Rüstəm Zülfüqarlı: “Mən də bir sahibkar olaraq fəaliyyətimi rayonda davam etdirməyə qərar verdim ki, ölkəmizin iqtisadi cəhətdən inkişaf etdirilməsində yaxından iştirak edim”
Bu gün ölkəmizin strateji əhəmiyyət kəsb edən sahələrindən biri də özəl sektordur ki, bu sahənin inkişaf etdirilməsi qarşımızda duran əsas məqsədlərdən biri hesab olunur. Onu da vurğulamaq yerinə düşər ki, hal-hazırda iqtisadi inkişafımızlın təmin edilməsində, ölkə əhalisinin ən zəruri mallara olan tələbatlarının ödənilməsində, özəl sektorun xüsusi rolu olur. Belə bir səbəblər üzündən də, bu sahəyə ölkə rəhbəri səviyyəsində xüsusi diqqət göstərilir, problemlərinin həlli istiqamətində əməli addımlar da atılır.
Hələ bir müddət bundan əvvəl cənab İlham Əliyev keçirilən müşavirələrin birində “biz büdcəmizin formalaşmasını təkcə neftdən gələn gəlirlə deyil, digər sahələrdən əldə olunan gəlirlə də formalaşdırmalıyıq” demişdir. Əlbəttə, belə bir yanaşma olduqca aktuallıq kəsb etdiyindən, bu gün sahibkarlığın inkişaf etdirilməsinə daha çox önəm verilir. Hal-hazırda sahibkarlıq məsələsi olduqca həssas sahələrdən biri olduğu üçün “Sahibkarlığın bu günü” qəzetinin təsisçisi və baş redaktoru Rüstəm Zülfüqarlını “Gündəm Xəbər”in redaksiyasına dəvət edib, ondan bir çox məsələlərə konkret münasibətini öyrəndik. O, bizimlə söhbətində əksər mətləblərə toxunarkən, ortaya fərqi suallar da çıxdı. Bəlli oldu ki, o, əvvəllər Azərbaycan mətbuatında çalışmış və müəyyən səbəblər üzündən də, bir müddət bu sahədən uzaqda düşmüşdü. Odur ki, ilk sualımızı ona ünvanladıq və konkret cavablarını da əldə etdik.
Rüstəm müəllim səbəb nə oldu ki, siz xeyli müddət mətbuatdan uzaq düşdünüz?
Bəli, mən də neçə illər Azərbaycan mətbuatda çalışmışam və bu sahə sanki mənim üçün bir həyat məktəbi olub. Bu sahədən uzaqlaşmağıma səbəb isə, yalnız və yalnız ikinci ali təhsil almağım olub. Çünki ilk ali təhsilim texniki fənlər üzrə olduğundan qarşıma məqsəd qoydum və ikinci ali təhsili humanitar fənlər üzrə alım. Yəni, filologiya ixtisasına yiyələndim. Amma, az sonra həyat elə gətirdi ki, RF-sı ərazisinə getməli oldum və bir neçə illər də həmin ölkədə yaşadım. Artıq iki ildən çoxdur ki, ölkəmizə qayıtmışam və hal-hazırda da Bakı şəhərində yaşayıram.
Siz neçə illər mətbuatda çalışmısınız və əldə etdiyimiz məlumata görə bu sahə üzrə kifayət qədər iş təcrübəniz də var. Yenidən bu sahəyə qayıtmaq qərarınız varmı?
Düzdür, yuxarıda qeyd etdiyim kimi vaxtilə mətbuat formalaşmağıma olduqca təsir edib və istər mənim lazımi iş təcrübəsi qazanmağıma, istərsə də yaradıcılıq qabiliyyətimi artırmağa imkan da verib. Belə bir səbəblər üzündən də, təsisçisi və baş redaktoru olduğum qəzetin işıq üzü görməsi üçün hal-hazırda düşünürəm. Ola bilər ki, yaxın vaxtlarda “Sahibkarlığın bu günü” qəzeti yenidən çoxsaylı oxucularının görüşünə gəlsin. Çünki, rəhbəri olduğum qəzetin fəaliyyətində əsas amal, gələcəkdə sahibkarlıqla bağlı məsələlər olacaq. Artıq hər kəsə aydındır ki, bu gün ölkəmizdə sahibkarlığın bütün sahələri inkişaf etdirilir, dövlət səviyyəsində diqqət və qayğı da göstərilir.
Əldə etdiyimiz məlumatlara görə bu gün siz sahibkarlıq fəaliyyəti ilə məşğul olursunuz?
Düz buyurdunuz, mən Azərbaycana qayıtdıqdan sonra sahibkarlıq fəaliyyəti ilə məşğul olmağa başladım. Hal-hazırda fəaliyyətimi həm Bakı şəhərində, həm də doğulub boya-başa çatdığım Goranboy rayonunun Borsunlu kəndində davam etdirirəm.
Bəs səbəb nə oldu ki, fəaliyyətinizi rayonda da davam etdirməyə qərar verdiniz?
