Arzu Rəhimovun Novruzəli Orucovdan sonra əl-qolu açılıb: Xidmət rəisi uniforma biznesi, “niqodnıy” bilet alveri, komissarlıq binalarında maxinasiyada ittiham edilir
Oğlu avtobus şoferini döydüyü üçün işdən atılan generalla Arzu Rəhimovun arasından “pişik keçib”, onun postuna göz dikibmiş - Təfsilat

Səfərbərlik və Hərbi Xidmətə Çağırış üzrə Dövlət Xidmətinin rəisi Arzu Rəhimovun müavini postu hələ ki boş qalıb.
“Gündəm Xəbər” qəzetinin verdiyi məlumata görə, A.Rəhimov müavini Novruzəli Orucovun gedişinə sevincək olub. Çünki general rəisin postuna çoxdan göz dikmişdi.
Onu himayə edən Vahid Əliyev isə PA-dakı vəzifəsini itirdi. Bir tərəfdən də oğlu ilə bağlı məsələ onun ümidlərini yerə vurdu.
Bundan sonra N.Orucova vəzifə veriləcəyi inandırıcı deyil. Deyilənlərə görə SHXDÇDX-də bəzi şöbə və rayon idarə rəisləri Orucova “rəis” deyə müraciət edirdilər.
Bu müraciətləri ilə onlar Arzu Rəhimovu rəis kimi görmək istəmədiklərinə eyham vurmaqla yanaşı, N.Orucou bu postda görmək istədiklərini bildirmiş olurdular.
Düzdür, iddia olunan bu məlumatın nə dərəcədə gerçək olduğunu bilmirik. Ancaq bununla belə Arzu Rəhimovla Novruzəli Orucovun arasının soyuq olduğu strukturda hamıya aydındır.
Orucov zaman-zaman SHXDÇDX-nin rəis olmaq üçün mümkün olan bütün əlaqələrindən istifadə edib.
Məlumatlara görə, bir zamanlar qılıncının dalı da, qabağı da kəsən sabiq Nəqliyyat naziri Ziya Məmmədovun qrupunda yer alan Novruzəli Orucov rəis olmaqdan ötrü Ziya Məmmədovdan da kömək istəyib.
Ziya Məmmədov isə bu məsələdə Novruzəli Orucova lazımi dəstəyi verəcəyini deyib. Lakin indi hər iki məmur vəzifəsindən uzaqlaşdırılıb.
Novruzəli Orucov bir zamanlar xidmət rəisi olmaq üçün Ziya Məmmədovdan olduğu kimi, Prezidentin Müdafiə məsələləri üzrə köməkçisi, Prezident Administrasiyasınıı rəhbərinin müavini, general-leytenant Vahid Əliyevin də dəstəyini ala bilmişdi.
General Novruzəli Orucovun oğlu Rüstəmin xuliqanlığa görə həbs edilməsi və atasının işdən qovulması hakimiyyətdəki bir sıra məmurlara növbəti dərs oldu desək yanılmarıq. Çünki beləsi olmamışdı və ölkə başçısı çox ciddi bir cəza verdi.
Bundan sonra A.Rəhimovun müavini təyin olunmayıb. Xidmət rəisinin əl-qolunun açıldığını iddia edən mənbə qeyd edir ki, onun bütün sahələri əlində cəmləşdirəcəyi söylənir.
Bundan əlavə, “niqodnıy” bilet biznesi və digər korrupsiya əməliyyatlarında A.Rəhimovun inhisarçılıq yaradacağı bildirilir. Odur ki, bundan yaxşı fürsət olmazdı.
“Gündəm Xəbər” qəzetinin verdiyi məlumata görə, Arzu Rəhimov hərbi komissarlıqlarda geyim biznesi qurub. Mətbuatda gedən məlumatlara görə, general hərbi komissarlıqlarda xidməti uniformaları satışa çıxarıb.
Dövlət tərəfindən komissarlıq işçilərinə pulsuz paylanmalı olan uniformalar A.Rəhimovun arzusu ilə pulla satılır. Nəticə etibarı ilə Xidmət rəisi dövlətin verdiyi geyimlərdən pul qazanır.
Amma qeyri-rəsmi və gizli şəkildə həyata keçirilən bu əməliyyata görə heç kəs şikayət edə bilmir. Hər bir SHXÇDX əməkdaşı ehtiyat edir ki, vəzifəsindən kənarlaşdırıla bilər.
