Prezidentin ölkədə olmamasından istifadə edən ruspərəst məmurlar Qərbyönümlü daha bir peşəkar və azad mətbu orqanı sıradan çıxarır
Azərbaycan müstəqil mətbuatının son qalalarından olan “Turan” İnformasiya Agentliyini yıxmaq üçün bəzi dairələr səfərbər olunublar.

Prezident İlham Əliyevin ölkədə olmamasından sui-istifadə edərək iqtidardakı bəzi ruspərəst məmurlar Azərbaycanın müstəqil “Turan” İA-nin sıradan çıxarılmasını istəyirlər.

Kremlin həmləsi

“Gündəm Xəbər”in məlumatına görə, bu təzyiqlərin ilk həmləsi media agentliyinə vergi böhtanı atılaraq cinayət işinin açılmasıdır.
Vergilər Nazirliyi yanında Vergi Cinayətlərinin İbtidai Araşdırılması Departamenti «Turan» İnformasiya Agentliyinə cinayət işi açıb. Artıq ibtidai istintaqın başlandığı bildirilir.
Vergi yoxlaması qərarı Bakı Şəhəri Lokal Gəlirlər Departamentinin agentliyə 37 min manatdan çox borc hesablanması haqqında qərarına əsaslanır. Departament hesab edir ki, agentlik gəlirlərini az göstərib. Hər iki departament agentlikdən bütün vergi sənədlərini tələb edirlər.

«Turan» İnformasiya Agentliyi bütün iddiaları təkzib edib. Adıçəkilən qurumların əməlləri qanuna zidd və açıq-aşkar qərəzlidir», - agentlikdən bildiriblər.

Ötən həftənin ən mühüm hadisələrindən biri olan “Turan”a cinayət işinin açılmasına hansı qüvvələr nail olubsa, onlar ölkə prezidentinin media siyasətinə qarşı müharibə açmış olublar.

Ölkə başçısı səfərə çıxar-çıxmaz müstəqil mətbuata çamur atmağa başladılar. Bu məmurlar heç də özfəaliyyət yerinə yetirməyiblər. Onlar Azərbaycanda Kremlin seçiqabağı maraqlarını təmin etmək üçün çırmanıblar.

Niyə?

Sual ritorikdir. Çünki “Turan” və onun baş direktoru Mehman Əliyev həmişə şəffaf fəaliyyəti ilə yanaşı Qərbyönümlü mövqeyi ilə də seçilib.

Moskva isə Bakıda Qərbin siyasi və media təsisatlarının sıradan çıxarılmasına diktə etməkdədir. Həmin məmurlar da məhz arxasını rus bayrağına söykəyərək informasiya müharibəsində anti-Qərb mövqeyində dayanıblar.

Məqsəd Azərbaycanda peşəkar, müstəqil və Qərbyönümlü medianı tamamilə mətbu səhnədən silməkdir. Çünki Qərb ölkələrinin Bakıdakı səfirlikləri “Turan” İA-nin bülletenlərinə abunədirlər. Eyni zamanda M.Əliyevin Qərb ölkələrinin media qurumları ilə tərəfdaşlığı var.

Aydın görünür ki, seçkilərə az vaxt qalır və həmin ərəfədə Qərbyönümlü ciddi bir medianı susdurmaq xəttini seçiblər. Bu da öz növbəsində yalnız qonşu Rusiyanın maraqlarına xidmət edən məmurların sifarişidir.

M.Əliyevə qədər ölkənin ən məşhur, müstəqil, ağıllı jurnalistləri - Elçin Şıxlı, Qulu Məhərrəmli, Arif Əliyev və digərləri neytrallaşdırılaraq susdurulub. Bu təzyiqlərin davamında növbəti ciddi jurnalistika mərkəzi M.Əliyev idi.

Ən qəribəsi ondan ibarətdir ki, “Turan” İA kimi mötəbər media mərkəzinə cinayət işi açılması bu günə qədər Prezident Administrasiyasında KİV-ə nəzarət edən ictimai-siyasi şöbədən bir cümləlik reaksiya da olmayıb.

Üstəlik, prezidentin ictimai-siyasi məsələlər üzrə köməkçisi Əli Həsənovla ”Turan” İA-nin direktoru Mehman Əliyev Moskva Dövlət Universitetində oxuyublar.

M.Əliyev Jurnalistika, Ə.Həsənov Tarix fakültələrində təhsil alıblar. Onların tələbəlik dövründə münasibətləri olub, bir-birini tanıyıblar.

