Dövlət başçısının “onların cəzası veriləcək” mesajının ertəsi Şirvanın icra başçısı baş həkimi “devirdi”, onu xəstəxanalıq etdi, yerinə alverçi tapdı

Nazir qardaşının xəstəxanada və digər dövlət binalarında tender əməliyyatlarının şok dosyesi “Gündəm-Xəbər”də...

Bu həftənin gündəminə çoxdandır ki, görünməyən Şirvan şəhər icra hakimi Mərdan Camalov möhrünü vurdu.

Müdafiə sənayesi naziri Yavər Camalovun qardaşı Şirvanın baş həkimini hirsləndirib koma vəziyyətinə çatdırması xəbəri ilə mətbuatın diqqət mərkəzinə gəldi.

“Paket” davası böyüdü

“Gündəm-Xəbər”in verdiyi məlumata görə, ölkə mediası M.Camalovun baş həkim Fərhad Səfərovla mübahisəsindən danışır.

Sosial şəbəkələrdə və elektron mediada gedən müzakirələrdə qeyd olunur ki, Şirvanın icra başçısının şəhər Mərkəzi Xəstəxanasında “çevrilişi” səs-küyə səbəb olub.

İcra hakiminin baş həkimdən əvvəlki qaydada “paket”i çatdırması tələbi və iqtisadi böhranı nəzərə almaması qovğa yaradıb.

Mübahisə zaman stress keçirən F.Səfərov evə qayıtdıqdan sonra halı pisləşib və xəstəxanaya yatırılıb. Lakin şəkər xəstəsi olan baş həkimin durumunun ağırlaşmasına görə Bakıya çatdırılıb. Onun 1 həftə Bakı Sağlamlıq Klinikasında müalicə aldığı haqda mətbuatda xəbərlər yayılıb.

Onunla bağlı Şura iclasının çağırılması qərara alınıb. Hətta məsələ mətbuata çıxandan sonra icra başçısı humanitar məsələlər üzrə müavini Elmira Ağayevanı xəstəxanaya göndərib.

E.Ağayeva Şirvan mərkəzi xəstəxanasında işlərə nəzarət edir və RİH mediada olayı ört-basdır etməyə çalışır. Hazırda M.Camalov onun başına bu işi açan E.Ağayeva qarşısında tələb qoyub ki, məsələni həll etsin.

Çünki başçı müavini xəstəxanada baş həkimin əvəzindən göstəriş və tapşırıqlar verir. Ümumiyyətlə Elmira Ağayeva Şirvan şəhəri üçün bir böyük bəlaya çevrilib.

Deyilənə görə, M.Camalov baş həkimə ötən ilki aylarda olan aylıq pulun azaldılmamasını bildirib. Baş həkim Fərhad Səfərov isə bu ilki büdcənin məlum iqtisadi böhran ucbatından kəsildiyini və əvvəlki illərin qazancının olmadığını desə də, icra başçısı qəbul etməyib.

İcra başçısı baş həkimi əlavə qazancı səhiyyə naziri Oqtay Şirəliyevə çatdırmaqda ittiham edib. Bu mübahisə böyüyüb və baş həkim evinə gələrək ciddi əsəb keçirtdiyindən şəkəri qalxıb, komaya düşüb. Bütün bunlardan sonra qalmaqal səngiməyib.

Başçının namizədi - poliklinika müdiri

“Gündəm-Xəbər”in verdiyi məlumata görə, Mərdan Camalov baş həkimlə arasında olan konfiliktin mediaya sızmasından bərk narahat olub.

Prezident İlham Əliyevin müşavirədə icra başçılarına xəbərdalıq etməsi ilə paralel ictimailəşməsi Mərdan Camalovun “qara siyahı”ya düşməsinə səbəb ola bilər.

İddialara görə, Mərdan Camalov xəstəxananın baş həkimi postuna kadr da müəyyənləşdirib. Mərdan Camalovun ən yaxın adamı olan həmin şəxs hazırda Şirvan poliklinikasının müdiri Şakir Qədirovdur.

Bu adamı Mərdan Camalovun təkidi ilə poliklinkaya müdir təyin ediblər. Şakir Qədirov ixtisasca cərrahdır. Təkbaşına heç vaxt əməliyyata girməyib. Akif, Namizəd və digər cərrahlarla əməliyyatda olub. Amma Şirvanda hamı Şakir Qədirovu alverçi kimi tanıyır.

