Akif Çovdarovun işçisi törətdikləri cinayətlərin təfərrüatını açıqlayır
Sabunçu rayon Məhkəməsinin inzibati binasıda ləğv edilmiş Milli Təhlükəsizlik Nazirliyi (MTN) Energetika və Nəqliyyat Sahələrində Təhlükəsizlik Baş İdarəsinin sabiq rəisi, general-mayor Akif Çovdarov, MTN-in Energetika və Nəqliyyat Sahələrində Təhlükəsizlik Baş İdarəsinin sabiq işçisi, polkovnik Səlim Məmmədov, MTN-in sabiq idarə rəisi, mayor Akif Əliyev və keçmiş şöbə rəisi Orxan Osmanovun cinayət işi üzrə məhkəmə prosesi davam edir. ProsesBakı Hərbi Məhkəməsinin hakimi Həbib Həsənovun sədrliyi ilə keçirilir.
Cinayət işi üzrə təqsirləndirilən şəxs qismində ifadə verən Akif Əliyev Fikrət İbrahimovuu və onun nazirliyə çağırılmasını xatırlamadığını bildirib. O, istintaq zamanı Fikrət İbrahimovla üzləşdirilib.
Bundan sonra Akif Əliyev dindirmə zamanı göstərib ki, Fikrət İbrahimov 2014-cü ilin iyun ayında 3-cü idarənin rəisi Rəsul Rəsulov ona nurçuların maliyyələşməsinə köməklik etməkdə şübhəli bilindiyinə görə nazirliyin komendaturasına bir nəfər şəxs çağırıldığını və həmin şəxslə söhbət etmək üçün getməsini tapşırıb: “Mən də komendaturaya getdikdə həmin şəxsin Orxan Osmanovla söhbət etdiyini gördüm. Fikrət İbrahimov Akif Çovdarovla əvvəllər polis orqanlarında bir yerdə işlədiyini dedi. Buna görə də Fikrət İbrahimova olan münasibətim dəyişdi. Bundan sonra Fikrət İbrahimov ilə bağlı məsələyə qarışmadım”.
Akif Əliyevin sözlərinə görə, 2014-cü ilin dekabr ayında isə Anar Abidov ona Fikrət İbrahimovun MTN-nə dəvət olunduğunu, buna səbəb isə Fikrətin şəriki Vidadi adlı şəxsdən guya əvvəllər MTN-
nə verdiyi pulu tələb etməsi ilə əlaqədar olduğunu bildirib: “Bundan sonra Akif Çovdarov da bu məsələ ilə əlaqədar məşğul olmağımı tapşırdı, pasportunda guya saxta giriş-çıxış ştamplarının olmasını dediyi üçün Fikrət İbrahimovun pasportunu yoxladım. Həmçinin komendaturada Fikrət İbrahimovla söhbət etdim. Fikrət İbrahimovdan əvvəllər kiməsə pul verib-vermədiyini soruşdum. Fikrət heç kəsə pul vermədiyini dedi. Mən də bu barədə Akif Çovdarova məruzə etdim. Sonradan Anar Abidov Fikrətin öz şəriki ilə razılığa gələrək aralarında olan narazılığı aradan qaldırdıqlarını söylədi. Üzləşmə zamanı həmçinin nə Orxan Osmanovun, nə də Anar Abidovun Fikrət İbrahimovdan pul almasını eşitmədiyimi və bu məsələdən xəbərsiz olduğumu göstərmişəm”.
Akif Əliyev həmçinin ifadəsində telefon danışıqlarının qanunsuz dinlənilməsi epizodu üzrə sahibkarlıq fəaliyyəti ilə məşğul olan Cəfərov Aqil Adil oğlu, Budaqov İlqar Məhərrəm oğlu, Abdullayev Elşad Elman oğlu, Əliyev Vüqar Paşa oğlu, İbrahimov Emil Əli oğlu, Babayev Ramin Yaşar oğlu, Bədəlov Zakir Dilənçi oğlu, Əzizov Qurban Eyub oğlu, Əhmədov Şövqü Xeyrulla oğlu, Tağıyev Elşən Namiq oğlu, Əhmədov Tağı Məhəmməd oğlunun mobil telefon nömrələri üzrə aparılan danışıqların dinlənilməsini bilmədiyini, bu barədə heç kimə göstəriş vermədiyini göstərib.
Akif Əliyev “Techmarin LTD” məhdud məsuliyyətli cəmiyyətinin təsisçisi Arif Həsənovun külli miqdarda pul vəsaitinin ələ keçirilməsi epizodu üzrə bildirib ki, 2014-cü ilin dekabr ayının axırlarında və ya 2015-ci ilin yanvar ayında baş idarənin sabiq rəisi Akif Çövdarov onu yanına çağırıb: “Akif Çovdarov “Techmarin LTD” MMC barədə həmin hüquqi şəxsin mövcudluğu və həmin şirkətin əməliyyat təminatının olub-olmamasını soruşub. Mən isə cavabımda həmin şirkətin gəmi təmiri ilə məşğul olduğunu və idarənin 2-ci şöbəsinin kurasıyasında olduğunu
bildirmişəm. Bundan sonra Akif Çovdarov həmin şirkətin fəaliyyəti ilə bağlı şirkətin təsisçisi Arif Həsənovun MTN-ə şikayət ərizəsi ilə müraciət etdiyini və bunun araşdırılması ilə 4-cü baş idarənin əməkdaşlarının məşgul olduqlarını, bununla bağlı məlumatın 4-cü baş idarəsinin sabiq rəisi Sübahir Qurbanov tərəfindən verildiyini dedi”.
