“Azərişıq” ASC, “Azəriqaz” İstehsalat Birliyi və “Azəristiliktəchizat” ASC rəhbərləri korrupsiyadan və tender maxinasiyalarından qazandığı milyonları hara xərcləyib?

Baba Rzayev, Əkbər Hacıyev və Yaşar Həsənovun cah-cəlalı, milyonluq obyektləri, villaları və biznes şəbəkəlir haqda sensasion dosye “Gündəm-xəbər”də...

Azərbaycanda oliqarx kimi yaşayan üç məmur xalqın əleyhinə olan qərarların verilməsi üçün Tarif Şurasına müraciət etdi və muradına çatdı.

“Gündəm-xəbər”in məlumatına görə, “Azərişıq” ASC, “Azəriqaz” İstehsalat Birliyi və “Azəristiliktəchizat” ASC rəhbərləri əhalinin güzəranını nəzərə almadan anti-xalq addımlar atdılar.

Üç məmurun anti-xalq addımı

Dekabrdan işığın tarifləri bahalaşıb, yanvardan isə isti və qaz yeni qiymətlərlə əhaliyə satılacaq. Hər üç qurumun rəhbəri padşah kimi həyat tərzi yaşayır.

Onların nəinki isti su, qaz və işıq problemləri var, bu məmurların ən böyük dərdi daha hansı ölkədə istirahət etmək, daha hansı model avtomobil sürmək, daha hansı iri korrupsiya layihəsinə qol çəkməkdir.

“Azərişıq” ASC sədri Baba Rzayev, “Azəriqaz” İstehsalat Birliyi rəhbəri Əkbər Hacıyev və “Azəristiliktəchizat” ASC sədri Yaşar Həsənov böyük biznes imkanlarına malik məmurlardır. Onların varidatı, biznes obyektləri, mal-mülkləri saysız-hesabsızdır.

Milyarder oliqarxlara çevrilmiş dövlət məmurlarının əldə etdiyi bu imkanlar heç də aylıq əmək haqqı hesabına başa gəlməyib. Məhz maxinasiyalar, büdcə pullarının yeyintisi, korrupsiya və tender layihələri ilə istəklərinə nail olublar.

Bu gün isə sözügedən ASC sədrləri xalqın vəziyyətini daha da ağırlaşdıran addım ataraq Tarif Şurasına müraciətdə tarifləri qaldırmağı təklif ediblər. Tarif Şurası rəhbərliyi də əhalinin yox, korrupsioner məmurların yanında olduğu üçün təklifə müsbət reaksiya verdi.

“Gündəm-xəbər” adıçəkilən hər üç ASC sədrinin biznes şəbəkələrini araşdırıb və məlumatlar toplayıb. Bu informasiyalardan çıxan yekun nəticə ondan ibarətdir ki, hər birinin villasını,

obyektini, biznes imkanlarını dövlətin balansına keçirməklə kommuunal xərcləri ödəmək mümkündür.

Baba Rzayevin lampa bazarı

Əvvəlcə Baba Rzayevdən başlayaq. Azərbaycanda ailə biznesinin olduğu məmurlar sırasında olan Baba Rzayev elektrik məhsullarının satışından tutmuş, elektrik təchizatı ilə bağlı dövlət sifarişlərinin icrasına qədər olan bir çox sahələr nəzarət etdiyi bildirilir.

Bu sahələrdə monopoliyanı bir neçə ildir ki, əlində saxlayan Baba Rzayev həm də rəsmən səhmdardır. “Santral Elektrik” LTD şirkətinin səhmlərinin rəsmi sənədlərə görə, 70 faizi Baba Rzayevə, 30 faizi onun ailə üzvlərinə məxsusdur.

“Santral Elektrik” LTD Ədliyyə Nazirliyində 2003-cü ildə qeydiyyata alınıb. O vaxt şirkətə Emin Rzayev – Baba Rzayevin qardaşı rəhbərlik edirdi. Əvvəllər “Bakelektro” ASC-nin icraçı direktoru olan Baba Rzayev yeni vəzifəsinə təyinatdan snra bu şirkətdəki vəzifəsini qardaşı Emin Rzayevə transfer edib.

Məhz bu şirkət dünyaca məşhur şirkətlərin Azərbaycandakı rəsmi distrübütorudur. Söhbət “Legrand” (Fransa), “Pirelly” “GEWISS”, “KEMMR.I” (Finlandiya), “Vortice” (İtaliya), “Stanley” (ABŞ), Philips, Osram “Dewallt”, “Massive” kimi şirkətlərdən gedir.

