Hakimiyyətdəki bədxahları Zeynəb Xanlarovanın tapşırığı ilə Flora Kərimovanı efirdən məhrum edib - təfərrüat “Gündəm-Xəbər”də...

ATV-dəki “Nanəli” verilişinin bağlanması və məmurların əmrinə boyun əyən telekanalların iki xalq artistinin qovğasına qarışmasının - Detalları Azərbaycan musiqisinin əvəzolunmaz və ecazkar səsi Flora Kərimovaya yenidən efir qadağası qoyulub. Milyonların sevimlisi və xalqının sənətkarı, hər zaman həqiqətləri söyləyən, ölkənin milli problemlərinə biganə qalmayan müğənniyə təzədən telekanalların qapıları örtülüb. Bunun səbəbkarı isə millət vəkili, böyük sənətkarımız Zeynəb Xanlarovanın olduğu iddia edilir.
“Gündəm-Xəbər”in əldə etdiyi məlumata görə, Z.Xanlarovanın şəxsi tapşırığı ilə F.Kərimova efirdən məhrum edilib.

Floraya və “Nanəli”yə cəza

Bir müddət əvvəl Kərimovanın Xanlarova barəsində dedikləri vəziyyəti bu yerə gətirib çıxarıb. Onun Z.Xanlarovanın səsi olmadığı və kimlərinsə dəstəyi hesabına parladığını deməsi qalmaqala səbəb olmuşdu. Çox çəkmir ki, göründüyü kimi, F.Kərimova “cəzalandırılır” – ona efir qadağası qoyulur. Bir vaxtlar mərhumə İlhamə Quliyevanın göstərişi əsasında Flora Kərimova uzun müddət efirdən uzaq saxlanıldı. İndi də Zeynəb Xanlarovanın iqtidardakı əlaqələrindən istifadə edərək xalqın sevimlisinə televiziyaları yasaqladığı söylənir Əlbəttə ki, hər iki sənətkar xalqın sevimlisidir, onlara çox böyük hörmət var, hər birinin Azərbaycan xalqının qəlbində öz yeri, heykəli var. Ancaq əfsuslar olsun ki, çox miskin bir mənzərə yaranıb: iki böyük sənətkarın mübahisəsinə hakimiyyət kluarlarındakı bəzi iri fiqurlar qoşularaq Kərimovanı efir üzünə yenə də həsrət qoyublar. Görünür ki, həmin məmurların F.Kərimovadan əvvəldən xoşu gəlmir və onu hər dəfə
cəzalandırmağa bəhanə gəzirlər.

İki sənətkarın davasında miskin mənzərə

Bu, bəlkə də onun bir zamanlar müxalifətdə olması ilə bağlıdır və hakimiyyətdəki bəziləri onun fəaliyyətini unutmayıblar. Lakin 70-dən yuxarı yaşı olan bir sənətkara qarşı ömrünün bu çağında belə münasibət ərgilənməsi olduqca iyrənc və utanvericidir. “Gündəm-Xəbər”in əldə etdiyi məlumata görə, son vaxtlar ATV-dəki “Nanəli” verilişində Flora Kərimovanın rəhbərliyi ilə ölkənin ən sanballı və əxlaqlı müğənniləri böyük tamaşaçı rəğbəti
qazanmışdı. Ancaq kimlərinsə qısqanclığına səbəb oldu və həmin veriliş dayandırıldı. Televiziyalar səsi olmayan, çılpaq, yüngül xarakterli manısları ekranlardan əskik etmirlər. Əvəzində “Nanəli” bağlanır, Flora xanımın ideyası olan və xalqın sevdiyi proqram efirdən çıxarılır, özünə də qadağa qoyulur. Bu dövlət siyasətidirmi?Əgər elədirsə, rüsvayçılıqdır. Bu dövlət, televiziyalara barmaq silkələyib deyə bilmir ki, əxlaqı olmayan, çılpaqlarla əxlaqlı müğənnilərin efirlərdə yerini dəyişin?!

Özgənin əli ilə susdurmaq...

