Akif Çovdarov: “MTN-ə Mübarizi general kimi dəvət etməmişəm”

“Bu respublikada məni aldatmağa heç kimin duxu çatmaz”

Ləğv edilmiş Milli Təhlükəsizlik Nazirliyi (MTN) Energetika və Nəqliyyat Sahələrində Təhlükəsizlik Baş İdarəsinin sabiq rəisi, general-mayor Akif Çovdarov, MTN-in Energetika və Nəqliyyat Sahələrində Təhlükəsizlik Baş İdarəsinin sabiq işçisi, polkovnik Səlim Məmmədov, MTN-in sabiq idarə rəisi, mayor Akif Əliyev və keçmiş şöbə rəisi Orxan Osmanovun cinayət işi üzrə məhkəmə prosesi davam edir.

Proses Bakı Hərbi Məhkəməsinin hakimi Həbib Həsənovun sədrliyi ilə keçirilir. Təhlükəsizlik tədbirləri ilə bağlı cinayət işinə hərbi məhkəmənin binasında yox, Sabunçu rayon Məhkəməsinin inzibati binasında baxılır.

Növbəti prosesdə zərərçəkmiş Mübariz Məmmədovun iddiası üzrə ötən iclasdan yarımçıq qalmış epizoda baxılıb. Son iclasda zərərçəkmiş Mübariz Məmmədov ittiham aktındakı ifadəsini təsdiqləyib.

“Huşumu itirərək yerə yıxılmışam”

Vəkillərin suallarına cavab verən Mübariz Məmmədov bildirib ki, 18 sotluq torpaq sahəsini Səbail rayon İcra Hakimiyyətindən 1990-cı illərin ortalarında icra başçısının imzaladığı sərəncam əsasında alıb: “Sonradan həmin torpaq sahəsində Gənclər və İdman Nazirliyi ilə Bakı Şəhər İcra Hakimiyyəti tikinti işləri aparmağa başlayıb”.

Torpaq üzərində keçərli mülkiyyət hüququ haqqında sənədi olmayan zərərşəkmiş məhkəməyə müraciət edib, sərəncamla ona

verilmiş sahəni kadastra daxil etməyə müvəffəq olub: “Elə bu vaxt Rafiq Tağıyev adlı şəxs mənə 300 min manat beh verərək, 1 milyon 265 min manat qiymət qoyulmuş torpaq sahəsini almaq istədiyini bildirdi. Bir müddət sonra toprağa görə pulun yerdə qalan hissəsini tələb etdim. Bundan sonra məsələyə Akif Çovdarov qoşuldu”.

Zərərçəkmiş suallara cavabında bildirdi ki, MTN-ə dəvət olunduğu günlərin birində general Akif Çovdarov öz iş otağında ona yaxınlaşaraq sinəsinə yumruqla iki dəfə zərbə endirib: “Bu səbəbdən huşumu itirərək yerə yıxılmışam”.

Mübariz Məmmədovun sözlərinə görə, bundan 3-4 gün əvvəl o, ürəyində cərrahiyyə əməliyyatı keçiribmiş. Özünə gətiriləndən sonra zərərçəkmiş xəstəxanaya aparılıb.

“Görürdüm ki, ortada yalan var”

Akif Çovdarov Mübariz Məmmədovun ifadəsi ilə bağlı izahat verib: “Mübarizi çoxdan tanıyıram. Evimin yanında ofisi var idi. Aramızda 30 metr ancaq olardı. Bir vaxtlar bu Mübariz elə pullar qazanırdı ki, o pulları heç bu məhkəmə binasına yığıb-yığışdırmaq olmazdı. Amma özü və qardaşları o pulları yaxşı idarə edə bilmədilər. Həmin torpaq sahəsinin problemli olduğunu bilirdim. Rafiqə də dedim ki, almasın. Amma sonradan eşitdim ki, danışıblar, beh də verilib. MTN-ə Mübarizi general kimi dəvət etməmişəm, Akif kimi çağırmışam söhbət edək. Çünki görürdüm ki, ortada yalan var, mənə yalan deyilir. Bu respublikada məni aldatmağa heç kimin duxu çatmaz. Əslində, Mübariz bu işdə sadəcə pul qazanıb. Adına olmayan torpağı adına saldırmışıq, özünə də pul vermişik. Torpaq Bakı Şəhər İcra Hakimiyyətinin balansına verilmişdi. Birincisi, Akif kimi qonşusunu MTN-ə dəvət edən general onunla elə evinin qarşısında, yaxud evinə çağıraraq, 30 metr aralıda olan Mübariz Məmmədovun ofisinə gedərək