“Azərişıq” ASC-yə rəhbərlik etdiyi ilk dönəmlərdən başlayaraq bu sahədəki tender bazarında da ancaq özü ilə hansısa formada əlaqələrin olduğu şirkətlərə üstünlük verən Baba Rzayevin bu yolla qazandığı milyonların hesabatını aparmaq çətindir. Uzaq ölkələrdən Azərbaycana qonaq gətirən təyyarələrin yolunu işıqlandıran projektorlardan tutmuş Bakı sakinlərinin evində közərən lampalara qədər, ölkə paytaxtında yandırılan elektrik enerjisinin hər kilovatından qazanan bir ailə var. Dövlətin rəsmi sənədlərini saf-çürük edəndən sonra bu qənaətə gəlmək olur.

Baba Rzayev Santral Elektrikin əsasını 2000-ci ildə Türkiyədən olan tərəfdaşı ilə birlikdə qoyub. Sonralar, 2003-cü ildə türkiyəli iş adamı öz payını Baba Rzayevə satıb. Bakelektrikşəbəkəyə sədr keçdikdən sonra onun, Santral Elektriki də qeyri-rəsmi idarə etdiyi bildirilir. Beləliklə, hər şey göz qabağındadır.

Əkbər Hacıyevin metal biznesi

“Gündəm-xəbər” əhaliyə qazı baha satan Əkbər Hacıyevin də biznesi barədə bilgilər toplayıb. Ə.Hacıyev əmək fəaliyyətinə 2004-cü ildən Məişət Maye-Qaz Açıq Tipli Səhmdar Cəmiyyətində başlayıb.

O,həmin Cəmiyyətdə sədr müavini, sonra isə sədr vəzifələrində çalışıb. 2006-cı ildən 2009-cu ilin iyul ayınadək Azərbaycan Respublikası Dövlət Neft Şirkəti “Azərneftyağ” Neft Emalı Zavodunun direktoru vəzifəsində işləyib.

Həmçinin “Neftçi” futbol klubunun da prezidenti olub. 2009-cu ilin iyulundan “Azəriqaz”a rəhbərlik edir. Əvvəla qeyd edək ki, İB rəhbərinin qaz sahəsindən anlayışı yoxdur. Çünki ixtisası bu sahə ilə bağlı deyil.

Ona görə də paytaxtın qazla təminatında tez-tez problemlər yaranır. “Neftçi”yə rəhbərliyi müddətində adı bir neçə dəfə futbol oyunlarında, oyun alqı-satqısında da hallanıb.

Lakin “Azəriqaz”a keçməklə özünə qarşı yuxarılardan gələ biləcək təhlükəni sovuşdura bilib. Məlumatlara görə, 40 yaşlı sədrin ən yaxın qohumlarından biri metal biznesi ilə məşğul olur. Onun maliyyələşməsinə isə baş direktor baxır.

Xatırladaq ki, “Azəriqaz” sistemində ciddi təsərrüfatsızlıq hökm sürür, Əkbər Hacıyevin bu struktura rəhbər təyin edilməsindən sonra qaz təsərrüfatı barədə heç bir anlayışı olmayan şəxslər vəzifələrə təyin olunub. “Azəriqaz” sistemində hər il azı 1 milyard kubmetrə yaxın qaz itkisi qeydə alınır, yaxud itki kimi rəsmiləşdirilir.

İşə qəbul zamanı Birliyin baş direktoru Əkbər Hacıyevin qohum-əqrəbasına, dostlarına, dostlarının dostlarına yaşıl işıq yandırılıb. Ştat cədvəlləri şişirdilib. Istehsalat Birliyinin aparatındakı işçilərin sayı bir neçə dəfə artırılıb. İndi əhaliyə verilən təbii qazın tərkibində xeyli miqdarda yanmayan, yaxud tam yanmayan zəhərli qazlar var.

Bu qazlar da istehlak olunan təbii metan qazının miqdarını təyin etmək üçün qurulan sayğacdan keçir, lakin yanmır. Ona görə də qəbul edilmiş qazın faydalı iş əmsalı, istiliyi az olur, məsrəfi (1 kubmetri 0,1 man) çox olur.

Yanmayan zəhərli qaz sızma mövcuddursa, otaqdakı hava qatışığında müəyyən həddə çatdıqdan 3 dəqiqə sonra insan huşunu itirir. Sinir sistemi iflic olur. Qan qatılaşır, oksigenlə təmin olunmur və o, qurbana çevrilir.