Akif Əliyev əlavə edib ki, bir neçə gündən sonra Akif Çovdarov həmin şirkətin rəhbər şəxslərinin MTN-nın inzibati binasının nəzarət-buraxılış məntəqəsində olduğu barədə onu məlumatlandıraraq həmin şəxslərlə aparılacaq söhbətlərdə iştirak etməsini tapşırıb: “NBM-nə gəldikdə orada Arif Həsənovu, kurasiya üzrə əvvələr tanıdığı, sonuncunun müavini Səhrab Allahverdiyevi, həmçinin 4-cü baş idarənin sabiq rəis müavini Fizuli Əliyevi və həmin idarənin əməkdaşları Natiq Alıyevi, kompyuter mütəxəssisi Hacıağa Hacını gördüm. Fizuli Əliyev məni Səhrab Allahverdiyevin qeyri-qanuni maliyyə əməliyyatları aparması barədə Arif Həsənovun ərizəsini göstərdi. 5-10 dəqiqə orada oturduqdan sonra Akif Çovdarovun yanına qalxaraq şikayət ərizəsinin məzmunu barədə qısa məruzə etdim. Bundan sonra həmin araşdırma ilə bağlı Fizuli Əliyevlə əlaqə saxlasam da, aramızda bu barədə ümumi söhbətlər olub”.
Təqsirləndirilən şəxs bildirib ki, bir neçə gündən sonra Akif Çovdarov Fizuli Əliyevin qeyd olunan şirkətin ofisinə gedəcəyi barədə məlumat verib: “Akif Çovdarov şirkətin fəaliyyəti bizim kurasiyasımız da olduğundan məni də oraya göndərdi. Baş idarə rəisin göstərişi ilə həmin gün şirkətin ofisinə gələrək orada Fizuli Əliyevi, Natiq Alıyevi, Zaur Məmmədovu, Hacıağa Hacını və həmin idarənin digər əməkdaşlarını gördüm. Ofisdə cəmi 10-15 dəqiqə olduqdan sonra iş yerimə qayıtdığımdan 4-cü baş idarənin əməkdaşlarının hərəkətlərinin nədən ibarət olduğunu bilməmişəm. Lakin həmin günün axşamı şirkətin baş mühasibini MTN-də
gördüm. Bundan sonra şirkətin əməkdaşlarını və rəhbər şəxslərini dəfələrlə MTN-nın inzibati binasının nəzarət-buraxılış məntəqəsində görmüşəm. Həmin şəxslərlə 4-cü baş idarənin sabiq əməkdaşları tərəfindən aparılmış araşdırmada iştirak etməmişəm və həmin araşdırmanın nədən ibarət olduğunu bilməmişəm”.
Akif Əliyevin sözlərinə görə, bir dəfə Akif Çovdarovun göstərişi ilə Arif Həsənov tərəfindən təqdim edilmiş sənədlərin nədən ibarət olduğuna baxıb: “Lakin həmin sənədlərdə hər hansı pul vəsaitlərin banka köçürülməsinə dair sənədi görməmişəm, yalnız üzərində texniki işlərə dair möhür olan gəmi təmirinə dair yekun texniki aktlar təqdim edilib. Buna görə Arif Həsənovun təqdim etdiyi sənədlərin nədən ibarət olduğunu bilməmişəm”.
Akif Əliyev əlavə edib ki, 2015-ci ilin yanvar ayının axırlarında Natiq Alıyevin dediklərindən ona şirkətdə audit yoxlaması aparıldığı və yoxlamanın nəticəsindən asılı olaraq şirkət, şirkətin əmlakının iki təsisçi arasında bölüşdürüləcəyi məlum olub: “Həmin məsələnin araşdırılmasında iştirakım olmasa da, Səhrab Allahverdiyevlə daimi əlaqə saxlamışam və aramızda əməliyyat təminatı üzrə etibarlı münasibətlər olub. Həmçinin Natiq Alıyevdən şirkətdə olan audit yoxlamasının bitməsi, şirkətin əmlakının bölüşdürülməsi və notariat qaydasında həmin məsələnin təsdiq edilməsi barədə məlumat almışam”.
Təqsirləndirilən şəxs bildirib ki, 2015-ci ilin yanvar ayında Fizuli Əliyevin əməkdaşları tərəfindən Arif Həsənovun oğlu Həsən Həsənovun yaşadığı evdə videokameranın sökülməsini eşidib: “Eyni zamanda Arif Həsənovdan hər hansı məbləqdə pul almamışam”.

Aslan

”Gündəm Xəbər”