Səfərbərlik və Hərbi Xidmətə Çağırış üzrə Dövlət Xidməti daxilində iç savaş daha da şiddətlənib. Bu şok məlumatı DİA.AZ-a qurumdakı mənbələr ötürüb. Xəbəri verən qaynaq iddia edir ki, SHXÇDX-nin rəis müavini Novruzəli Orucov neçə müddətdir ki, rəisi Arzu Rəhimova qarşı kampaniya aparır və artıq bu məsələ tərəflər arasında açıq müzakirə mövzusuna da çevrilib.

Mənbənin söylədikləri: «Keçən həftə Novruzəli Orucovla Arzu Rəhimovun arasında bu məsələnin polemikası aparılıb. Novruzəli Orucov hər şeyin mətbuatın şişirtməsi və uydurması olduğunu bildirib, amma Arzu Rəhimov da əsl həqiqətdən tam xəbərdar olduğundan sübuta yetirib ki, vəziyyət heç də Orucovun təsvir etdiyi şəkildə deyil».

Məlumatı verən mənbə bu arada şok bir faktı da açıqlayıb: «Bir neçə müddət əvvəl mətbuatda SHXÇDX-nin ayrı-ayrı rayon şöbələri tərəfindən həqiqi hərbi xidmətə çağrılan xəstə çağırışçıların siyahısı dərc olundu. Bu siyahının əslində Novruzəli Orucov tərəfindən ötürüldüyü məlum olub və bununla da Arzu Rəhimovun reputasiyasına ciddi ziyanın vurulması nəzərdə tutulub».

Mənbəmiz iddia edir ki, həmin siyahının ardından daha bir siyahı da mətbuat səhifələrinə yol tapdı ki, bundan sonra da Arzu Rəhimovun göstərişi ilə və xüsusən də Novruzəli Orucovun xəbəri olmadan bir daxili təhqiqat aparılıb: «Aydın olub ki, əslində həmin siyahılar Novruzəli Orucovun rəhbərliyi altında tutulub. İstənilən bir hərbi komissarlıqda bir-iki xəstə çağırışçı problemi olur, amma bu problemlər ümumiləşdirilərək, kütləvi hal kimi mətbuata təqdim olunub ki, bunu da yalnız daxildən edə bilərdilər».

DİA.AZ-a gələn məlumata görə, məhz bu səbəbdən artıq tərəflərin münasibətlərindəki pərdə də aradan qalxıb: «Təbii ki, belə bir şəraitdə Arzu Rəhimovla Novruzəli Orucovun uzun müddətə yol getmələri imkansızdır. Çünki eyni zamanda həbs olunan hərbi komissarlarla bağlı məlumatlar, habelə Arzu Rəhimovun həbsdə olan sürücüsü ilə bağlı faktlar da məhz eyni qaynaqdan mətbuata ötürülüb ki, bu da SHXÇDXi rəhbərində müavini ilə bağlı qəti qərarın verilməsi üçün qənaət yaradıb. Amma bu qərarın verilməsi üçün «yuxarıların» da xeyir-duası vacib olduğundan hələlik tərəflər «mehriban düşmənlər» kimi yola getmək zorundadırlar».

Bütün tərəflərin mövqelərini işıqlandırmağa hazırıq…