Adil Vəliyev seçki sınağından üzüağ çıxa bilmədi, MSK ən passiv dairəni bu rayon olduğunu açıqladı

Ölkə rəhbərliyinin narazı olduğu icra başçısı isə Bakıxanovu satıb varlanmaqda davam edir

Sabunçunun icra başçısının referendumdan “iki” qiyməti aldı. “Gündəm-xəbər”in məlumatına görə Adil Vəliyevin fəaliyyəti qənaətbəxş hesab olunmayıb.

Belə Sabunçu rayon I Seçki Dairəsi ən passiv yer kimi ad çıxarıb. Bu barədə rəsmi məlumat yayılıb.

Mərkəzi Seçki Komissiyasının rəsmi açıqlamasına görə, referendumda ən passiv 26 saylı Sabunçu I seçki dairəsi olub.

Bu məsələ yuxarı dairələrin diqqət mərkəzindədir. Xəbərə görə, A.Vəliyev qara siyahıya düşüb.

Ölkə rəhbərliyinin ondan narazı qaldığı iddia edilir. Onsuz da fəaliyyətindən tez-tez şikayətlər olan Sabunçu rayon icra başçısı referendum sınağından üzüağ çıxa bilməyib. A.Vəliyev nə qara dairəyə düşüb.

İcra başçısı referendum ərəfəsində təbliğat işini yaxşı təşkil etməyib, əhali ilə normal iş qurulmayıb deyə sonda MSK ən passiv yer Sabunçunu elan edib.

Ümumiyyətlə, referendum ərəfəsində təbliğat işini yaxşı təşkil etməyən və əhali ilə sıx təmas qurmayan icra strukturları cəzalandırıla bilər. Sabunçunun icra başçısı Adil Vəliyev və ətrafının passiv fəaliyyəti nəticəsində sözügedən dairə qara siyahıya düşüb. İcra başçısının rəhbəri olduğu rayonun seçki dairəsi MSK-nın ən narazı qaldığı sırada yer alıbsa, A.Vəliyevin karyerasına və reputasiyasına heç də xal gətirən hal deyil. Bütün seçkilərdə inzibati resurslarını səfərbər edən İH-ləri bu dəfə olduqca passivlik nümayiş etdirdi. Bu qeyri-fəallığın səbəbi açıqlanmasa da, icra başçılarında olan arxayınlıqla izah edilir.

Əsasən də regionlarda icra hakimiyyəti strukturlarında bir arxayınçılıq yaranmışdı ki, referendum hakimiyyətin istəkləri üzərində həyata keçiriləcək və nəticələr ictimaiyyətə bəllidir.

Gələn xəbərlərdə bu arxayınlığın bir sıra icra hakimiyyəti başçıları üçün yaxşı perspektiv vəd etmədiyi qeyd olunur. Bu eksperimentdən üzüağ çıxa bilməyən icra hakimiyyəti rəhbəri postunu itirə bilər.

Hazırda bir çox rayonların icra hakimləri prezidentə qarşı bu təxribatı dolayısı ilə reallaşdırmaqda davam ediblər. Onların sırasında istər paytaxt rayonlarının icra hakimlərini, istərsə də regionları sadalamaq olar.

Xüsusilə, il ərzində hakimiyyətin sabit siyasətini pozan və sosial gərginlik yaradan, əhali ilə iqtidarı üzbəüz qoyan, özbaşınalığına görə aksiyalara səbəb olan icra başçılarına qarşı həssas bir nəzarət var idi.

Onların referendumla bağlı hərəkətləri ciddi şəkildə izlənilirdi. Bu xüsusatda Sabunçu rayon icra başçısı da qeyd olunmalıdır.

Hakimiyyətə başağrısı yaratmış icra başçıları üçün referendum bir sınaq müddəti idi. Bu sınaq həm də onların kuratorlarına şamildir.

Eyni zamanda adı müxtəlif qalmaqallı hadisələrdə hallanan və barəsində tez-tez prezidentə şikayətlər ünvanlanan rayonların icra hakimlərini qeyd etmək olar.

Tənbəlliklə hökumətə xəyanət edən icra hakimiyyətləri il ərzində büdcədən taladığı vəsaitlərin bədəlini ödəyə bilər. Hər halda icra hakimlərini də belə həssas dönəmdə cəza gözləməkdədir.