A.Rəhimovun uniformalarla yanaşı komissarlıq binalarının təmiri və tikintisi işlərindən də pul mənimsədiyi iddia edilir.
Deyilənə görə, Xidmət rəisi regionlarda komissarlıqların təmir və yenidənqurması işlərinin xərcini komissarların boynuna qoyur. Baxmayaraq ki, dövlət tərəfindən bu işlərə vəsait ayrılır.
Amma A.Rəhimov ayrılan maliyyəni mənimsəyərək komissarları öz cibindən xərc çəkməyə məcbur edir. İddialara görə, belə bir hal bu yaxınlarda Cəlilabadda yaşanıb.
Komissar Həsrət Rüstəmov 110 min manat xərcləməli olub. Hətta yaxın çevrəsinə danışıb ki, evini satmağa məcbur olub.
Generalın uniforma və komissarlıq binaları biznesi onun var-dövlətinin artmasına, oliqarxa çevrilməsinə səbəb olub. A.Rəhimov hərbi sahədə məmur deyil, bir oliqarxa çevrilib.
Ona görə də Bakı şəhəri Nərimanov rayon Teymur Əliyev küçəsində, Ukrayna Respublikasının ölkəmizdəki səfirliyi yaxınlığında yerləşən bir malikanənin A.Rəhimova aid olması təsadüfi deyil.
Çox maraqlıdır ki, ölkədə səfərbərliyə birbaşa rəhbərlik edən,və rəhbərlik etdiyi sahənin bütün xərclərini dövlətin qarşıladığını diqqətə alsaq Arzu Rəhimovun belə bir cəh-cəlala necə sahib olduğu aydınlaşmalıdır.
Azərbaycanda müxtəlif tip məmurlar əmlak vergisindən yayınmaq üçün belə dəb-dəbəli daşınmaz əmlakları bəzən yaxın qohumlarının,sürücülərinin və digər şəxslərin adına sənədləşdirərək gözdən pərdə də asa bilirlər.
Mediada gedən məlumatda iddia edilir ki, generalın malikanəsində yaşayış yoxdur. Malikanənin qarajında 5 lüks avtomobil var ki, bu avtomobillərin ümumi dəyəri 500 yüz min manata yaxındır.
Malikanənin Arzu Rəhimovun Tahir adlı şəxsdən 2 milyon manata alıb. Daxil olan məlumatda qeyd edilir ki, hazırda malikanəyə Arzu Rəhimovun sürücüsü olmuş şəxs nəzarət edir.
Beləcə, A.Rəhimovun uniforma biznesi, maxinasiyalar, əsgərlikdən yayınma biznesi və s. kimi hallarla bağlı monopolistə çevriləcəyi qeyd edilir.
Maraqlıdır ki, bu Xidmətin yaranma tarixi çox uzaq deyil. Yəni, son bir neçə ildir ki Səfərbərlik Xidməti yaradılıb.
Ancaq çox qısa müddətdə A.Rəhimov bu sahəyə rəhbərlik etməklə milyonlara sahiblənib, böyük maliyyə əldə edib və oliqarx-general olub. N.Orucovun gedişi isə xüsusi olaraq Xidmətdə toy-bayrama gətirib çıxarıb.
A.Rəhimov müavinindən əbədi qurtuluşu sevincə səbəb olub. Onun yeni müavini isə çətin ki, mövqeləri bu qədər möhkəmləndirə bilsin.
“Gündəm-Xəbər” media üzərindən apardığı araşdırmaya əsasən yazır ki, Arzu Rəhimovun rəis olduğu Səfərbərlik və Hərbi Xidmətə Çağırış üzrə Dövlət Xidmətləri hərəkətlənib.
Həmçinin, həkim komissiyaları tərəfindən xəstəlik adı ilə xidmətə yararsız hesab olunaraq hərbi bilet alanlarla bağlı sərt ölçü götürüldüyü iddia edilir.
Bununla bağlı artıq nazirlikdə xüsusi komissiya yaradılıb. Bildirilir ki, “xidmətə yararsız” adı ilə hərbi bilet alan gənclərin sağlamlığı yenidən yoxlanılacaq.
Onlara həmin biletləri verən aidiyyəti qurumlarda araşdırmalar aparılacaq. Qanun pozuntusuna yol verən şəxslər isə ciddi şəkildə cəzalandırılacaqlar.
