan su kanallarının nə vaxt təmizləndiyini xatırlaya bilmirəm. Bunu kimdən soruşdum, "gördüm" deyən olmadı. Sovet dövründə çəkilən kollektorlar da itib-batıb.

Su Təsərrüfat İdarəsinin müdiri Tahir Rzayevin başı ancaq özünün biznesinə qarışıb. Onun Araz çayında 2 qum karxanası, balıq gölü və s. var. İcra başçısının birinci müavini İlham Quliyev də hər qəbul günü icra hakimiyyətinə üz tutan vətəndaşların hərəsini bir bəhanə ilə yola salır. Saatlıya bir neçə nazir təşrif buyurub. Vətəndaşlarla görüş adı ilə. Nəqliyyat Naziri Ziya Məmmədov gəldi, yollar bağlandı. İcra hakimiyyəti binasının qarşısı polis qüvvələri tərəfindən mühasirəyə alındı. Bir nəfər belə sıravi vətəndaşı yaxın buraxmadılar ki, nazirə sözünü desin. Mədəniyyət və Turizm naziri Əbülfəz Qarayevin və Kənd Təsərrüfatı naziri Heydər Əsədovun da gəlişi heç nəyi dəyişmədi. Yığışdılar, yalan-palan rəqəmləri şişirib danışdılar və dağılışdılar. Gecənin bir aləmində min metrdən çox qaz borusu kəsilərək naməlum istiqamətə daşındı. Sanki heç nə olmayıb. Tənqid etmək və həqiqəti söyləmək isə qəbul olunmur. Saatlı reallığı bax, budur.


İlham SÜLEYMANOV