Akif Çovdarovun və Səlim Məmmədovun tapşırıqları əsasında Dövlət Miqrasiya Xidməti İdarəsində, mənim beş il müddətinə Gürcüstana deportasiya olunmağımla bağlı qərar da verilir
Azərbaycan Respublikasının vətəndaşı olan və hal-hazırda Bakı şəhəri, Sabunçu rayonu Bakıxanov qəsəbəsi, Ə.Ağayev küçəsi ev-23, mənzil-3 ünvanında yaşayan və MTN-nin əməkdaşları tərəfindən zərərçəkmiş şəxslərdən biri hesab olunan, Bədəlov Zakir Dilənçi oğlu tərəfindən “Gündəm Xəbər”ə növbəti müraciət ünvanlanıb. O, yazdığı müraciətində 2010-cu ildən bu günə kimi üz-üzə qaldığı problemlərin varlığından, ona qarşı edilən haqsızlıqlardan, sadaladığı faktların araşdırılmamasından və hal-hazırda davam edən proseslərin varlığından bəhs edərək bildirir ki, “hal-hazırda Milli Təhlükəsizlik Nazirliyinin əməkdaşları və digərlərinin təqsirləndirilmələri barəsində başlanmış cinayət işi, Baş Prokurorluğun Ağır Cinayətlərə Dair İşlər üzrə İstintaq İdarəsində, müstəntiq Vüqar müəllimin icraatındadır. Bu işlə bağlı mən və ailə üzvlərim dəfələrlə prokurorluğa çağırılmışıq və ətraflı şəkildə ifadələr də vermişik. Verdiyim ifadələrimdə bildirmişəm ki, mən Zakir Mustafayevin (ləqəbi Sahib olub) tez-tez təzyiqlərinə, hədə-qorxularına məruz qalmaqla bərabər, üstümə tapança çəkməsindən, evimə tapança qoydurmasından, polıs idarəsı əməkdaşlarının həmın silahı evimdən götürməsindən, Zakir Mustafayevlə əlbir olan Səlim Məmmədov və Akif Çovdarov adlı şəxslərin, o cümlədən Bakı şəhər sakini Həbibov Abdul Məmməd oğlunun, Mübariz adlı şəxsin, Gəncə şəhər sakini Qəfərov Rəşad Sahib oğlunun və digərlərinin əlbir olmaları barədə, həmçinin bir çox məsələlər haqqında aidiyyəti qurumlara geniş məlumat da vermişəm. Təəssüf doğuran hal o olub ki, Zakir Mustafayev mənə hədə-qorxu gələrkən istifadə etdiyi, polis idarəsi əməkdaşları tərəfindən götürülmüş “Makarov” tipli tapançanın kimə məxsus olması və onun kim tərəfindən bizə məxsus mənzilə qoyulması, Zakir Mustafayevlə əlbir olub cinayət hadisəsi törədən şəxslərin kimliyinin müəyyən olunması barədə məlumatlar versəm də, bu günə kimi onların istintaqa cəlb olunması istiqamətində heç bir tədbir görülməyib.
Daha öncəki müraciətlərimdə qeyd etmişdim ki, sabiq MTN-nin əməkdaşı Akif Çovdarov, onunla əlbir olan və həmin qurumun əməkdaşı Səlim Mamedov vasitəsilə bu işlərə cəlb olunan Gürcüstan Respublikasının vətəndaşı, hətta həmin ölkənin DİN-nin əməkdaşı olan Zakir Mustafayevin Azərbaycanda sifarişlərini yerinə yetirən, onunla şərik və əlbir olan Abdul Həbibov, Mübariz adlı şəxs və Gəncə şəhər sakini Rəşad Qəfərov kimi şəxslərin aparılan istintaqa cəlb edilmələri vacib və zəruridir. Mənim ünvanıma gələn Rəşad Qəfərov barəsində, həmçinin başqa işlərlə bağlı Sabunçu RPİ-i tərəfindən axtarış da verilmişdir. Çünki, Zakir Mustafayev hədə-qorxu və özbaşınalıq yolu ilə, məndən külli miqdarda pul almaqla, aldığı pulu mənimsəməklə öz iddialarından yenə də əl çəkməmişdir. O, əlavə olaraq məndən 200000 manat da pul tələb etmişdir. Həmin pulların tələb olunmasını da Zakir Mustafayev Abdul Həbibov, Mübariz və Rəşad Qəfərov adlı şəxslərə tapşırmış, onlar da yaşadığım ünvana gələrək bu pulları məndən tələb etmişlər.
Bundan əlavə, mən Səlim Məmmədov tərəfindən zorla MTN-nin inzibati binasına aparılan zaman o, və Akif Çovdarov, mənim Zakir Mustafayevə 200000 ABŞ dolları verməli olduğumu bildirdilər və əks halda deportasiya edəcəklərini də bildirdilər. Hətta Səlim Mamedov mənə bildirdi ki, sənin həyat yoldaşını da deportasiya edəcəyik. Belə olan halda ona bildirdim ki, sən onu necə deportasiya edəcəksən? Axı, o, Azərbaycan vətəndaşıdır?
