Polisin dələduzluqda şübhəli bildiyi şəxsi hakim azadlığa buraxdı
Bakıda Arif Hacıyev dələduzluqla üzləşməsi ilə bağlı hüquq-mühafizə orqanlarına müraciət edib. Amma onun müraciəti əsasında cinayət işi açılsa da, dələduzluqda şübhəli bilinən şəxsi həbs etmək mümkün olmayıb. Buna səbəb Xətai rayon Məhkəməsinin hakimi Habil Məmmədovdur. Hakim əsas olmadan vətəndaşın külli miqdarda pulunu ələm keçirən Nəsib Həsənovun azadlığa buraxılması barədə qərar çıxarıb.
Zərərçəkmiş Arif Hacıyevin nümayəndəsi Aydın Hacıyev bildirib ki, “Binə” Ticarət Mərkəzində pul dəyişmə məntəqəsində Arif Hacıyev işlədiyi vaxt həmyerliləri kimi tanıdığı Nəsib Həsənov etibardan sui-istifadə edərək, dolayısı ilə küllü miqdarda pulu mənimsəyib: “Nəsib Həsənov 2012-ci ilin sentyabr ayında Arif Hacıyevdən iş görmək adı ilə 21700 manat və 14 min ABŞ dolları alıb. Pulu alan zaman bildirib ki, o KARQO-terminaldan ticarət mərkəzinin adına Çin Respublikasından gələn satıcıların mallarını çıxaracaq və onlara malı təhvil verib, pullarını yığaraq qısa müddətdə Arif Hacıyevin pulunu qaytaracaq. Amma bu günə kimi həmin pulu qaytarmayıb”.
Nümayəndə əlavə edib ki, 2013-cü ilin may ayında Arif Hacıyev pulunu istəyib: “Bu zaman Nəsib Həsənov pulu qaytarmamaq məqsədilə Arif Hacıyevi qaynı oğlunun vasitəsilə heç vaxt pulu qaytarmayacağını bildirib və onu hədələtdirib. Hətta qaynı oğlu Arif Hacıyevə bədən xəsarəti də yetirib. Qaynı oğlunun Arif Hacıyevə yetirdiyi xəsarətə görə barəsində məhkəmə hökmü çıxarılıb. Qaynı oğlunun barəsində olan cinayət işinin materialları ilə tanış olan zaman bir daha əmin olduq ki, Nəsib Həsənov Arif
Hacıyevi aldadaraq pulu qaytaracağını bildirsə də, lakin həmin pulu qaytarmaq məqsədi əvvəldən olmayıb. Nəsib Həsənov etibarımdan sui-istifadə edərək, küllü miqdarda pulu mənimsəyib. Qaynı oğlunun Arif Hacıyevə qarşı törətdiyi cinayətlə bağlı dindirilən Nəsib Həsənov müstəntiqin verdiyi suala cavab olaraq bildirib ki, satıcıların malını alıb və onlara verərək, pullarını yığıb, hal-hazırda ona heç kimin borcu yoxdur. Bu ifadəni oxuduqdan sonra tam əmin olduq ki, Nəsib Həsənov Arif Hacıyevi aldadaraq pulumu ələ keçirib”.
Aydın Hacıyev qeyd edib ki, Arif Hacıyev aldadıldığını başa düşdükdən sonra adiyyatı üzrə Qaradağ rayon Polis İdarəsinə ərizə ilə müraciət edib: “Müraciət əsasında toplanmış material üzrə araşdırılmanın davam etdirilməsi Bakı şəhər Baş Polis İdarəsinə göndərilib. Bakı şəhər Baş Polis İdarəsinin İstintaq İdarəsində 20 oktyabr 2015-ci il tarixində fakt üzrə Cinayət Məcəlləsinin 178.3.2-ci (külli miqdarda dələduzluq) maddəsi ilə cinayət işinin başlanıb. Müstəntiq Elnur Novruzovun icraatında olan cinayət işinin istintaqı zamanı cinayət işinin materiallarında cinayəti törətmiş Nəsib Həsənovun cinayətinin sübut olunmasını təsdiq edən istənilən qədər dəlillər toplanıb. Nəsib Həsənova ittiham elan edilməsi üçün onun yeri müəyyən edilmədiyindən, barəsində axtarış elan olunub”.
Aydın Hacıyev bildirib ki, 16 oktyabr 2016-cı il tarixdə Nəsib Həsənov tutularaq, Bakı şəhər Baş Polis İdarəsinin İstintaq İdarəsinə gətirilib: “Müstəntiq Elnur Novruzovun 18 oktyabr 2016-cı il tarixli vəsatəti, Bakı şəhər prokurorunun müavini Mehman Qocayevin 18 oktyabr tarixli təqdimatı əsasında onun
barəsində “həbs” qətimkan tədbiri seçilməsi üçün Xətai rayon məhkəməsinə gətirilib. Hakim Habil Məmmədov iş materiallarını tam araşdırmayıb və Nəsib Həsənovun barəsində “həbs” qətimkan tədbiri seçməkdən imtina edərək, dərhal məhkəmə zalında azad edilməsi barədə qərar çıxarıb. Biz bununla razı deyilik. Çünki Nəsib Həsənov nümayəndəsi olduğum Arif Hacıyevə qarşı dələduzluq edib. O hətta dövlətin onurğa sütunu olan vergi sisteminə qarşı da “vergidən yayınma” cinayəti törədib və istintaqdan yayınıb. Onun barəsində 15 sentyabr 2015-ci il tarixində İnterpol vasitəsi ilə ölkələr arası beynəlxalq axtarışı elan edilib”.
Nümayəndə bildirib ki, Nəsib Həsənov başqa bir vətəndaş Xalid Hacıyevə qarşı da dələduzluq edib: “Onun ərizəsinin də iş materialında olduğu halda, hakim onun barəsində “həbs” qətimkan tədbiri seçməməsi əsassız və birtərəfli mövqedən irəli gəlir. Xətai rayon Məhkəməsinin 18 oktyabr 2016-cı il tarixli qərarı əsassızdır. Bu qərar bir tərəfli olduğundan ləğv edilməli və apelyasiya instansiya məhkəməsində verilmiş təqdimata mahiyyəti üzrə baxılaraq obyektiv qərar çıxarılmalıdır. Bu qərar dövlətimizin adına xələl gətirəcək. Vergidən yayındığına görə Beynəlxalq axtarışda olan və digər cinayət üzrə də istintaqdan yayınaraq, barəsində axtarış qərarı verilən təqsirləndirilən şəxs hakimin qarşısına gətirilir, hakim isə onu məhkəmə zalından azad edir. Ən azından hakim onun ifadəsi alınması üçün beynəlxalq axtarış verən istintaq orqanına onu təhvil verməli olduğu halda, onu məhkəmə zalından azad etməsi yolverilməzdir. Heç müstəntiq E. Novruzov da onun vergidən yayındığına görə aidiyyatı üzrə verilməsində maraqlı olmayıb”.
Aydın Hacıyev bildirib ki, Nəsib Həsənovun barəsində “həbs” qərarının çıxarılması üçün apelyasiya şikayəti verilib. Nümayəndənin sözlərinə görə, şikayətlərinə yaxın günlərdə Bakı Apelyasiya Məhkəməsində baxılacaq.

Aslan

“Gündəm Xəbər”