Diqqətinizə çatdırım ki, bu gün ölkə rəhbəri cənab İlham Əliyev sahibkarlığın inkişaf etdirilməsinə xüsusi önəm verir. Mən də bir sahibkar olaraq fəaliyyətimi rayonda davam etdirməyə qərar verdim ki, ölkəmizin iqtisadi cəhətdən inkişaf etdirilməsində yaxından iştirak edim. Çünki, biz bir dövlət olaraq iqtisadi cəhətdən inkişaf etməsək, heç zaman güclü ola bilmərik. Bu sahənin inkişaf etdirilməsi həm işsizliyin aradan qaldırılmasına dəstək verir, həm də əhalinin ən zəruri mallara olan tələbatlarının ödənilməsinə imkan yaradır. Mən fəaliyyətimi rayonda davam etdirməyə ona görə qərar vermişəm ki, bir mətbu orqanın rəhbəri olaraq sahibkarlıqla bağlı problemləri öz gözlərimlə görüm və onların həlli istiqamətində aidiyyəti qurumlar qarşısında məsələ də qaldırım. Düşünürəm ki, belə bir addımım yalnız ümumi inkişafımıza dəstək olacaq.
Rəhbərlik etdiyiniz təsərrüfat hansı yöndə fəaliyyət göstərir?
Düzdür, bu gün sahibkarlığın çox sahələri inkişaf etdirilir. Mənim rəhbərlik etdiyim təsərrüfatın fəaliyyəti isə, daha çox bağçılıq təsərrüfatını inkişaf etdirməkdir. Bəli, hal-hazırda rəhbərlik etdiyim təsərrüfatda böyük bağ sahələri salmışıq, kənd təsərrüfatı məhsulları yetişdiririk. Adicə onu vurğulayım ki, bağ təsərrüfatımda 2700 meyvə ağacı var. Onların içərisində Naxçıvan göycəsi, Türkiyədən gətirilmiş qoz ağacları, ərik ağacları və s. daha çoxluq təşkil edirlər. Təsərrüfatımda 33 nəfər əmək fəaliyyəti ilə məşğul olur ki, bu da xeyli ailənin dolanışığı deməkdir. Bu il təsərrüfatımızda təqribən 200 tondan çox tərəvəz məhsulları yetişdirdik və mövsüm vaxtı da satışını həyata keçirdik. Hal-hazırda qış mövsümündə məhsul yetişdirmək üçün hazırlıq işləri davam etdirilir.
Sizin bağ təsərrüfatından başqa digər sahələri də inkişaf etdirmək fikriniz varmı?
Bəli var. Hal-hazırda Türkiyədəki və Rusiyadakı iş adamları ilə danışıqlarımız davam etdirilməkdədir. Məqsədimiz təsərrüfatımızda yetişdirilən tərəvəz məhsullarının saxlanılması üçün, iritutumlu soyuducu anbarların tikilməsidir. Bu işlə yanaşı pambıq və taxıl təsərrüfatını inkişaf etdirmək məqsədilə 60-70 ha əkin sahələrinin ayrılması üçün, rayonun kənd təsərrüfatı idarəsinin rəisi Ziyad Əhmədovla da danışıqlar aparılıb. Ümumi razılaşmamız əldə olunduqdan sonra, növbəti ildə bu sahələrin də inkişafına çalışacağıq.
Həm sahibkar, həm də KİV nümayəndəsi olaraq rayonda sahibkarların üz-üzə qaldıqları problemləri görürsünüzmü?
Mən bir sahibkar olaraq onu da vurğulayım ki, bu gün rayonumuzda sahibkarlıqla bağlı məsələlrin həlli istiqamətində əməli addımlar atılmaqdadır. Buna da səbəb, ölkə rəhbərinin vermiş olduğu tapşırıqların yerli vəzifə sahibləri tərəfindən diqqətdə saxlanmasıdır. Belə ki, bu gün Goranboy rayon İcra Hakimiyyətinin başçısı cənab Nizaməddin Quliyevin, rayonun kənd təsərrüfatı idarəsinin rəhbəri Ziyad Əhmədovun diqqət və qayğısının nəticəsidir ki, rayondakı sahibkarlar fəaliyyətlərini davam etdirə bilirlər. Əgər sahibkarlardan bir kimsə problemlə üz-üzə qalarsa, o halda rayon rəhbərliyi problemin həlli istiqamətində lazımi tapşırrıqlarını verir. Bu da onu söyləməyə əsas verir ki, rayonda sahibkarlığın inkişaf etdirilməsi ilə bağlı lazımi şərait yaradılır.
Amma, əfsuslar olsun ki, sahibkarların üz-üzə qaldıqları ən böyük problem, onlara məxsus təsərrüfatların suvarma suyu ilə lazımınca təmin edilməməsi olur. Bunun da obyektiv səbəbləri var ki, bu səbəblər içərisində də ən başlıcası Azərbaycan hakimiyyətində yüksək çinli vəzifə sahiblərinin daşıdıqları vəzifələrindən sui-istifadə etmələri olur. Mən KİV nümayəndəsi olaraq yaşanan belə bir problemin varlığını aidiyyəti qurumların diqqətinə çatdırmağa çalışacağam. Çünki suvarma suyu ilə təminatın həyata keçirilməməsi, biz sahibkarlar üçün böyük bir problemə çevrilib. Hər kəsə bəllidir ki, belə bir problemin əsas səbəbkarı, yuxarıda qeyd etdiyim kimi yüksək çinli vəzifə sahiblərinin qol qoyduqları qanunsuzluqların varlığıdır. İnanıram ki, belə bir problemin varlığı hakimiyyətin ən yüksık kürsüsündə çalışan vəzifə sahibləri tərəfindən, xüsusilə də ölkə rəhbəri cənab İlham Əliyev tərəfindən diqqətdə saxlanılacaq və həlli istiqamətində müvafiq tapşırıqlar da veriləcək. O halda yəqin ki, rayon sahibkarları üz-üzə qaldıqları problemin varlığından birdəfəlik xilas olacaqlar.

Nemət Orucov