Mərdan Camalovun dayısı kollec direktoru Balamirzə Məmmədovla Şakir Qədirov Türkiyədən Şirvana paltar gətirib satırdılar.

Şakir Qədirov Mərdan Camalova o qədər yaxındır ki, yol polisi işləyən oğlu Eminin toyunun dəvətnaməsini ona yazdırırdı. İndi məqam yetişib Şakir Qədirov artıq baş həkim olmağa iddialıdır.

Maraqlısı odur ki, xəstəxanada bütün məsələlər Mərdan Camalovun müavini Elmira Ağayevanın iradəsi ilə həll olunur. Xəstəxanaya adicə xadiməni Elmira Ağayeva götürürdi. Beləliklə, Səhiyyə Nazirliyindən daha çox, Şirvan şəhər rəhbərliyi bu xəstəxanaya nəzarət edir.

Onu da deyək ki, mətbuatda bu məsələlər üzə çıxsa da, ŞİH tərəfindən heç bir açıqlama verilməyib. Nə xəstəxanadan, nə nazirlikdən, nə də Şirvan şəhər rəsmilərindən kimsə bu xəbəri təkzib, ya da təsdiq edib.

Bu susqunluq bəlli olmasa da, M.Camalovun media emissarları sayəsində minnətçi düşdüyü, məsələni körükləməməyi xahiş etdiyi, mətbuatda ört-basdır etməyə çalışdığı iddia olunur. Hərçənd, rəsmi bir bəyanat ya da press-reliz olmalıydı.

Başçının xəstəxanada tender əməliyyatı

“Gündəm-Xəbər”in verdiyi məlumata görə, 2015-ci ildə Şirvan Şəhər Mərkəzi Xəstəxanasının digər satınalmaları da çox maraq doğurur.

Belə ki, xəstəxana “Elem-5” MMC-dən həm məişət avadanlıqları(29520 manatlıq), həm də Avtonəqliyyat vasitələri üçün ehtiyat hissələri(9070 manatlıq) alıb. Nə hikmətdirsə, bu MMC Şirvan Müalicə Diaqnostika Mərkəzinə də ərzaq məhsulları tədarük edib – 28 000 manatlıq.

Şirvan Mərkəzi Xəstəxanası camaşırların yuyulması işini 2 il dalbadal eyni şirkətə - “Şahin-1” MMC-yə həvalə edib.

2015-ci ildə bunun üçün MMC-yə 26520 manat, 2016-cı ildə isə 27359,5 manat ödənilib. Bundan əlavə, həmin MMC xəstəxanadan 2015-ci ildə cari təmir işləri üçün 7807 manatlıq sifariş də alıb.

Xəstəxana 2015-ci ildə blank və dəftərxana ləvazimatları üçün "Progress" MMC-yə 66 979 manat, Təsərrüfat malları və materialları üçün “Aynur-M” MMC-yə 23 570 manat verib.

Şirvan Şəhər Mərkəzi Xəstəxanasının 2015-ci ildə 187 min 543 manatlıq ərzaq və çörək məhsulları tədarük etdiyi MMC-nin adı tender siyahısında “Aran kompani MMC” kimi qeyd olunub.

Vergilər Nazirliyinin sistemində bu adda MMC tapılmadı. Bu ada daha yaxın olan və Şirvanda qeydiyyatdan keçən şirkət "ARANKOMPLEKS-TTQT" MMC-dir.

Siyahıdakı MMC-nin məhz "ARANKOMPLEKS-TTQT" olduğunu qəti söyləmək mümkün olmasa da, onun qanuni təmsilçisinin Həsənov Həsən Bayram oğlu olması bu ehtimalı gücləndirir.

Belə ki, H.Həsənov Şirvan şəhər dövlət strukturlarından irihəcmli sifarişlərə sahiblənən “Xidmət+Təchizat” MMC-nin də qanuni təmsilçiliyini həyata keçirir.

Şirvanın baş bəlası - Elmira Ağayeva

“Gündəm-Xəbər”in verdiyi məlumata görə, iş təkcə baş həkimlə bitmir. Şəhər icra hakimiyyətinə ayrılan dotasiyalar kəsilib. Hökumət qənaət rejiminə keçib və prezident hər bir rayonun öz resursları hesabına özünü saxlamalı olduğunu vurğulayıb.