Yaşar Həsənovun Troya və Atilla sevdası

Nəhayət, növbət “Azəristiliktəchizat” ASC sədri Yaşar Həsənovun əməllərindən bəhs etməy çatır. Rəsmi məlumatı bildirək ki, 2012-ci ildə büdcə layihəsinə ölkə ərazisində istilik sistemi üzrə yaranan zərərin ödənilməsi, istilik sistemi və təchizatı obyektlərinin istismarına və təmirinə 31,6 milyon manat ayrılıb.

2011-ci ildə isə ayrılan vəsait 19 milyon manat olub. 2005-2010-ci illərdə isə istilik sisteminə üst- üstə təxminən 77 milyon manat ayrılıb. Bu pullara hara gedib bilinmir.

Bundan əlavə, “Azəristiliktəchizat”-da həyata keçirilən maxinasiyalardan bir qismi istilik təchizatı borularının qanunsuz yerlərinin dəyişdirilməsi ilə bağlıdır.

Mətbuatda gedən xəbərlərə görə, bəzi ərazilərdə müəyyən iş adamları həmin boruların yaxınlığında yer alıb özlərinə kommersiya obyektləri tikirlər.

Təbii ki, bu zaman borular müəyyən qədər “kənara çəkilməli” olurlar. Bu məsələni isə yalnız Yaşar Həsənov həll edə bilər. Təbii ki, müəyyən məbləğdə pul müqabilində. Beləliklə, razılıq

əldə olunandan sonra, elə “Azəristiliktəchizat” ASC-nin xüsusi briqadası tərəfindən boruların “köçürülməsi” əməliyyatı həyata keçirilir. Təbii ki, bu iş prosesi də müəyyən məsrəflər tələb edir.

Amma bu məsrəflər artıq dövlətin vəsaitləri hesabına ödənilir. Beləliklə də, Yaşar Həsənov vətəndaşların istiliklə daha keyfiyyətli şəkildə təmin olunması üçün ayrılan pulları özünün qeyri-qanuni işlərinə yönəltmiş olur.

Yaşar Həsənov öz obyektləri üçün daha “isti” yerlər seçib. Yaşar müəllim öz obyektləri üçün əksər hallarda “Azəristiliktəchizat” ASC-nin qazanxanalarının ətraf ərazilərini seçir.

Həm də əgər inşa olunan obyekt kafe, restoran və ya şirniyyat sexi olacaqsa. ASC sədrinin isə, bu obyektlərin hər birindən varıdır.

Ona məxsus “Troya” restoranı qeyd olunmalıdır. ASC sədrinin daha iki belə obyektinin adı çəkilir. Bu obyektlərdən biri şirniyyat sexi, digəri isə dəbdəbəli, elit restorandır.

Maraqlıdır ki, Yaşar Həsənov hər iki obyekti eyni adla, “Atilla” adlandırıb. Xalqa isti suyu baha satana məmurun Troya, Atilla sevdası hardan irəli qaynaqlanır maraqlıdır.

Bahalaşma, işsizlik və ixtisarlar

Beləliklə, hər üç məmurun fəaliyyəti və xalqa münasibəti bu faktlarda öz əksini tapır. Bu dövlət strukturları böhrandan zərərsiz çıxmaq üçün xalqın üstünə bütün ağırlığı yüklədilər.

Onların qiymət artımına getməsinə deputatlar da haqq qazandırdılar. Hələ bu azmış kimi, bəziləri bunun büdcəyə fayda verəcəyini bildirdi. Çünki işıq, su və qazın bahalaşması bütün sahələrdə qiymət artımı ilə nəticələnib.

İstər sərnişindaşınma, istər ərzaq məhsulları, istərsə benzin və digər xərclər artmaqdadır.

Artıq vəziyyət getdikcə pisləşməyə doğru inkişaf edir. Elektrik enerjisi və qazın qiymətinin qaldırılması ölkədə işsizliyin sayının artmasına təkan verəcək.

Neftin dünya bazarında ucuzlaşması milli valyutanı əldən saldı və indi bütün sahələrdə böhran, bahalaşma, işsizlik və ixtisarlar baş alıb gedir.

Minlərlə ailə olduqca ağır bir vəziyyətlə üzləşir. Dövlət rəhbərliyi təxirəsalınmaz antiböhran tədbirləri həyata keçirir.

Amma bəzi yarıtmaz məmurların sayəsində ölkəni bahalaşma dalğası bürüyüb. Hər gün iş yerləri qapadılır, istər özəl, istər dövlət müəssisələrində ixtisarlar gedir, vergi bazası daralıb. Ölkə sürətlə böyük böhran dövrünə daxil olur.

Rafiq Qara
gundemxeber.az