İmtahan otaqlarında quraşdırılan kameralar işlək vəziyyətdə deyil. Bu da bir çox şübhələrə yollar açır...

Deyilənlərə görə, tələbə avtomobilə yerləşdirilən zaman başı yanı üstə düşür və elə yoldaca da dünyasını dəyişir

GDU-da imtahan zamanı tələbə dünyasını dəyişir. Ölkəmizin qərb zonasında yerləşən və ikinci böyük şəhərimiz olan Gəncədə, GDU-da magistratura şöbəsinin I kursunda təhsil alan İbrahim Həşimli, ümumi pedaqoqika kafedrasının imtahan otağında qəflətən yıxılır. Onunla bağlı əldə etdiyimiz məlumatlara görə, o, olduqca savadlı və nizam-intizamlı tələbə olub. Yıxıldıqdan sonra onu universitetin Vüsal adlı işçisi təcili-tibbi yardım gələnə qədər, universitetin binasından çıxarır və minik avtomobili ilə xəstəxanaya da çatdırır. Deyilənlərə görə tələbə avtomobilə yerləşdirilən zaman başı yanı üstə düşür və elə yoldaca da dünyasını dəyişir. Onun dünyasını dəyişməsi ilə bağlı müxtəlif şübhələr baş qaldırır və belə bir fikirlər də səslənir ki, İbhahim Həşimlidən verəcəyi imtahana görə “haqq-hesab” istənilməsi, məhz onun dünyasını dəyişməsinə səbəb olan əsas faktordur. Düzdür, səslənən belə bir iddiaları hələlik mütləq şəkildə demirik və deyilənləri əsas tutaraq, hələ ki, belə bir qənaətə gəlmişik. “Gündəm Xəbər” olaraq daxil olan ölüm faktı ilə əlaqədar GDU-i səlahiyətliləri ilə əlaqə saxladıqda, qarşı tərəfin cavabı o oldu ki, “tələbə sağdır və səhhətindəki ciddi problemlə bağlı reanimasiya şöbəsinə yerləşdirilib” deyilsə də, çox keçmədi ki, universitet tərəfinin söylədikləri ağyalan çıxdı. Bu cür münasibətin bildirilməsi də, bir daha söylənilənləri dolayısı yolla olsa da isbat etmiş olur.
Onu da vurğulayaq ki, çağırış əsasında GDU-ya gələn təcili-tibbi yardımın əməkdaşları isə, başqa bir tələbəyə yardım göstərməli olurlar. Çünki deyilənlərə görə, baş verən hadisəni görən tələbə qız hadisədən şoka düşür və onun da səhhətində müəyyən problemlər əmələ gəlir. Dünyasını dəyişən tələbə İbrahim Həşimli İsmayıllı rayonundandır. O, həqiqi hərbi xidmətdə olub və sağlamlığında heç bir problemin olmadığı da söylənilir. Mərhumun imtahan verdiyi otaq, Şahin Tağıyevin müdiri olduğu ümumi pedaqoqika kafedrasına məxsus otaq olub. Bədbəxt hadisənin necə baş verməsini tam aşkarlamaq üçün, yəqin ki, əgər otaqlarda işlək vəziyyətdə olan kameralar varsa, məhz onlardan istifadə etməklə tam dəqiqləşdirmək olar.
Əldə etdiyimiz başqa bir məlumatlarda o da bildirilir ki, hal-hazırda qış-imtahan sessiyası olmasına baxmayaraq, GDU-da imtahan otaqlarında quraşdırılan kameralar işlək vəziyyətdə deyil. Bu da bir çox şübhələrə yollar açır və onu söyləməyə əsaslar da verir ki, bu ali təhsil ocağında neqativ halların görüntülənməməsi, bir çox neqativ halların ört-basdır edilməsinə yönəlik addımlardır.
P.S. Mövzunu diqqətdə saxlayacağıq və baş verən ölüm hadisəsi ilə müəyyən araşdırmalarımızı davam etdirib, çoxsaylı oxucularımızı əlavə məlumatlarla da məlumatlandıracağıq. Odur ki, bizi izləyin.

Mehriban Əzizqızı