Məhkəmə sədri oliqarxdan niyə çəkinir?

İmişli şəhəri, Sevil Qazıyeva M6/6 ünvanında yaşayan Azərbaycan Jurnalistlər İttifaqının üzvü, 21 kitab müəllifi Yusif Cəfərli (Usubov Usub) rayon məhkəməsi tərəfindən hüquqlarının pozulmasından şikayətçidir. O, bununla əlaqədar Prezident İlham Əliyevə müraciət ünvanlayıb. Şikayətçi eyni zamanda müraciətinin surətini Ədliyyə naziri Fikrət Məmmədova, Ədliyyə Nazirliyi Məhkəmə-Hüquq Şurasına, Mətbuat Şurasının sədri, millət vəkili Əflatun Amaşova və “Gündəm Xəbər”in redaksiyasına da ünvanlayıb. Şikayətçi Prezident İlham Əliyevə ünvanladığı müraciətdə yazır: "Cənab Prezident! Mərhum prezident Heydər Əliyev haqqında yazdığım kitabın, eləcə də digər 20 kitabın müəllifi olaraq sizdən xahiş edirəm ki, mənim şikayətimə tam obyektiv və hərtərəfli baxılsın, bu şikayəti müzakirə edərkən mənim iştirakım təmin olunsun". Bəs, İmişlidə yaşayan yazıçı nədən şikayətçidir? Yusif Cəfərli (Usubov Usub) müraciətində buna belə aydınlıq gətirib: "Ünvanı Bakı şəhəri, 529-cu məhəllə, "Azərbaycan" Nəşriyyatı kimi göstərilən, fəaliyyətini yalnız İmişlidə iri ranqlı oliqarxın sifarişi ilə həyata keçirən, məni məddah, yaltaq adlandıran, haqqımda təhqiramiz, böhtannçı ifadələr işlədən, artıq dünyasını dəyişmiş qayınatam, məşhur xanəndə Eynulla Cəbrayılov haqqında böhtan dolu ifadələr işlədən “Həqiqət və reallıq” qəzetinin baş redaktoru İsrafil Quliyev haqqında Cinayət Məcəlləsinin 147.1 və 148-ci maddələri ilə İmişli rayon məhkəməsində iddia qaldırmışdım. Hakim Ülvi Qənbərovun icraatına verilmiş iddia və şikayətə 21.08.2017-ci il tarixində baxılaraq icraata götürülməməsi haqqında qətnamə qəbul edildi. Məsələ burasındadır ki, adını çəkə bilmədiyim o iri ranqlı oliqarx tərəfindən idarə olunan məhkəmənin sədri Qurban Hacıyev iki dəfə iclas zalına girərək, İsrafil Quliyevlə ikiəlli görüşdü və Ülvi Qənbərova və mənə başa saldı ki, “get, işinlə məşğul ol!”. Şikaytçi yazır ki, Ülvi Qənbərov bir saat yarım Qurban Hacıyevlə danışdıqdan sonra iddia və şikayəti qəbul etmədi: "Bildirirəm ki, hər iki hakim həmin o iri ranqlı oliqarxın nəzarəti altında olduqlarından öz kariyeralarını qurban verməkdən çəkinirlər. Bundan əvvəl mən həmin qəzet haqqında mülkü iddia da qaldırmışdım və iddiamı yeni təyin olunmuş 3-cü hakim Aqşin Əfəndiyev icraata götürmüşdü. Ülvi Qənbərov mənə bildirdi ki, icra başçısının bizdən zəhləsi gedir, vaxtımız bitib, ola bilsin ki, bizi İmişlidən başqa yerə dəyişsinlər, amma səni yeni hakimə tapşıracam. Bütün rayonda hamı bilir ki, bu iri ranqlı oliqarx nəinki məhkəmə sədrlərini, hakimi, hətta bütün rayonda idarəetməni öz əlində saxlayır. Amma icra başçısı artıq onunla əlaqəni kəsib, çünki rayonda hər an ağlasığmaz hadisələr baş verə bilər". Yusif Cəfərli (Usubov Usub) daha sonra müraciətində yazır: "Cənab Prezident! İndi məni məhkəmələrdə süründürə bilərlər. Rayonda at oynadan oliqarx Sizin təyin etdiyiniz nümayəndəni eşidənləri, onun tapşırıqlarını yerinə yetirənləri “Həqiqət və reallıq” qəzetində şərəfsiz adlandırır. Həmin oliqarx 3 nəfəri isə mətbuatda "şərəfsizin şərəfsizi" adlandırır və onları “Böyük dayaq” filminin mənfi qəhrəmanları Yarməmməd, Yastı Salman və Lal Hüseyn kimi qələmə verir. Bu üç nəfər