Bakı Ağır Cinayətlər Məhkəməsində dələduzluqda təqsirli bilinən Leyla Əkbərovanın cinayət işi üzrə məhkəmə prosesi davam edib. Leyla Əkbərova Cinayət Məcəlləsinin 178.3.2-ci (külli miqdarda dələduzluq törətmək) və 320.1-ci (rəsmi sənədləri saxtalaşdırma) maddələri ilə ittiham olunur.

İttihama görə, Leyla Əkbərova Binəqədi rayon Polis İdarəsi Narkotiklərlər Mübarizə Şöbəsinin keçmiş rəisi Mahir Əkbərovun həyat yoldaşıdır.

Leyla Əkbərova təxminən 150 min manat məbləğində pulu dələduzluq yolu ilə mənimdəməkdə ittiham edilir. O, vətəndaşları işə düzəltmək adı ilə aldadaraq pullarını ələ keçirib.

Hakim Rahib Salmanovun sədrliyi ilə keçirilən prosesdə 4 zərərçəkmiş ifadə verib. Zərərçəkmiş Ceyhun Tağıyev həyat yoldaşını işə düzəltmək üçün Leyla Əkbərovaya 9 min manat verdiyini bildirib.

Leyla Əkbərova isə hakimin suallarını cavablandırıb. O, Ceyhun Tağıyevdən pul almadığını deyib: “Həmin şəxsdən pul almamışam”.

Zərəçəkmiş Leyla Cəfərova dindirilərkən Leyla Əkbərovanı qohumu Anarə Məmmədova vasitəsi ilə tanıdığını vurğulayıb. O ifadəsinə bildirib ki, Anarə Məmmədova onun bacısıqızıdır: “Bacımqızı Anarəgilə gələndə Leyla ilə görüşdüm. O, məni işə düzəldə biləcəyini qeyd etdi. Rayonda müəllimə işləyirəm. Növbəti görüşümüzdə mənə təqaüd düzəldə biləcəyi dedi. Bunun 3 min manata başa gəldiyini bildirdi. Pulu Anarəyə verdim. Pulumu qaytarsını tələb edirəm”.

Hakim Leyla Cəfərovaya xəbərdarlıq edib və onun özünün də cinayət əməlinə əl atdığını deyib: “Siz 62 yaşına çatmamasınız. Lakin qanunsuz yolla təqaüdə çıxıb, dövlətin pulunu mənimsəmək istəmisiniz. Bunun özü də cinayətdir”.

Zərərçəkmiş Aynur Cəfərova da bildirib ki, Leyla Əkbərova anasına pensiyaya düzəltmək adı ilə ondan 3 min manat alıb.