Amma indi niyə prezident yanında KİV-ə nəzarət edən ictimai-siyasi şöbə saxta cinayət işinə, vergi böhtanına reaksiya vermir.

Yeri gəlmişkən, M.Əliyev sıradan bir fiqur olmayıb. O, mərhum prezident Heydər Əliyev tərəfindən yüksək qiymətləndirilib.

Hələ 90-cı illərin ortalarında, yəni H.Əliyev artıq hakimiyyətdə olduğu dövrdə M.Əliyevə Prezident Aparatında yüksək vəzifə təklif edibmiş. Məlumata görə, mərhum prezidentin ona böyük hörməti olub və komandasında görmək istəyib.

Bu, ayrı məsələdir ki, onlar bir yerdə işləyiblər ya yox, əsas fakt M.Əliyev kimi fəaliyyəti hər zaman şəffaf olan vergi ödəyicisinə qarşı qondarma ittihamların irəli sürülməsi, Əli Həsənovun və PA-dakı şöbənin hadisəyə münasibət bildirməməsidir.

Görünən mənzərə Azərbaycanda prezident seçkilərinə bir il qalmış mətbuatın ayaqlar altına atılmasında, müstəqil medianın məhv edilməsində birbaşa Kremlə bağlı dairələrin fəaliyyətidir.

Ölkənin media və siyasi həyatında çox ciddi böhran, qarşıdurmaya aparan addımlar atan bəzi məmurların yaratmaq istədiyi çaxnaşma heç yaxşı perspektivlər vəd etmir.

KİVDF-nin “separatçı” siyasəti...

“Gündəm Xəbər” bildirir ki, bu qarşıdurma KİVDF tərəfindən jurnalistlərə mənzil paylanmasından başlanmışdı.

O ərəfədə evlərin açarlarının bəzilərinin katibələrə, şoferlərə, məmurlara, stajı az olanlara, qeyri-peşəkarlara, amma hakimiyyətdəki bəzi məmurlara yaxınlığı olan jurnalistlərə paylanmasından yazan mətbuat nümayəndələrini az qala vətən xaini, dövlət düşməni çıxarsınlar.

KİVDF azad medianın ələbaxımlı olması və jurnalist ordusu içərisində nifaq düşməsi yolunda əsas “separatçı” missiyasını yerinə yetirirdi.

Hətta həmin vaxt ev alan jurnalistlərə çağırış edildi ki, sizi ittiham edən, katibələrə ev verildiyini yazan həmkarlarınıza cavab verin, susmayın. Bu, birbaşa toqquşmaya, media cameəsində ikitirəlik yaratmağa hesablanmış addım idi.

Həqiqətən evsiz jurnalistlərin mənzil şəraitinin yaxşılaşdırılmasının qayğısına qalırdılarsa, çap mediasının satış, reklam bazarında fəaliyyətinə yol açılmalıydı, eynilə onlayn mediada da reklam bazarı formalaşmalıydı. O zaman baş redaktorların verdiyi məvaciblə jurnalistlər ev, maşın sahibi olacaqdılar.

Siyasi mətbuatın çökdürülməsi, qəzet satışının sıfıra endirilməsi ilə KİVDF Azərbaycanda müstəqil mətbuatın başdaşını qoydu. İndi isə “Turan” İA kimi müstəqil qalan tək-tük media orqanları da sıradan çıxarılır.

Hakimiyyətdəki “5-ci kolon” üzvlərinin, ruspərəstlərin yürütdüyü siyasət rəsmi Bakı ilə Qərb arasında əlaqələri pisləşdirməyə körüklənmiş fəaliyyətdir.

Hələ bunu seçkiqabağı həyata keçirmək ikiqat Qərbyönümlü medianı baltalamaq və Kremlin xoşuna gəlməkdir.

Azərbaycanda “KİVDF jurnalistikası” yaratmaq istəyənlərin planları da məhz müstəqil medianı bu şəkildə sıradan çıxarmaqla reallaşır. O jurnalistikada isə “Turan”a yer yoxdur.

Adı çəkilən Agentlik Azərbaycanın müstəqillik tarixi ilə həmyaşıddır. Ölkənin ən qocaman, stajlı və təcrübəli media qurumlarından biridir. Daxildə və xaricdə etibarlı tərəfdaşları və nüfuzu var.