söhbət edə bilməzdimi? İkincisi, aldatmağa heç kimin “duxu” çatmayan Akif Çovdarov kiminsə əli ilə torpaq alırdısa, onu niyə Mübariz Məmmədovun adına keçirib, sonradan həmin adama xeyli məbləğdə “xeyir” verirdi? Elə birbaşa Bakı Şəhər İcra Hakimiyyətindən ala bilməzdimi? Bu suallar məhkəmədə səslənmədi”.

“Mübariz Məmmədov ürəyində ağrılar olduğunu bildirdi”

Daha sonra şahid qismində dindirilən Sevda Əzimovanın sözlərinə görə, 2013-cü ilin sonlarından 2015-ci ilin fevral ayına kimi “Gömrük” Hospitalında həkim-kardioloq işləyib: “2015-ci ilin fevral ayından indiyənə kimi “Qrand” Hospitalda həkim-kardioloq işləyirəm. 2014-cü ilin oktyabr ayının 14-də “Gömrük” Hospitalında həkim-kardioloq növbətçi olmuşam. Mübariz Məmmədov 14 oktyabr 2014-cü il tarixdə, saat 20.30 radələrində “Gömrük” Hospitalının təcili yardım şöbəsinə ürəyində olan ağrılarla müraciət edib. Həmin vaxt təcili yardım şöbəsində növbətçi həkim olan Cavad Cabbarov mənə məlumat verdikdə təcili yardım şöbəsinə Mübariz Məmmədov müraciət edərək ürəyində ağrılar olduğunu, qısa müddət əvvəl ürəyinin damarlarına stent qoyulduğunu bildirib. Dərhal təcili yardım şöbəsinin yanında yerləşən otaqda Mübariz Məmmədovun EXO kardioqrafiq və EKQ müayinəsini keçirtdim. Müayinəyə əsasən xəstədə kəskin kardioloji patologiya aşkar edilmədi. Mübariz Məmmədova hər hansı müalicəni yazıb-yazmadığını xatırlamıram. Qeyd edilən müayinələri keçirtdikdən sonra Mübariz Məmmədov evə buraxılıb”.

Şahid bildirib ki, Mübariz Məmmədovun 14 oktyabr 2014-cü il tarixdə müayinə edərkən, sonuncu ona ləğv olunmuş Milli Təhlükəsizlik Nazirliyinə aparılması ilə bağlı heç bir məlumat verməyib: “Mübarizin sinə nahiyəsinədə hər hansı xəsarətin olub-

olmamasını, həmçinin əynində olan paltarların səliqəsinin pozulub-pozulmamasını xatırlamıram”.

“Ürəyinin damarlarına stent qoyulduğunu dedi”

Digər şahid Cavad Cabarov qeyd edib ki, 2009-cu ilin sentyabr ayından indiyədək “Mərkəzi Gömrük Hospitalda” təcili yardım həkimi işləyir: “Mübariz Məmmədovu tanıyıram. 2014-cü ilin oktyabr ayının 14-də “Gömrük” Hospitalında təcili yardım şöbəsində növbətçi olmuşam. Mübariz Məmmədov həmin gün, saat 20.30 radələrində “Gömrük” Hospitalının təcili yardım şöbəsinə sinəsində olan ağrılarla müraciət edib. Mübarizi qəbul etdikdə sonuncu qısa müddət əvvəl ürəyinin damarlarına stent qoyulduğunu dedi. Dərhal növbətçi kardioloq-həkim Sevda Əzimovaya məlumat vermişəm, bir neçə dəqiqə sonra Sevda gələrək Mübariz Məmmədovun EXO kardioqrafiq və EKQ müayinəsini keçirib. Müayinəyə əsasən xəstədə kəskin kardioloji patologiya aşkar edilməyib”.

“Mübariz 2 gün hospitalda qalıb”

Şahid Samir Mustafayevin sözlərinə görə, 2011-ci ildən “Gömrük” Hospitalında həkim-kardioloq işləyir: “8 oktyabr 2014-cü il tarixdə Mübariz Məmmədov təngənəfəslik və halsızlıqla bağlı hospitala müraciət edib. Mübarizin ürəyinin tac damarlarının angioqrafik müayinəsi aparılıb və sol ön enən arteryanın orta seqmentində ciddi darlıq aşkarlanıb. Ona görə də, bir ədəd dərman örtüklü stent implantı olunub, əməliyyatı həkim Ülvi Mirzoyev həyata keçirib. Mübariz 2 gün hospitalda qalıb və sonuncunun müalicə həkimi olmuşam. 10 oktyabr 2014-cü il tarixdə Mübariz evə buraxılıb”.

