Məlumatlı mənbə onu da bildirir ki, “Mərkəzi Rayon Xəstəxanasının giriş ərazisi, bu gün faktiki olaraq baş həkim tərəfindən “işğal olunub”

“Gündəm Xəbər”in ötən saylarının birində Akademik Zərifə Əliyeva adına Gədəbəy rayon Mərkəzi Xəstəxanasında yaşanan və analoqu olmayan özbaşınalıqlardan, çoxsaylı qanunsuzluqlardan, minbir maxinasiyalara və s. qol qoyulmasından az-çox bəhs etmişdik. Yazıb onu da vurğulamışdıq ki, atılan hər bir addımın arxasında, məhz xəstəxananaya rəhbərlik edən Ramiz Pirverdiyevin şəxsi maraqlarının təmin edilməsi durur ki, bu da əməlli-başlıca anarxiyaya səbəb olur. Məsələn, adının çəkilməsini istəməyən və adıçəkilən xəstəxanada işləyən mənbəmiz bildirir ki, “sakinlərə pulsuz verilməli olan dərman pereparatlarının pulu, xəstəxananın baş həkim Ramiz Pirvediyev, rayonun apteklər idrəsinin müdiri və digər vəzifə sahibləri tərəfindən “pay-püş” edilir. Mərkəzi xəstəxananın balansında olan tibb müəsissələri üçün ərzaq, geyim formaları, dərman preparatları, nəqliyyat vasitələri üçün nəzərdə tutulmuş detallar, yanacaq məhsulları və s-yə aid büdcə pulları isə, yalnız kağız üzərində mövcud olan firmalara köçürülür və az sonra da mənimsənilir. Şəkər xəstələrinə, 1-ci və 2-ci qrup əlillərə verilməli olan dərmanların da, “qeybə çəkilməsi” xüsusi müzakirə olunan mövzulardandır. Adı xəstəxananın ştat cədvəlində olan, hər ay dövlətdən əmək haqqı alan, amma iş üzü tanımayan neçə-neçə “ölü canlar” var ki, onlardan biri də həmin xəstəxanın şəkər şöbəsində tibb bacısı “işləyən” Jalə xanım Qasımovadır” deyir. Hətta, iri ranqlı vəzifə sahibi tərəfindən həmin xanımın baş həkimə xüsusi tapşırıldığı da vurğulanır. Məhz, ona görə ki, Jalə xanım Qasımova Gədəbəydə deyil, Bakı şəhərində yaşayır.
Məlumatlı mənbə onu da bildirir ki, “Mərkəzi Rayon Xəstəxanasının giriş ərazisi, bu gün faktiki olaraq baş həkim tərəfindən “işğal olunub”. Ona görə ki, həmin ərazidə Ramiz həkimə məxsus "NUR" restoranı və «NUR» market fəaliyyət göstərir və verilən məlumatlara görə, həmin obyektlərdə işləyən işçilərdən bəziləri xəstəxananın texniki işçiləridirlər. Xəstəxanada çalışan həkimlərin çoxu, günlərini həmin restoranda keçirirlər. Bu xəstəxana üçün o qədər problem olmasa da, problem təcili tibbi yardım maşınlarının xəstəxanaya xəstə gətirməsində olur. Çünki ötən saylarımızda qeyd etdiyimiz kimi, günün axşam saatlarında baş həkimə məxsus restoranın həyətində o qədər avtomobillər saxlanılır ki, bu da problemin əmələ gəlməsini şərtləndirən başlıca səbəb olur.
Hörmətli oxucular! Növbəti saylarımızda MRX-na verilən dərmanların, bir çox ləvazimatların və s-nin, səbəb nədir ki, Elşən Əliyevə məxsus aptekdə satdırılmasından bəhs edəcəyik.Hansı ki, həmin aptek rayonun Mərkəzi Univermağına olduqca yaxın ərazidə yerləşir. Bundan əlavə, adı ştat cədvəlində olan, amma iş üzü tanımayan “ölü canlar”dan bəzilərinə himayədarlıq edən vəzifə sahiblərinin adlarını da, ictimaiyyətə çatdırmağa çalışacağıq. Araşdırmamız davam edəcək. Odur ki, bizi izləyin.

Akif