Əslində, bu konflikt bu ilin qışından var idi. Zeynəb Xanlarovanın göstərişi əsasında qadağa qoyulmasını Flora Kərimovanın özü açıq şəkildə mətbuata söyləmişdi. Sitat: “Hər yerdə mənə qadağa qoyulub, keçmişdəki kimi... Zeynəb Xanlarova unudur ki, mən ona Nisə Qasımova deyiləm Azərbaycandan illərlə didərgin etsin. Mənim bu millətə, torpağa haqqım var. Açıq sözə, fikrimə görə qorxmadan hansısa addımı atmağa haqqım var. O haqqımı Zeynəb deyil, Zeynəbin Zeynəbi gəlsin, əlimdən ala bilməz. Mənim dilimdən onun mərhum prezident Heydər Əliyevə qarşı olan etibarsızlığı açıqlanandan sonra televiziya kanalları mənə efir qadağası qoyub. Bu yolla kolda gizlənib, özgənin əli ilə məni susdurmaq istədi. O, həqiqətdən qorxdu. Bir də hər kəsin bildiyi ”Şəki əhvalatı"nı açıqlayacağımdan qorxdu. Məni susdurmağa ordenləri yan-yana düzən Zeynəbin də gücü çatmaz. Nahaq yerə belə etdi, mindirdi məni cin atına... Haralarasa yuxarılara dırmaşıb. Onlar da ya Mətbuat Şurasına dırmaşıb, ya da hansısa bir yuxarılara. Amma dəxli yoxdur, məni susdura bilməz. Oturmuşdum bir kənarda...Siyasətdən çoxdan gedən bir insanı cin atına mindirməsin”.

Məmurlar şou-biznesdə...

“Gündəm-Xəbər”in əldə etdiyi məlumata görə, F.Kərimovaya efir qadağası ən yüksək eşelonda razılaşdırılmayıb. Sadəcə, müəyyən qüvvələrin təlimatı və diktəsi ilə reallaşdırılıb. Hakimiyyətin içində olan bəzi dairələrin belə uğursuz, yersiz hərəkəti, iki xalq sənətkarının qovğasında tərəf saxlaması, bəzi məmurların özlərini şou-biznes adamları kimi aparması heç bir əndazəyə sığışmayan hərəkətlərdir. Flora Kərimova müxalif siyasi partiyalardan birində təmsil olunurdu. Şübhəsiz ki, o zaman Flora Kərimovanın bədxahları da bu faktdan ona qarşı istifadə edir, onun efirə buraxılmamasına çalışırdılar. Flora Kərimova ilə mərhum müğənni İlhamə Quliyeva ilə arasındakı konflikt də bu məsələdə az rol oynamamışdı. Amma sonradan nə yaxşı ki, bəzi telekanal rəhbərləri Flora Kərimova kimi əvəzsiz bir sənətçini efirə buraxmamağın nə qədər yanlış bir addım olduğunu dəyərləndirə bildilər. Əlbəttə, Flora Kərimovanın efirə buraxılmamasının ən böyük zərbəsi Azərbaycan musiqisinə, eləcə də Flora xanımın pərəstişkarlarına dəydi. Nəhayət, uzun müddətlik qadağa aradan qaldırıldı, bütün telekanallar Flora Kərimovaya "yaşıl
işıq" yandırdı. Bundan isə qazanan hamı oldu: həm həmin televiziyalar, həm də xalqımız.
Zeynəb Xanlarova mütəllibovçu imiş “Gündəm-Xəbər” yada salır ki, Flora Kərimova həmkarı haqda bu ifadələri səsləndirmişdi: Zeynəb Xanlarovanın sənəti, səsi yoxdu.
Bəli mən indi də təsdiq edirəm, hansı bir konserti izləsəniz görərsiniz ki, Zeynəb Xanlarova "xoruz" buraxırdı, xoruzsuz keçinmirdi. Zeynəb Xanlarova şuxluqdan başqa səhnəyə heç bir şey gətirmədi. Əlavə edirəm o səhnəyə mədəniyyət gətirə bilmədi. Zeynəb Xanlarovanın çörəyi dizinin üstündə idi. Heydər Əliyev Zeynəb Xanlarovaya çörək verdi, o isə çörəyə naxələflik etdi, çıxıb A. Mütəllimovun səsverməsində ona dəstək istədi. O dəstək üçün də A. Mütəllimov ona H. Əliyevin qardaşının evini hədiyyə verdirdi. Bu etibarsız Heydər Əliyevin zəhmətinə, onun üçün etdiklərinə belə qiymət verdi. Gedib illərdi o evdə yaşadı”.
Bu ifadələrə cavab vermək olardı və məsələ bağlanardı. Amma qarşılığında Flora xanıma efir qadağası qoyulub.