Eyni zamanda Sabunçunun I dairəsindən deputat olan Fazil Mustafa üçün də ürəkaçan vəziyyət deyil. Səfəvilər tarixinə, toy-yas məclislərinin təşkili mövzularına başı qarışmış millət vəkili referendumla bağlı fəallıq nümayiş etdirmədi. Amma əsas diqqət Sabunçunun icra başçısına yönələ bilər. Çünki olduqca həssas bir dövrdə və mühüm bir səsvermədə adı qara dairəyə düşən A.Vəliyev indi dairədən çıxmağın yollarını fikirləşməli olacaq.

Onu da deyək ki, icra başçısı Bakıxanov qəsəbəsində satmadığı yer qoymayıb. Məlumata görə, Adil Vəliyev qəsəbənin daha iki massivini peşkəş edib. Hazırda həmin ərazilərdə tikinti işəri həyata keçirilir. Qəsəbənin “Kristal” şadlıq evinə yaxın ərazisində bir gecənin içərisində şumlanan ərazi tikinti meydançasına çevrilib.

İcra başçısı təyin olunduğu vaxtdan Bakıxanov qəsəbəsində kosmetik abadlıq işləri həyata keçirən biznesmen A.Vəliyev burada bir qarış yer saxlamayıb.

Belə ki, Bakıxanov stansiyası adlanan iri massiv satılaraq ərazidə ticarət mərkəzi inşa olunmaqdadır, səkilərin üstü obyektlərin tikintisi üçün qarış-qarış satılıb. İndisə “Aygün city” adlanan əraziyə çatmamış yol üstündə nəhəng ərazi buldozerin qabağına verilib. Burada ya bina ya da kommersiya mərkəzi tikiləcək. Bakıxanov qəsəbəsi Y.Əliyev küçəsibdə Geofizik İdarəsinin əraziləri qəsb edilib. Daha sonra qəsəbədəki Mədəniyyət küçəsindəki park hasarlanıb. “Şəhrizad” uşaq bağçası tikilib. “Vahid” şadlıq evinin yanındakı 9 mərtəbəli binanın həyəti, Zabrat yolunun qırağı, Sülh küçəsindəki kiçik parkın ərazisi, doğum evinin yanındakı parkın ərazisi və s. ərazilər artıq satılıb.

Həmçinin, Anaşkin küçəsindəki torpaq sahələri satılmaqda davam edir. “Baıxanov rezidens” yaşayış kompleksi, əyləncə mərkəzləri, “Bərgüşad” və s. icra başçısının nəzarətində olduğu iddia edilir. Bir müddət əvvəl Milli Məclisin iqtisadi siyasət komitəsinin üzvü Vahid Əhmədov qanunların icra başçılarına bizneslə məşğul olmağa imkan vermədiyini açıqlamışdı: “Hazırkı qanunla məmurlar, icra başçıları, Milli Məclisin deputatları biznes və kommersiya fəaliyyətilə məşğul ola bilməzlər.

Mən də məhz bu qanunun tərəfdarıyam. Hökumət adamı dövlətin işilə, əhalinin rifah halının yaxşılaşdırılması, sosial vəziyyətinin təmin edilməsilə məşğul olmalıdır. Məmurun vəzifəsi budur. Amma bəzi məmurlar var ki, gizlin şəkildə bizneslə məşğul olurlar. Nəticədə kifayət qədər kapital əldə edirlər. Mən o kapitalların leqallaşdırılmasının tərəfdarıyam ki, vəsait xaricə axmasın, Azərbaycanda qalsın. Düşünürəm ki, kapitalın leqallaşdırılması ilə bağlı qanun layihəsi qəbul edilməlidir”.

Mediada elə Adil Vəliyevin biznesi haqda maraqlı məlumatlar yayılıb. Bildirilib ki, Bakıdakı “Volkswagen”, “Audi”, “Seat”, “Porsche” Sabunçunun rəhbərinə məxsusdur. Habelə, Adil Vəliyevin icra başçısı təyin olunmazdan əvvəl həqiqətən də “Sarı gəlin” şadlıq sarayı olub. İndi də Ənvər Vəliyev bu bizneslə məşğul olur.

İcra başçısı sərəncamındakı bütün ticarət obyektlərinə, avtomobil satışı mərkəzlərinə şəxsən özü nəzarət edir. Hətta maliyyə məsələlərini də birbaşa özü həyata keçirir.

O bu işlərdə, yəni pul məsələsində çox diqqətlidir və heç kimə etibar etmir. Məhz bu səbəbdən uzun illər dostluq etdiyi, keçmiş biznes ortağı və müavini Şakir Alıyevlə yollarını ayırdı.

Mətbuatda yayılan xəbərlərə görə, indisə Adil Vəliyev rayona rəhbər təyin olunduğu ilk vaxtlarda Bakıxanov qəsəbəsində kosmetik işlər görməklə missiyasını başa çatmış sayıb.

