Rövşən Novruzov: “Çünki, o, heç bir əsas olmadan məni sürücülükdən çıxartdı və işdən çıxarılmağımla bağlı, ortaya əsaslandırıcı fakt da qoymadı”
Son vaxtlar ölkə əhalisinin işlə təminatı, problemlərinin aradan qaldırılması və digər əhəmiyyət kəsb edən məsələlərin həlli, olduqca aktuallıq kəsb etməkdədir. Baxmayaraq ki, ötən illər ərzində yeni-yeni iş yerləri açılıb, müəyyən sahələri əhatə edən istehsal, və yaxud da qeyri-istehsal sahələri günü-gündən fəaliyyət imkanlarını genişləndirib, amma bütün bunların qarşılığında işsizlərin də sayı durmadan artmaqda davam edib. Onu da vurğulamaq yerinə düşər ki, işsizlərin sayca çoxalmasına səbəb olan amillərdən ən əsası, istehsal və yaxud da qeyri istehsal sahələrində, əksər dövlət qurumlarında və digər sahələrdə rəhbər vəzifə sahibi olan şəxslərin atdıqları xoşagəlməz addımların varlığıdır. Belə bir olayla üz-üzə qalan şəxslərdən biri də, 1962-ci il təvəllüdlü Goranboy rayonu M.Məhərrəmov küçəsi ev-23 ünvanında yaşayan və 20 ildən çox müddət ərzində sürücülük iş təcrübəsi olan Novruzov Rövşən Cəmşid oğludur. O, “Gündəm Xəbər”ə ünvanladığı müraciətində yazır ki, “mən 2003-cü ildən 2014-cü ilin noyabr ayına kimi Goranboy rayon Prokurorluğunda prokuror sürücü işləmişəm. Həmişə işə davamiyyətimdə və hərəkətlərimdə nizam-intizamlı olmuşam, hər hansı qanunsuz addımlarımı da atmamışam. Sadə bir sakin olduğumdan dövlətdən aldığım əmək haqqı ilə, birtəhər ailəmi dolandırmağa çalışmışam. Çünki, mənim sürücülükdən başqa peşəm yoxdur və bu peşəmi də olduqca sevmişəm. Goranboy rayon Prokurorluğunda 11 illik iş təcrübəm olsa da, 2014-cü ildə Məmmədov Fuad Qəzənfər oğlunun rayon prokuroru təyin olunması, mənim işsiz qalmağıma səbəb oldu. Çünki, o, heç bir əsas olmadan məni sürücülükdən çıxartdı və işdən çıxarılmağımla bağlı, ortaya əsaslandırıcı fakt da qoymadı. Yalnız o, onu bildirdi ki, “səninlə işləmək istəmirəm, mənim ailə sürücüm var” deməklə, məni işimdən uzaqlaşdırdı.
Onu da qeyd edim ki, Fuad Məmmədov ilk öncə məni aldada bildi. Çünki, işdən çıxmağımla bağlı ərizə yazmaq istəmirdim, o halda o, onu da vurğuladı ki, “sən işdən çıxmagınla bağlı ərizəni yaz, mən səni başqa bir işlə təmin edəcəyəm” desə də, bu günədək də vədinə xilaf çıxıb.
Ötən müddət ərzində işsiz qaldığımdan problemlərim durmadan çoxaldı və son anda vadar oldum ki, aidiyyəti qurumlara silsilə müraciətlərimi ünvanlayım və pozulmuş haqqımın-hüququmun bərpasına da nail olum. Hətta, 20 may 2016-cı il tarixdə Baş Prokuror cənab Zakir Qaralov Goranboy rayonunda vətəndaşları qəbul edərkən, əsassız şəkildə işdən çıxarılmağımla bağlı ona da müraciətimi çatdırdım. Düzdür, cənab Prokuror məni diqqətlə dinlədi və sonda bildirdi ki, “sənin işlə təmin olunmağınla bağlı tapşırığımı verəcəyəm” desə də, hələ ki, ortada heç bir nəticə yoxdur. Fuad Məmmədov 2009-2014-cü illər ərzində Göyçayda rayon prokuroru işləyərkən də, prokurorun sürücünü işindən uzaqlaşdırır. Bu da onu söyləməyə əsas verir ki, sürücünü işindən uzaqlaşdırmaq, kimisə işsiz, ac-yalavac qoymaq artıq onun adətinə çevrilib”.
Bəli, bu cür addımların atılması olduqca yolverilməz hal olsa da, fakt budur ki, 11 ildən çox müddət ərzində Goranboy rayon Prokurorluğunda prokuror sürücüsü işləyən Rövşən Novruzov işsiz qalıb. Bu günədək o, yaşanan olayların həllinə nail ola bilmədiyindən, artıq probleminin ictimailəşməsinə də qərar verib. İnanırıq ki, açıqlamanın dərcindən sonra orta yaş həddinə çatan və kifayət qədər sürücülük təcrübəsi, iş bacarığı olan bu şəxsin problemi diqqətdə saxlanılacaq və həlli istiqamətində əməli addımlar da atılacaq.
Problemin varlığını diqqətdə saxlayacağıq. Açıqlamada adı çəkilən hər kəsin mövqeyini dinləməyə və dərc etməyə hazırıq.



Akif