Telekanallar məmurların “kəbinli arvadı”

Telekanallar isə hökumətdəki məmurların “kəbinli arvadı” rolunda çıxış edərək əmrə boyun əyiblər və nə xalqı, nə musiqini düşünüblər, dərhal xalqın sevimli sənətkarını efirdən məhrum ediblər. Əlbəttə ki, telekanal rəhbərlərinin ipi öz əllərində deyil və onları kukla kimi idarə edirlər. Unudublar ki, Azərbaycanın hər bir qiymətli sənətkarı millətin sərvətidir. İstedad Allahın bağışladığı elə bir nemətdir ki, zəhmətin sayəsində, yorulmadan çalışmağın nəticəsində millət
tərəfindən sevgi qazana bilirsən. İstər Zeynəb Xanlarova, istərsə də Flora Kərimova Azərbaycan mədəniyyəti tarixinə öz adlarını həkk etmiş insanlardır. Böyük sərvət yaradıblar. Bu cür insanların qədir-qiymətini bilməliyik. Güman edilir ki, ayrı-ayrı sənətkarlarla bağlı bəzən mətbuat səhifələrinə çıxarılan münaqişələr
mahiyyət etibarilə düzgün olmayan addımdır. Ola bilər ki, kimsə kiminsə haqqında bəzən ehtiyatsız, bəzən onun necə əks-səda doğuracağını düşünmədən nəsə deyə bilir. Sadəcə, müəyən adamlar bu cür insanların dediklərini şişirdirlər. Bundan da xeyirxah olmayan niyyətlər üçün istifadə edirlər. Bu indinin söhbəti deyil. Keçmiş zamanlarda da belə hallar olub. Təkcə bizdə deyil, müxtəlif ölkələrdə də ayrı-ayrı sənət adamlarını qarşı-qarşıya qoymaq səmtində bu cür addımlar atılıb.
Belə təşəbbüsləri, belə niyyətləri heç cür qəbul etmək olmaz.

İki sənətkarı qızışdıranlar

Flora Kərimova ona görə danışır ki, 3-5 jurnalist bəzi məsələləri qurdalayır. İnsanları rahat buraxmaq lazımdır. Flora Kərimova və digər sənətçilərə müraciət edərkən qeybət mövzularında suallar verməyin. 3-5 dəfə bu cür suallar qoyanda o da məcbur olub cavab verir. Zeynəb Xanlarovanın 10 illər boyu bu milləti tanıtmaq yolunda işlərindən danışmaq lazımdır.Flora Kərimovanın Azərbaycan estradasının səhnəsindəki böyük işlərindən bəhs etmək lazımdır. Ayrı-ayrı insanlarla həmin sənətkarların sənətinin gözəlliklərindən danışmaq lazımdır. Qızışdırıcı, dedi-qodu səviyyəsində olan mövzuları müzakirəyə çevirmək doğru deyil. Nəticəsi də göz qabağındadır: biri digərinə efir qadağası qoydurur.

Ömrü qadağalarda keçən dahi qadın - Dosye

Qeyd edək ki, həddən artıq hipertrofiya olunmuş ədalət hissi, vətənpərvərliyi və heç kimə yarınmaq istəməyən xasiyyətinə görə, xalq artisti öz sənət ömrünün demək olar ki, 3/4-ü qadağada olmuşdur. Amma, hətta buna baxmayaraq, Qızıl Fondda ən çox sayda əsərlər Flora Kərimovaya məxsusdur. İlk qadağanı Sovetlər dövründə Qarabağda keçirilən konsertdəki insidentə görə almışdır. Belə ki, Sara Qədimova, Şövkət Ələkbərovadan sonra oxumalı olan erməni əsilli müğənni, çox
zildən "Qarabağ Şikəstəsi" ni ifa etmişdir. Növbəti çıxış Flora Kərimovanın idi və sənətkar konsertin proqramında nəzərdə tutulmuş əsəri deyil, türk mahnısı olan "Atlı Karınca" adlı musiqini 2 not daha yüksəkdən ifa etməklə hamını təəccübləndirmişdir. Lakin, Bakıya qayıtdıqdan sonra, o dövrkü mədəniyyət nazirliyi bu addımı milli təəssüb kimi qiymətləndirərək, Flora Kərimovanı uzun müddət səhnədən uzaqlaşdırmışdılar. Sonradan, Moskvadan gələn Mədəniyyət məsələləri ilə bağlı heyətin tərkibində olan, yüksək rütbəli məmurun xanımının (hansı ki, Flora Kərimovanın ifasını tanıyırdı,) xahişi ilə xanım
Kərimova səhnəyə qaytarılmışdır. Daha sonralar, Azərbaycanın birinci katibinin istəyini həyata keçirmədiyinə görə yenidən səhnədən kənarlaşdırılmışdır. Ona dissident qadın müğənni də demək olar...

Rafiq Qara
"Gündəm Xəbər"