“Bu vəzifəni əməliyyat heyəti həyata keçirib”

Daha sonra prosesdə ləğv edilmiş MTN-nin sabiq əməkdaşları Mübariz Məmmədovun epizodu üzrə ifadə veriblər. Şahid qismində dindirilən Bəhruz Orucov qeyd edib ki, 2009-cu ildən Milli Təhlükəsizlik Nazirliyində işləyir: “2009-cu ildən 2011-ci ilə kimi ilk olaraq MTN-in Qax rayon şöbəsində əməliyyat müvəkkili, 2011-ci ildən 2013-cü ilə kimi ləğv olunmuş MTN-in 6-cı Baş İdarəsinin 1-ci idarəsinin, 2-ci şöbəsində, 2013-cü ildən 2016-cı ilin yanvar ayına kimi ləğv olunmuş MTN-in 6-cı Baş İdarəsinin 3-ci idarəsinin, 3-cü şöbəsində baş əməliyyat müvəkkili vəzifəsində işləmişəm. 2016-cı ilin yanvar ayından DTX-nın 4-cü baş idarəsinin, 2-ci idarəsinin, 2-ci şöbəsində baş əməliyyat müvəkkili vəzifəsində işləyirəm. Mübariz Məmmədovu tanımıram. Onun MTN-in əsas inzibati binasına sabiq baş idarə rəisi Akif Çovdarovun qəbuluna aparmağını xatırlamıram. Ümumiyyətlə Akif Çovdarovun qəbuluna gələn qonaqlarını, eləcə də digər şəxsləri nəzarət-buraxılış məntəqəsindən sonuncunun qəbul otağına gətirilməsi üçün hər hansı bir ştat nəzərdə tutulmadığından bu vəzifəni əməliyyat heyəti həyata keçirib. Ola bilsin ki, Mübariz Məmmədovu Akif Çovdarovun qəbuluna qədər müşayiət etmişəm. Lakin, onun hansı məqsədlə Akif Çovdarovun yanına çağırılmasından məlumatım yoxdur”.

Şahid qismində ifadə verən Elşən Bəyalıyevin sözlərinə görə, 20 iyun 2006-cı ildən Milli Təhlükəsizlik Nazirliyində işləyib: “İlk vəzifəm 3-cü baş idarənin əməliyyat müvəkkili vəzifəsi olub, sonradan MTN-in Akademiyasına dinləyici kimi getmişəm, 2008-ci ildə kursdan qayıtdıqdan sonra MTN-in IV baş idarəsinin 1-ci idarəsinin 1-ci şöbəsinin 2-ci bölməsinin əməliyyat müvəkkili işləmişəm. 2009-cu ildən VI baş idarə IV baş idarədən ayrılıb. Bundan sonra öz vəzifəmdə qaldığım üçün avtomatik olaraq VI baş idarənin 2-ci idarəsinin 2-ci şöbəsinin baş əməliyyat müvəkkili vəzifəsində işləməyə davam etmişəm. İdarə rəisi Akif Əliyev, şöbə rəisi isə Orxan Məmmədov olub. Bölmələr isə ləğv olunub. Bu

vəzifədə 7 il işləmişəm, 2016-cı ilin yanvar ayında tərxis olunmuşam. Hafiz Abekarovu tanımıram, onu keçmiş MTN-in əsas inzibati binasına sabiq baş idarə rəisi Akif Çovdarovun qəbuluna aparmağım yadına düşmür. Bir neçə dəfə Akif Çovdarovun yanına gələn şəxsləri nazirliyin giriş qapısından müşayiət edərək aparmışam. Ola bilsin Hafiz Abekarov da müşayiət etmişəm, lakin Hafisin hansı məqsədlə Akif Çovdarovun yanına çağırılmasından məlumatım olmayıb. Hafiz adlı şəxsin MTN-ə keçirilərək Akif Çovdarovun yanına aparılması ilə bağlı göstərişi kimin verdiyini xatırlamıram”.

Aslan
gundemxeber.az