“Vaqif Mehdiyev qəbula gələn vətəndaşları təhqir edir”

Ucar rayon sakinləri redaksiyamıza şikayət məktubu ünvanlayıb. Onların şikayəti Ucar Rayon İcra Hakimiyyəti başçısının müavini, Sosial İqtisadi İnkişafın təhlili və proqnozlaşdırması şöbəsinin müdiri Vaqif Mehdiyevdəndir. Şikayətçilər bildirir ki, onun kobud hərəkətləri rayon sakinlərində narazılıq yaradır:

“Bu adam vəzifəsinə atasının mirası kimi baxır. Qəbullarda vətəndaşları çəkinmədən təhqir edir, kobud sözlər işlədir. Çox təəssüflər olsun ki, rayon icra başçısı onun barəsində heç bir ölçü götürə bilmir”.

Rayon sakinləri bildirir ki, Vaqif Mehdiyev özünü o dərəcədə özbaşına aparır ki, hətta evində istifadə etdiyi elektirik enerjisinin pulunu vermədiyindən küllü miqdarda borcu yaranıb: “Elektirik şəbəkəsinin əməkdaşları ondan işıq pulunu ala bilmirlər. Sakini olduğu Ucar rayonu, Qazyan kənd ərazisində yerləşən böyük fermasında işçilərlə əmək müqaviləsi bağlamadan onların əməyini istismar edir. Yüzlərlə hektar torpaq sahələrinin vergisini ödəmir”.

Sakinlər qeyd edirlər ki, Vaqif Mehdiyev sabiq baş nazir Surət Hüseynovun komandasının üzvüdür: “Surət Hüseynov Azərbaycanı tərk edib Rusiyaya qaçanda Vaqif Mehdiyev də respublikanı tərk edib Rusiya bazarlarında alverlə məşğul olurdu. Ara sakitləşəndən sonra yenidən Azərbaycana qayıdıb vəzifə ala bildi.Vaqif Mehdiyev ona aid məsələnin həll edilməsi üçün qəbula gələn rayon sakinlərini acılayıb təhqir edir, vətəndaşların şikayətinə, xahişinə qətiyyən baxmır. Çox təkəbbürlü, ədabaz və acıdil olan Vaqif Mehdiyevdən rayon sakinlərinin xoşu gəlmir. Hamı bu özbaşına məmura nifrət edir”. Ucar sakinləri bildirilər ki, Vaqif Mehdiyev hətta öz qohum-qardaşı ilə də yola getmir, onları dindirmir, hamısı ilə küsülüdür: “Biz çox xahiş edirik Prezident cənab İlham Əliyev keçmiş baş nazir Surət Hüseynovun tör-töküntüsü olan Vaqif Mehdiyevin barəsində tədbir görsün.Vaqif Mehdiyevin əsl vəzifəsi qoyun sürüləri otarmaqdır”.

Məktubu Ucar rayon sakinləri Məmmədov Sabir Qulam oğlu, Qəhrəmanov Səadət Camal qızı, Feyzullayev Fərhad Raqif oğlu, Cəbiyev Novruz Qasım oğlu, Babayeva Dursun Vəli qızı, Qəniyev Tahir Eldar oğlu imzalayıblar.

Samir