ciddi vəzifəli şəxs o iri ranqlı oliqarxdan o dərəcədə çəkinir və qorxurlar ki, onlara bu ləqəblərin verildiyini bilsələr də, cınqırlarını çıxarmırlar. Çünki respublikanın ən iri çaplı oliqarxları və vəzifəli şəxsləri ondan yararlanırlar. Bu qəzetin son nömrələrinə nəzər saldıqda aydın olur ki, “Baş Redaktordan” başlıqlı yazıda redaktor İsrafil Quliyev dövlətin iqtisadi göstəricilərindən bəhs edərkən, neftin qiymətinin bahalaşmasını, gələcəkdə dizel yanacağının bahalaşacağını oxuculara çatdıraraq dövlətin siyasi və iqtisadi fəaliyyəti barədə mənfi rəy formalaşdırır, insanlarda xof yaradır. Heç radikal müxalifət qəzetləri hakimiyyətin bu və digər siyasətindəki dəyişikliyə bu şəkildə etirazlarını ifadə etmirlər". Daha sonra şikaytçi İmişli məhkəməsinin hakimlərinin ədalətsizliyindən bəhs edir: "Ülvi Qənbərov və Qurban Hacıyevin bu hərəkətləri barədə məndə artıq belə qənaət yaratmışdır ki, İmişlidəki oliqarx-məmurun yuxarıdakı dayaqları vasitəsilə onlar İmişlidə qalacaqlar, heç bir yerdəyişmə olmayacaqdır. Amma şəxsən öz təcrübəmə əsaslanaraq, gördüyüm, eşitdiyim söhbətlərə əsasən, deyə bilərəm ki, İmişlidə bütün mənfi hallar qalmaqdadır və belə davam etsə, bunun daha pis nəticələrini görəcəyik. Cənab Prezident! Mən o oliqarx-məmurun adını çəkmədim. Çünki qorxdum. Nəyə görə?. Kitablarımın birində yazmışdım ki, İmişlidə bir nəfər Vətən Müharibəsindən qayıdır. Qonşu və qohumları soruşurlar ki, bu müharibə nə olan şeydir. Deyir ki, bizim üçün xəndəklər qazılmışdı. Digər tərəf elə atır, daha bilmir ki, adamın başına dəyər, gözünə dəyər... İndi savadsız, təsadüf nəticəsində pullaşan oliqarx pullarını rayonun abadlaşmasına və problemlərinə xərcləmək əvəzinə üstümüzə hücuma keçir. Onların məqsədi rayonun rəhbərliyini ələ keçirmək, Qurban Hacıyev və Ülvi Qənbərov kimi hakimləri öz nəzarətində saxlayaraq vətəndaşlarda xof yaratmaqdır. Məhkəmənin sədri Qurban Hacıyevin mənim işimə baxan hakimlə məsləhətləşməsi, saat yarımlıq müşavirəsi təkcə mənə qarşı qisascılıq, hörmətsizlik deyil. Bu bütövlükdə məhkəmə sisteminə və aidiyyatı nazirliyə,qanunlara qarşı hörmətsizlikdir. Bu əsl mənəm-mənəmlikdir. Cənab Prezient! Xahiş edirəm ki, mənə qarşı haqsızlığın, qanun pozuntusunun tam, obyektiv təftiş edilməsini öz nəzarətinizdə saxlamaqla obyektiv araşdırmaya yardımçı olasınız. Apellyasiya şikayətim atacağım sonrakı addımdır. Amma buna qədər görüləcək çox tədbirlər var. Sizin göstərişlərinizə böyük ümidlərlə Yusif Cəfərli (Usubov Usub)".

P.S. Qeyd edək ki, son vaxtlar İmişlidən tez-tez oxşar məzmunlu şikayət məktubları alırıq. Bu məktublarda xüsusən də Standartlaşdırma, Metrologiya və Patent üzrə Dövlət Komitəsinin (SMPDK) İmişli ərazi sınaq və sertifikatlaşdırma şöbəsinin müdiri Saleh Səmədovun adı hallanır. Dövlət vəzifəsi tutmaqla yanaşı bizneslə də məşğul olan Saleh Səmədovun İmişlidə hüquqmühafizə orqanları, xüsusən də məhkəmə üzərində ciddi təsirinin olduğu da bildirilir. Qeyd edək ki, onun adı "MTN işi"ndə də hallanırdı. Belə ki, onun həbsdə olan generallara 300 min dollar rüşvət verdiyi də məhkəmə sənədlərində öz əksini tapıb. Lakin hazırda da onun xeyli biznes obyektlərinin olduğu barədə mətbuatda tez-tez müxtəlif məlumatlar yayılır.