Bu gün ADP İdarə Heyətinin növbəti toplantısı keçirilib.

Toplantıda ölkə və beynəlxalq aləmdə baş verən ictimai-siyasi proseslər əsas müzakirə obyekti olub. Toplantı iştirakçıları ilk növbədə Azərbaycan hakimiyyətinin dövlət büdcəsi hesabına xarici ölkələrə çıxardığı 3 milyarda yaxın vəsaitin aşkarlanması ilə bağlı Mütəşəkkil Cinayətkarlık və Korrupsiya Hesabatı Layihəsi (OCCRP) təşkilatının geniş rezonans doğuran hesabatına münasibət bildirib. Qeyd olunub ki, bu cür faktların ortaya çıxması bir tərəfdən Azərbaycanda uzun illərdən bəri hökm sürən korrupsiya və rüşvətxorluq faktlarının göstəricisi olmaqla Avropa institutlarının həmin faktlara göz yumması və bu faktları yalnız onlara hakimiyyətə təsir və təzyiq vasitəsi kimi lazım olduğu anda işə salmaq cəhdindən irəli gəlib.
ADP Azərbaycan adına yeni qara səhifə açan bu faktdan ciddi narahat olduğunu diqqətə çatdırır və hakimiyyətdən bu işlə bağlı cinayət işinin açılması və aparılan araçdırmalarla bağlı xalqımıza düzgün məlumat çatdırmağı tələb edir. Həmçinin qeyd olunub ki, artıq qlobal mahiyyət kəsb edən korrupsiya ilə bağlı daha geniş tədbirlərə əl atılmalı və antdemokratik dövlətlər üçün səciyyəvi hal olan bu bəlanın beynəlxalq cinayət kimi tanınması ilə bağlı BMT-nin ümumi qətnaməsi qəbul edilməlidir.
İdarə Heyəti Arakanda müsəlmanlarına, bütövlükdə insanlığa qarşı yönələn qətliam faktlarından ciddi narahat olduğunu bildirib və məsələnin kökündə islamafobiyanı əldə rəhbər tutan xristian dünyasının bəşəri dəyərlərə ögey münasibətinin durduğunu və müsəlman dövlətləri arasında fikir birliyinin olmaması faktını diqqətə çatdırıb.
İdarə Heyəti İraq Kürdüstan regional Hökumətinin prezidenti M.Bərzaninin İraqın şimalında Kürdüstan dövlətinin yaradılması ilə bağlı referendum keçirilməsi tələbini qətiyyətlə pisləyib bu addımın İraqın konstitusiya ilə təmin olunan dövlət bütövlüyünün pozulması, beynəlxalq hüquq normalarına qarşı gedilməsi, regionda yeni müharibə ocaqlarının, qarşıdurmaların, milli etnik zəmində parçalanmaların yaranmasına səbəb ola biləcəyini diqqətə çatdırıb və hakimiyyəti tarixən soydaşlarımızın da məskunlaşdığı bu ərazilərdə referendum keçirilməsini əngəlləyən addımlar atmağa, bu məsələnin əleyhinə olan Türkiyə, İran və hazırkı İraq hökuməti illə birgə beynəlxalq səylər göstərməyə çağırıb.
İdarə Heyəti mətbuatdan əldə edilən məlumatlara əsaslanaraq Sabunçu rayonu ərazisində 26 bakı komissarı adına küçənin adının dəyişdirilməməsindən, Bakı şəhərində bir çox binaların üzərində hələ də keçmiş SSRİ-nin rəmzlərinin götürülməməsindən narahat olduğunu bildirib və hakimiyəti işğalçı rus imperiyasının rəmzlərini daşıyan adların, işarələrin aradan qaldırılması üçün qəti addımlar atmağa çağırıb. Həmçinin Səbael ərazisində yerləşən və hansı səbəbdənsə üzərində 26 rəqəmi yazılan kafenin məhkəmə icraatı olmadan, dərəbəylik qaydasınca Baki icra hakimiyyətinin göstərişi əsasında sökülməsindən narahat olduğunu bildirib və bu addımı vətəndaşların mülkiyyət toxunulmazlığına qarşı qeyri-qanuni addım kimi dəyərləndirib.
İdarə Heyəti Mərkəzi Bankın sədri E.Rüstəmovun vəzifə səlahiyyətlərindən sui-istifadə edərək ayrı-ayrı banklardan yeddi yüz milyon kredit götürərək xarici ölkələrə investisiya yatırması barədə yayılan məlumatdan ciddi narahat olduğunu bildirib və hakimiyyəti qeyri-qanuni olaraq sahibkarlıq fəaliyyəti göstərən, dövlət büdcəsindən şəxsi maraqları üçün yararlanan E.Rüstəmovun fəaliyyətinin hüquq-mühafizə orqanlaı vasitəsi ilə araşdırmağı və bu barədə xalqa ətraflı məlumat verməyi tələb edib.
İdarə Heyəti son günlər ərzaq və digər zəruri təlabat mallarının qiymətinin kəskin artırılmasından ciddi narahat olduğunu bildirib və bu faktın onsuz da işsizlik və ehtiyac içində yaşayan xalqımızın sosial vəziyyətinin daha da ağırlaşmasına səbəb olacağını diqqətə çatdırıb və hakimiyyəti davamlı olaraq xalqın rifahının pozulmasına yönəlik bu cür yanlış iqtisadi siyasətə son qoymağa, bir neçə monopolist və oliqarxın mənafeyinə xidmət edən qiymət artımının qarşısını almaq üçün təcili addımlar atmağa çağırıb.
İdarə Heyəti dünya şöhrətli azərbaycanlı alim Lütfi Zadənin olümü ilə bağlı dərin hüznlə onun doğmalarına və xalqımıza baş sağlığı ünvanlayıb, hakimiyyəti onun vəsiyyəti üzrə nəşinin Azərbaycana gətirilib dəfn edilməsi, adının əbədiləşdirilməsi, elmi irsinin öyrənilməsi ilə bağlı geniş tədbirlər həyata keçirməyə çağırıb.