Ümumiyyətlə, mən MTN-də onların təklifindən imtina etdikdə, ümumvətəndaş pasportumu əlimdən alıb məni sərbəst buraxdılar. Həmin vaxt Səlim Mamedov cibimə 5 manat pul qoyub məni yola saldı. Nəticədə Akif Çovdarov və Səlim Məmmədovun tapşırıqları əsasında, Dövlət Miqrasiya Xidməti İdarəsinin rəisi Arzu Rəhimovun qəbul etdiyi qərarla, mənim 5 il müddətinə Gürcüstan Respublikasına deportasiya olunmağım qərara alınır. Bu qərar onu göstərir ki, miqrasiya xidməti əməkdaşları, o cümlədən Arzu Rəhimov da, Akif Çovdarovun tapşırıq və əmrlərini yerinə yetirən şəxslərdən biri olub. Çünki, o, 08 dekabr 2011-ci ildə deportasiya olunmağımla bağlı № 3885 qərar da qəbul edir. Həmçinin, Miqrasiya Xidməti İdarəsinin əməkdaşı Levan Kurskiy də, Səlim Mamedovun və Akif Çovdarovun tapşırığı ilə, mənim şəxsiyyət vəsiqəmi fəaliyyətsizləşdirir. Halbuki, sonrakı araşdırmalar onu göstərdi ki, adı çəkilən qurum tərəfindən heç bir araşdırma işi aparılmadan, mənim Azərbaycan Respublikasının vətəndaşı olmağımın qanuni və əsaslı olması belə nəzərə alınmadan, qonşu respublikanın vətəndaşı olmamağımla bağlı Gürcüstan Respublikasına sorğu göndərmədən qanunsuz qərar qəbul etmişlər. Son anda həmin qərar icra olunmadı və belə bir səbəb üzündən də, Dövlət Miqrasiya Xidməti İdarəsi həmin qərarı etibarsız saydı. Bütün bunlara baxmayaraq Akif Çovdarovun və onun havadarlarının qanunsuz hərəkətləri ucbatından, mən bir neçə il şəxsiyyət vəsiqəsi olmadan yaşadım. Uzun müddət cənab Prezidentimizə ünvanladığım ərizələrdən sonra, vətəndaşlığım yenidən bərpa olundu.
Bundan əlavə, başlanmış cinayət işi üzrə mən zərərçəkmiş şəxs qismində tanınmışam və Zakir Mustafayevin barəsində başlanan cinayət işinin aqibəti barəsində, məndə heç bir məlumat yoxdur. Araşdırmalar zaman o da məlum olmuşdur ki, Gürcüstan Respublikasının vətəndaşı Mustafayev Zakir Nurəddin oğlunun, Azərbaycan Respublikasına daxil olması barədə gömrük keçid məntəqələrində heç bir məlumat aşkar olunmur. Halbuki, Akif Çovdarov və digərlərinin təqsirləndirilməsi barədə başlanmış cinayət işinin istintaqı zamanı Zakir Mustafayev Azərbaycana gəlmiş və istər onun dindirilməsi, istərsə də üzləşdirilməsi təmin edilir. Amma, 2016-cı il üzrə onun Azərbaycana keçməsi barədə gömrük orqanlarında heç bir məlumat yoxdur. Bu o deməkdir ki, o, qanunsuz şəkildə ölkə sərhədlərini keçir və Azərbaycana daxil olur. Bu da birbaşa cinayət əməlidir və bu faktın araşdırılması da zəruridir. Onun 2016-cı ildə Azərbaycanda olması, istintaqda dindirilməsi mübahisəsizdir. Onun ölkəmizə necə daxil olması barədə, gömrük orqanlarında məlumatın olub-olamamasını dəqiqləşdirmək vacibdir. Ona görə də gömrük orqanlarına və ya sərhəd xidmətinə bu barədə sorğu göndərilməlidir.
Bunlar barədə dəfələrlə Baş Prokurorluğun Ağır Cinayətlərə Dair İşlər üzrə İstintaq İdarəsinin rəisi cənab Eldar Hümbətova müraciətlər etmişəm. Sonuncu dəfə mənə müstəntiq Vüqar Nəsibov tərəfindən verilən 13 iyul 2016-cı il tarixli və 14 iyul 2016-cı il tarixli cavab məktublarında qeyd olunur ki, 13 iyul 2016-cı il tarixli qərarla 152006057 nömrəli cinayət işindən Akif Çovdarov, Səlim Məmmədov, Akif Əliyev və Orxan Osmanovun təqsirləndirilmələri barədə, 162006051 nömrəli cinayət işi ayrılaraq ayrıca icraata qəbul olunmuş və ayrılan həmin cinayət işi üzrə ibtidai istintaqın 14 iyul 2016-cı il tarixdə tamamlanması və ittiham aktının tərtib olunması barədə məlumat da verilmişdir.