O gündən bəri rayonun hər hansı ərazisində abadlıq, yenidənqurma işlərinə rast gəlinmir. İstər Sabunçu rayonuna daxil olan Bakının bəzi kəndləri olsun, istər Bakıxanov qəsəbəsi, istərsə də Sabunçu vağzalının ətrafındakı vəziyyət.

A.Vəliyev onu tənqid edən media qurumlarını təhdid etmək, məhkəməyə verməklə hədələyərək mətbuatla mübarizəyə başladı. Halbuki, icra başçısı rayonda aşıb-daşan problemlərin həlli ilə məşğul olmalıydı.

Amma bu günlərdə xəbər portallarında onun maşın kolleksiyası yayıldı. Rayon üçün böyük işlər gördüyünə özünü inandıran icra hakimi əslində, biznesini də gizlədə bilmədi. Ayda 1000 manat maaş alan icra başçısının bu cür bahalı maşınları hansı pulla alması da ciddi sual doğurmaya bilməz.

Çünki, icra başçısının maşın kolleksiyasında qiyməti nə az, nə çox 150-200 min manatdan başlayan “Ferrari”, “Porshe” kimi bahalı avtomobillər var. Bu da səbəbsiz deyil. A.Vəliyevin “Porsche” avtomobil salonu var. “Sarı gəlin” restoranı və digər ticarət obyektlərinin olması da ictimaiyyətə sirr deyil. Yəni icra başçısı bizneslə məşğuldur.

İcra başçısının özünün şəxsi kolleksiyasında dəyəri 100 minlərlə manat olan onlarla avtomobil var. Mediada yayılan bəzilərinin nömrələri belədir: 10 AA 818, 10 YY 078, 10 FF 078, 10 AL 078, 10 AA 078, 99 CF 999 və 99 ON 999.

İcra hakiminin kolleksiyasındakı 90 HH 900 dövlət nömrə nişanlı "Posche Monsory 958 Cayenne" avtomobilinin dəyəri 400.000 AZN-dir. 10 FF 078 dövlət nişanlı "Ferrari F 12 Berlinetta" isə 493.000 manatadır.

İki maşının qiyməti bir milyon manata yaxındırsa, Adil Vəliyevin kolleksiyasının ümumi dəyərinin milyonlarla manat olduğunu deyə bilərik. Bundan başqa, icra başçısının nəzarətində digər biznes strukturlarının da olduğu iddia edilir.

Rayonun əhalisinin problemləri, onları narahat edən qayğılarla maraqlanmaq əvəzinə, sahibi olduğu «Euro style» LTD şirkətinin gəlirlərinin artırılması istiqamətində fəaliyyətini davam etdirib.



Sabunçu rayonu Ramana qəsəbəsində isə qanuni yolla torpaq alıb ev tikdirmək istəyən vətəndaşların haqsızlıqlar, bürokratik əngəllərlə üzləşir.

Məlumat üçün deyək ki, Vəliyev Adil Ənvər oğlu Qubadlıda anadan olub. 1987-ci ildə Azərbaycan Dövlət Universitetinin hüquq fakültəsini bitirib.

Əmək fəaliyyətinə 1977-ci ildə BEMZ-də çilingər kimi başlayıb. 1978-1980-cı illərdə hərbi xidmətdə olub. 1980-1990-cı illərə qədər fasiləsiz olaraq əmək fəaliyyətini BEMZ-də davam etdirib.

1990-1992-ci illərdə Nərimanov Rayon İcra Hakimiyyətində şöbə müdiri və Nərimanov Rayon İcra Hakimiyyəti başçısının müavini, 1992-1996-cı illərdə Bakı şəhər Xalq deputatları sovetində təlimatçı və şöbə müdiri, 1998-2003-cü illərdə Dövlət Neft Şirkətinin Dənizdə Neft-Qaz İstehsalat Birliyinin MMTİ-nin rəis müavini vəzifələrində işləyib.

2003-2012-ci illər ərzində özü təsis etdiyi “Euro style” LTD şirkətində çalışıb. Azərbaycan Respublikası Prezidentinin 14 aprel 2012-ci il tarixli Sərəncamı ilə Bakı şəhəri Sabunçu Rayon İcra Hakimiyyətinin başçısı vəzifəsinə təyin edilib. Yeni Azərbaycan Partiyasının üzvüdür. Ailəlidir. İki övladı var.

Rafiq Qara

Sabunçu RİH-nin məsələ ilə bağlı mövqeyini dərc etməyə hazırıq.