Məlumatlarını 3 dildə- Azərbaycan türkcəsi, ingilis və rus dilində yayır. Mətbuatın “Qızıl qaydası”- na, qarşı tərəfin mövqeyini işıqlandırmağa həmişə əməl etməyə çalışır.

Ən mühüm keyfiyyətlərindən biri odur ki, güclü təzyiqlərin və böyük vədlərin qarşılığında indiyə qədər öz dəsti- xəttini və müstəqilliyini qoruyub saxlayıb.

Reklam, abunə, rəqabət mühitinin olmadığı ölkədə öz daxili imkanları hesabaına bir media qurumunun ayaqda durması fədakarlıqdır. Bu fədakarlığı alqışlamaq əvəzinə onu susdurmaq cəhdi isə həqiqətin ağzına daş basmaq, azad sözü boğmaq və qisasçılıqdır.

Digər tərəfdən ölkəni talayanların, onun malını, mülkinü, mənimsəyənlərin azad media nümunəsini vergidən yayınmaqda ittiham etməsi tarixin acı ironiyasıdır.

Kirayədə yaşayan Əliyev Mehman...

Sual yaranır - rüşvətxor məmurlar bu ölkənin vergi orqanların ömürlərində bir dəfə də olsun vergi ödəyiblərmi?

Görəsən böyük və dəbdəbəli otelləri, şadlıq sarayları, istirahət mərkəzləri, ticarət obyektləri, istixanaları, biznes strukturları, ölkədə və xaricdə villaları olan məmurlar dövlət büdcəsinə nə qədər vergi ödəyiblər?

Ödəyiblərsə həcmi nə qədərdir, ödənişin həcmi və gəlir bəyannamələrini indiyə qədər niyə təqdim etmirlər?

“Turan” İnformasiya Agentliyinə cinayət işinin açılması da başda Agentliyin rəhbəri Mehman Əliyev olmaqla bu mətbuat qurumunun fədakar əməkdaşlarının indiyə qədər azad mətbuat prinsiplərinə sadiq qalmalarıdır. Çirkaba, cinayətə bulaşmamalarıdır.
Təbii ki, dəyərlərini və prinsiplərini qoruyan insanların hər şeyə alqı- satqı gözü ilə baxan hakimiyyətdəki ruspərəstlərlə bazarlığa getməməsi onları hövsələdən çıxarıb bu cür avantürüst addımlar atmağa sövq edir.

Bəlkə də çoxları bilmir ki, Prezident Administrasiyasının jurnalistlərə ev paylanması kampaniyası başlayanda pulsuz mənzil verilməsi ilə bağlı ilk təkliflərdən biri Mehman Əliyevə və “Turan”- a edilib.

Bəlkə də çoxları bilmir ki, bu təklifdən imtina edən, 60 yaşı tamam olan Mehman Əliyev uzun müddətdir ki, kirayədə yaşayır.

Beləliklə, ölkədə Qərb mediasının standartlarına uyğun fəaliyyət göstərən növbəti sanballı mətbu orqan Kremlpərəstlərin təzyiqləri nəticəsində qapadılmaq təhlükəsi ilə üzləşib.

Beləcə, "dövlət qayğısı” mətbuatın müstəqilliyini məhv etdi. Müstəqilliyi olmayan mətbuat isə artıq mətbuat deyil. Bu gün Azərbaycanda mətbuatın mövcudluğunun qorunması bir neçə xəbər saytının fədakar zəhməti bahasına mümkün olur.

Onların əməkdaşları da mütəmadi olaraq müxtəlif təzyiqlərlə, "dəyənək”lə üz-üzədirlər. Kimisi mühacirət edib, kimisi həbsdədir, kimisinin ölkədən çıxışına qadağa qoyulub, kimisi də tez-tez hüquq-mühafizə orqanlarına çağrılaraq hələlik xəbərdarlıq alır.

Müstəqilliyini itirmiş mətbuatda obyektiv siyasi və iqtisadi analizlərdən söhbət gedə bilməz. Çünki bu halda göstərilən rəqəmlər, çıxarılan nəticələr iqtidarın ürəyincə olmayacaq.

Belə olduqda mətbuatın önündə iki yol qalır – ya açıq-aşkar yalana sarılaraq hakimiyyətdəki ruspərəstlərin özünün və kursunun alternativsizliyini təbliğ etmək, ya da sarı mətbuata çevrilərək şou-biznes, kriminal, məişət mövzuları ilə kifayətlənmək.