Mənə maraqlı olan hissə odur ki, Akif Çovdarov və Səlim Məmmədovdan çox, həmin şəxslərlə əlbir olub cinayətlər törədən Gürcüstan Respublikasının vətəndaşı Zakir Nurəddin oğlu Mustafayevin aqibəti, onun qanunsuz əməllərinə hüquqi qiymətin verilməsidir. Mən bu barədə məlumat əldə etmək istəsəm də, hər dəfə mənə aidiyyatı olmayan şəxslərin barəsində məlumat verilmiş və bu da mahiyyətdən yayınmaq deməkdir.
Sözügedən cinayət işi üzrə “Makarov” tipli tapançanın kimə məxsus olması, Zakir Mustafayevin Azərbaycana, xüsuslə də 2016-cı il tarixdə keçib-keçməməsinin müəyyən edilməsi üçün, bu gün aidiyyatı orqanlara (Dövlət Sərhəd Xidmətinə) sorğular göndərilməli, Zakir Mustafayevlə Səlim Məmmədovun arasında əlaqələrin olub-olmaması dəqiqləşdirlməli, danışıqlar aparılıb-aparılmamasının müəyyən edilməsi üçün onların istifadə etdikləri mobil operatorlara sorğular göndərilməi, danışıqların hansı antenlərdən istifadə etməklə həyata keçirilməsi müəyyən olunmalı, Zakir Mustafayevin cinayət işindəki statusunun nədən ibarət olması və onun təqsirləndirilən şəxs qismində və onunla birlikdə əlbir olan digər şəxslərin istintaqa cəlb olunması, başlanmış cinayət işi üzrə zərərçəkmiş şəxs qismində tanınmağım barədə zəruri tədbirlərin görülməsini, sadaladığım digər məsələlərlə bağlı ciddi və operativ işlər aparılmasının təmin olunmasını istərdim”.
Onu da vurğulayaq ki, Zakir Bədəlov üz-üzə qaldığı problemlərlə bağlı təqribən 2011-ci ilin yanvar-fevral aylarında Azərbaycana rəsmi səfərə gələn Gürcüstan Respublikasının sabiq prezidenti Mixail Saakaşvilini məlumatlandırmaq üçün, “Gündəm Xəbər” qəzetində işıq üzü görən açıqlamaları Marneuli rayonunun qubernatoru Azər Süleymanova çatdırır. Qubernator Gürcüstana qayıtdıqdan sonra Mixail Saakaşvilini bu haqda məlumatlandırır və az sonra o da bəlli olur ki, Sabunçu rayon İcra Hakimiyyətinin önündə table silahı ilə Zakir Bədəlovun başına silah dirəyən Zakir Mustafayev (ləqəbi Sahib olub) Gürcüstanın DİN-nin əməkdaşıdır. Bu yöndə məlumat əldə olunduqdan sonra, sabiq prezidentin tapşırığı əsasında Zakir Mustafayev həbs olunur. Çox keçmir ki, onun bibisi oğlu Abdulla adlı şəxs “Gündəm Xəbər” qəzetinin rəhbəri Şirin Cəfəriyə zəng edərək, onu ölümlə hədələyir. Təqribən altı ay ərzində həbsdə saxlanılan Zakir Mustafayev həbsdən çıxdıqdan sonra o da, Şirin Cəfəriyə gizli nömrə ilə zəng edib bildirir ki, “gəlib redaksiyanızda hər kəsi güllələyəcəyəm” deməklə, onu da ölümlə hədələyir.
Bütün bunlardan başqa onu da qeyd edək ki, qəzetimizin 2011-2012-ci illərdəki saylarında bu və ya digər olaylarla bağlı silsilə açıqlamalarımız da işıq üzü görmüşdü. Həmin açıqlamalardan sonra “Gündəm Xəbər” qəzetinin rəhbərliyinə qarşı adı çəkilən şəxslər tərəfindən təqiblər, təzyiqlər durmadan artmağa başlayır. Yəni, qəzetin təsisçisi Şirin Cəfəri həmin illərdə iki qara rəngli “CİP”lə təqib olunur. Bununla bağlı Şirin Cəfəriyə əvvəlcədən onun tanıdığı polis əməkdaşı məlumat verir. Hansı ki, yaşanan olayı polis əməkdaşı təsadüfən görür və dərhal onu bu haqda da məlumatlandırır. Yəni, həmin illərdə gecə saatlarında qəzetin bölgüsü ilə bağlı lazımi tapşırıqlarını verib evə qayıdarkən, Şirin Cəfəri izləndiyini görür və “İçərişəhər” metrosu tərəfdə, daha dəqiq desək “Sabir bağı”nın həndəvərindəki binanın “arka”sından içəri daxil olaraq, izini itirməyi də bacarır. Şirin Cəfərini izləyənlər onu itirdikdən sonra, qəzetin rəhbəri baş verə biləcək təhlükənin sovuşduğunu duyur. Həmin illərdə onun həyatına qarşı çox ciddi təhlükələr yaranır və bir neçə dəfə ölümlə də hədələnir.
Araşdırmamız davam edəcək. Ardı var.

Akif