Artıq dərs ili yekunlaşmaq ərəfəsində olsa da, bu gün də 4 saylı tam orta məktəbin lazımınca formalaşmadığı bildirilir

Abşeron rayonu Masazır qəsəbəsi 4 saylı tam orta məktəbi 2016-2017-ci ilin tədris-buraxılış ilinə təhvil verildi. Deyilənlərə görə az sonra məktəbin kollektivi müəyyən mənada formalaşdı və dərs ilinə başlamaq üçün, hətta lazımi addımlar da atıdı. Övladını adı çəkilən məktəbə təhsil almağa göndərmək istəyində olan valideyinlər və ictimaiyyət nümayəndələri isə, çox sevindilər. Çox keçmədi ki, şagirdlərin sənədləri qəbul edildi və 15 sentyabrda ilk dərs günü açıq elan olundu. Təhsil ocağı rəhbərliyinin tapşırığına əsasən 730-da məktəbin qarşısına toplaşan şagird və valideyinlər, deyərdim ki, xəyal qırıqlığına dalmışdılar. İlk dərs günü adicə təşkilatçılığın öhdəsindən lazımınca gələ bilməyən və adı çəkilən təhsil ocağına rəhbərlik edən Xatirə müəllimə, həmin gün yeni məktəbdə uğurların artan dinamika ilə müşahidə olunacağına vəd versə də, yaşanan sonrakı durumun varlığı isə, məhz verilən vədlərin boş-boş xülyalardan başqa bir şey olmadığını da sübuta yetirdi.
Artıq dərs ili yekunlaşmaq ərəfəsində olsa da, bu gün də 4 saylı tam orta məktəbin lazımınca formalaşmadığı bildirilir. Deyilənlərə görə Təhsil Naziri adı çəkilən məktəbin müəllim kollektivinin necə formalaşmasını və bu təhsil ocağının fəaliyyətini daim diqqətdə saxlayır. O halda sual oluna bilər ki, əgər deyilənlər doğrudursa, yəni 4 saylı tam orta məktəb lazımınca diqqətdə saxlanılırsa və həmin təhsil ocağına Xatirə xanım rəhbərlik edirsə, bu millətin gələcəyi məhvə sürüklənmirmi?
Təəccüb doğuran hal odur ki, ötən aylar ərzində məktəbin lazımınca formalaşmaması qalsın bir yana, dərs saatları başa çatan kimi məktəbi şagirdlərdən əvvəl müəllimlər tərk edirlər. Buna da səbəb o olur ki, bu gün 4 saylı tam orta məktəbə rəhbərlik edən Xatirə xanımın sözü müəllim və şagirdlər tərəfindən eşidilmir. Diqqəti bir məqama da yönəldək ki, ölkə qanunlarının bu təhsil ocağında tətbiqinə o qədər də həvəs göstərilmir. Bu haqda məlumatları “Gündəm Xəbər”ə çatdıran sakinlərin iddialarına görə, təhsil ocağının rəhbərliyi təsdiq olunmuş təqvimə əlavə qeyri-iş günləri də əlavə edir. Məsələn, bu ilin 18 mart günü ölkə ərazisində rəsmi iş günü olsa da, Abşeron RİH başçısının vermiş olduğu tapşırıq həmin günün qeyri-iş gününə çevrilməsinə də səbəb olur. Belə ki, adı çəkilən təhsil ocağına rəhbərlik edən Xatirə xanım, həmin gün rayon rəhbərliyindən Novruz-Bahar bayramı ilə bağlı tədbirlər keçiriləcək deyə tapşırıq aldığını bildirir və “bu gün iş günü deyil” deyərək, 4 saylı tam orta məktəbdə qeyri-iş günü elan edir.
Hələ bu azmış kimi məktəb direktorunun idarəçiliklə bağlı irəli sürdüyü təkliflər də, bu gün hər kəsin diqqətini cəlb etməkdədir. Məsələn o, təklif edir ki, valideyinlər iməcilik təşkil etməli, məktəbin şüşələrini silməli, çirklənən divarları təmizləməli, hətta tualet otaqlarını belə diqqətdə saxlamalıdırlar. Belə olan halda məktəbin ştat cədvəlini və idarəçiliyini yenidən nəzərdən keçirməyə zərurət yaranır və buna görə də cənab Mikayıl Cabbarovun tələsməsinə yəqin ki, ehtiyac duyulur. Belə olan halda ortaya çoxsaylı suallar da çıxır. Görəsən məktəbin ştat cədvəlində adı gedən və hər ay büdcədən xeyli məbləğdə maaş alan texniki işçilər nə işlə məşğul olurlar ki, Xatirə xanım valideyin köməyinə ehtiyac duyulduğunu bildirir?
P.S. Bu yöndə araşdırmamız davam edəcək və növbəti saylarımızda çoxsaylı oxucularımızı daha ətraflı məlumatlarla məlumatlandırmağa çalışacağıq. Odur ki, bizi izləməyi unutmayın.

Mirzə