Əlillərin hüquqlarını pozduqlarına görə
Məmur özbaşınalığı o həddə çatıb ki, konstitusion hüquq və azadlıqlarından yararlanmaq istəyində olanlar azadlıqlarından belə məhrum edilmək təhlükəsi ilə üzləşirlər. Hətta Ana Qanununun – Konstitusiyanın 57-ci maddəsi ilə təsbit olunan müraciət etmək hüququna görə insanlar təqib olunur, çeşidli bəhanələrlə adi bir sorğuya belə illərlə cavab da verilmir. Ən çox “modda olan” bəhanə aidiyyatla bağlıdır. Fikir verin, 10 ildir həm Bakı Şəhər İcra Hakimiyyəti (BŞİH), həm də Əmlak Məsələləri Dövlət Komitəsi (ƏMDK) yanında Ünvan Reyestri – Kadastr Xidməti bu sətirlərin yazarının “Bakı, Nərimanov prospekti -2 ünvanının olub-olmaması haqqında” jurnalist sorğusuna “bu ona, o buna aid etməklə” cavab verməkdən imtina edir. Halbuki jurnalistlərin operativliyini itirmək qorxusu olan sorğularına anında, ən geci 24 saata cavab verilməsi, cavabdan imtinaya görə inzibati qaydada cərimə tətbiq olunması “Kütləvi informasiya vasitələri haqqında “ qanunun tələbidir . Adi bir ünvanın olub-olmamasını reyestrdən müəyyən etməklə anında cavab vermək bir yana dursun, illərdir ümumiyyətlə cavab verməkdən imtina olunmasını nə ilə izah etmək olar?
Əlillərin ölkə qanunları , BMT konvensiyaları ilə təsbit olunan hüquqlarının tanınmaması ,əksinə, qanunların , fərmanların , qərarların yanlış təfsir edilməsi , çox zaman gizlədilməsi ciddi narazılıq yaradır . Fikir verin , Dövlət Sığorta Kommersiya Şirkəti (DSKŞ) 26 ildir Qarabağ əlilləri və şəhid ailələrinə dövlətin ayırdığı “qanpulu”nu mənimsəyir, hətta Konstitusiya Məhkəməsinin (KM) mübahisə, təsfir oluna bilməz qərarlarını “qarnına uyğun” təsfir edir, nə KM-in özü, nə hüquq- mühafizə orqanları, nə də digər nəzarətedici qurumlar tədbir görür. Maliyyə Bazarlarına Nəzarət Palatası isə özü KM-in qərarını DSKŞ-nın təzyiqilə yanlış təsfir edir! Ümumiyyətlə, yanlış –doğru, KM-in qərarı rəsmi təsfir edilə bilməz! Beləcə , illərdir qanını verən əlil, şəhidlərin qan pulunu maliyyə qurumları yediyindən əlillər BŞİH-ə konstitusion sərbəst toplaşmaq azadlıqlarının gerçəkləşməsi üçün müraciət ediblər . BŞİH başçısı Hacıbala Abutalıbov mitinqə ehtiyac olmadığını bildirib , Maliyyə Nazirliyinə məsələyə aydınlıq gətirilməsi üçün məktub göndərib . Maliyyə Nazirliyi 17.01.2017 tarixli 05/05-44-316 saylı məktubla BŞİH-ə əlillərin qanpulundan tutmuş, sosial obyektlər ayrılmasınacan sosial hüquqlarının maddi təminatı barədə rəsmi məktubla cavab verib. Di gəl, 3 aydan çoxdur nə BŞİH, nə də Maliyyə Nazirliyi həmin məktubun-sənədin nə əslini, nə də təsdiq olunmuş surətini müraciət edənlərə verir. Hər iki qurum yalnız məhkəmə, yaxud Ədliyyə Nazirliyinin sorğusundan sonra sənədi verəcəyini bildirib. Belə çıxır, vətəndaş müraciətinə cavabı da məhkəmə yolu ilə almalıdır ?
Müraciətlərinə cavabı BŞİH və Maliyyə Nazirliyi qarşısında etiraz piketi keçirmək yolu ilə əldə etmək istəyən əlillərə şəhər rəhbərliyindən belə hüquqlarının olmadığını “Əlillərin Müdafiə Komitəsi”nin qanunsuz olması ilə izah edilib . Deməli, yalnız Milli Şura və digər qeydiyyata alınmayan birliklərin toplantılarına icazə verilir ? Əlacsız qalan əlillər 1 saylı Bakı İnzibati İqtisadi Məhkəməsində BŞİH və Maliyyə Nazirliyinə qarşı “Pozlumuş müraciət, sərbəst toplaşmaq hüquqlarının bərpası və müraciətlərinə verilən cavabın əslinin verilməsinin təmin edilməsi “ tələbi ilə iddia qaldırıblar. Cavabdehin hər birindən mənəvi ziyana görə 10 min manat kompensasiya da tələb olunur.
Məzhəkə onda olacaq ki, məhkəmə iddianı rədd edəcək, ya da mümkünsüz sayacaq ...

Məğrur Bədəlsoy