Səfərbərlik və Hərbi Xidmətə Çağırış üzrə Dövlət Xidməti 2011-ci ildə yaradılıb. Neçə müddətdir ki, Səfərbərlik və Hərbi Xidmətə Çağırış üzrə Dövlət Xidmətinin rəisi Arzu Rəhimovun rəhbərliyi altında cərəyan edən özbaşınalıqlar dövrü mətbuatın diqqət mərkəzindədir.
Buna qədər yazılanlar arasında dövlət xidmətinin yarandığı gündən bu yana yarıtmaz fəaliyyəti, bu yarıtmazlığın birbaşa olaraq rəhbərlikdən qaynaqlanması, SHXÇDX-də baş verən rüşvət və korrupsiya halları, habelə digər bu kimi faktlar ictimailəşdirilirdi.
Arzu Rəhimovun rəhbərlik etdiyi qurumun xidmət rəisi müharibə şəraitində yaşamağımıza baxmayaraq, saxta hərbi bilet sataraq milyoner “iş adamına” çevrilib.
Hərbi bileti təxminən 4500 – 5000 manat arasında satan İlqar Əlimirzəyevin həmçinin Qəbələdə villa biznesi ilə də məşğul olduğu bildirilir.
Səfərbərlik və Hərbi Xidmətə Çağırış üzrə Dövlət Xidmətində çalışanların övladlarının böyük hissəsi ya hərbi xidmətdən yayınır, ya da cəbhə bölgəsindən kənarda xidmət edirlər.
Daha əvvəl səfərbərlik və Hərbi Xidmətə Çağırış üzrə Dövlət Xidmətinin rəisi Arzu Rəhimovun oğlu Murad Rəhimovun da hərbi xidmətdən yayınması haqqında mətbuatda məlumat yayımlanmışdı.
“Gündəm Xəbər”in məlumatına görə, Azərbaycanda struktur islahatları gündəmə gəlib. Hökumət açıq şəkildə bəyan edib ki, qənaət rejiminə keçid olunub
Bu da bir çox dövlət qurumlarının ləğvi ilə yanaşı təkrar strukturların birləşdirilməsini aktuallaşdırıb.
Məlumata görə, adı korrupsiyaya bulaşmış və reputasiya yerlə bir olan daha bir dövlət qurumunun ona yaxın nazirliyə birləşdirilməsi real görünür.
Məlumata görə, Səfərbərlik və Hərbi Xidmətə Çağırış üzrə Dövlət Xidməti ləğvi gözlənilir. Bu struktura müxtəlif ittihamlar var. Xidmətin adı “niqodnıy bilet” alverindən tutmuş yeyintilərə qədər hallanır.
Mətbuatda yer alan faktlara inansaq, 2016-cı il dövlət büdcəsində “Müdafiə”bölməsinin “Müdafiə Qüvvələri” köməkçi bölməsinin “Ordu və donanma” paraqrafı üzrə
Azərbaycan Respublikası Səfərbərlik və Hərbi Xidmətə Çağırış üzrə Dövlət Xidmətinin saxlanması üçün nəzərdə tutulmuş vəsait mənimsənilib.
Bu cür hallar qurumun ləğv edilərək səlahiyyətlərinin Müdafiə Nazirliyinə ya da ASAN Xidmətə verilməsini şərtləndirir.
Onu da xatırladaq ki, hərbi sistemdə perespektivli və perespektivsiz zabitlər var. Arzu Rəhimov perespektivli zabitləri uzaqlaşdırıb, perespektivsiz zabitlərə vəzifə verib.
Məsələn, Arzu Rəhimovun yaxın qohumu mayor Kazımov Rəşad xidməti uyğunsuzluqla Müdafiə Nazirliyindən tərxis olunsa da sonradan Səfərbərlik Xidmətinə baş idarəyə işə götürülüb.
Sərhəd Xidmətindən xidməti uyğunsuzluğa görə tərxis olunan mayor Abbasquliyev Mədət də Səfərbərlik Xidmətinə baş idarəyə işə götürülüb.
Bütün bu iddialara və ittihamlara baxmayaraq, sözügedən qurumun mətbuat xidməti də işlək vəziyyətdə deyil, açıqlamalar vermir, media ilə işləmir, press-reliz yaymır, mövqe bildirmir. Nəticədə faktlar mediada tirajlanır və cavabsız qalır. Bununla belə, qarşı tərəfi dinləməyə hazırıq.

Rafiq Qara
"Gündəm Xəbər"