Mənbələr qeyd edir ki, uşaq bağçalarında boş yataq yerinin siyahısı M.Camalovun stolunun üstündədir. Bağçaya qəbul edilən uşaqlara M.Camalov müavini Elmira Ağayevanın əliylə nəzarət edir.

Uşaq bağçalarına qida məhsullarını yalnız Əliheydər alıb verməlidir. Bağça uşaqları yalnız Əliheydərin aldığı ərzaq məhsullarını yeyirlər. Səbəbini M.Camalov hamıdan yaxşı bilir.

M.Camalovun humanitar məsələlər üzrə müavini Elmira Ağayevaya kurasiyasında olan orta məktəblərə, məktəbə qədər müəssisələrə, uşaq baxçalarına, xəstəxanaya, müalicə diaqnostika mərkəzinə, mədəniyyət şöbəsinə yüksək peşəkarlıqla nəzarət edir.

Bu müəssisələrə işə qəbul olunmaq istəyən şəxs yalnız Elmira Ağayevanın qəbuluna gəlib razılıq və xeyir dua almalıdırlar. Sual verən yoxdur ki, E.Ağayeva bu müəssisələrin kadrlar idarəsinin rəisidirmi? E.Ağayevanın qarşısında kimsə səsini çıxarda bilməz.

Kimsə cəsarət tapsa dərhal Ağayevanın diqtəsi ilə Camalovun qəzəbinə tuş gələr. Şirvan sakinləri, eləcə də adını qeyd etdiyimiz müəssisələrin rəhbərləri E.Ağayevanın əlindən cana doyublar.

Xəbərdə o da deyilir ki, köhnə telestudiyanın yanındakı ağ qum karyeri M.Camalova məxsusdur. Karyerdən yük maşınlarının həcmindən asılı olaraq hər maşına 20- 30 manat qum doldurulur və satılır.

Karyerə Mərdan Camalovun ən etibarlı kadrı olan Su Kanal idarəsinin müdiri Hamlet Hüseynov rəhbərlik edir. M.Camalovun ən gəlirli sahəsi isə ağac biznesidir. 1 ağaca maşın toxunsa hər ağaca 1000 manat pul ödəməlisən.

Bütün bunlar azmış kimi, böyük pullar silməkdə mahir olan Şirvan rəhbərliyi barədə faktlar var. Mətbuatda bunların bir qismi yayılıb. Belə aydın olur ki, icra başçısı dövlətin pullarını külə döndərib. Bu faktları təqdim edirik:

Silinən dövlət pulları - Faktlar

“Gündəm-Xəbər”in verdiyi məlumata görə, tender qalibi olan şirkətlərin əksəriyyəti ya eyni hüquqi ünvanda yerləşir, ya qanuni təmsilçisi eyni və ya bir ailənin üzvləridir, ya da qeydiyyat günləri eynidir.

Yəni, rayonda heç bir qurumun büdə xərcləmələri rayon icra hakimiyyətinin “xeyir-duası” olmadan həyata keçirilə bilməz. Bu baxımdan aşağıda qeyd edəcəyimiz pozuntu faktlarının hamısında Şirvan şəhər İcra Hakimiyyətinin başçısı Mərdan Camalovun “payı”nın olmasına şübhə yoxdur.

Şirvan şəhər İcra Hakimiyyətindən 2015-ci ildə Abadlaşdırılma və asfaltlaşdırma işlərinə 821 973 manat, 2016-cı ildə isə şəhər yollarının təmiri işlərinə 821383,84 manat – üst-üstə 1 milyon 643 min 356,84 manat alan Müstəqil Çoxsahəli “Muğan-1” firmasının imici kifayət qədər mənfidir.

Belə ki, 2013-cü ildən bəri Hacıqabul rayon İcra Hakimiyyətindən yol çəkilişi və təmiri, digər tikinti-təmir işləri üçün milyonlarla manata vəsait alan bu firmanın gördüyü işlərin keyfiyyətsizliyinə, firmanın rəhbəri olan İlham Əzizli ilə Hacıqabul RİH-in başçısı Əhməd Muxtarov arasında qaranlıq sövdələşmələrin olmasına dair KİV-də saysız-hesabsız məlumatlar yer alıb. Bütün bu iddia və ittihamlarla bağlı M.Camalovdan müsahibə almağa, mövqeyini dərc etməyə hazırıq.

Rafiq Qara