Mərdliyin əzildiyi bu məmləkətdə qorxaqlar və saxtakarlar meydan sulayırlar

Allah-Təala Sənə min rəhmət eləsin Mirzə Ələkbər Sabir! İctimai şuurun sağlam formalaşmasından ötrü nələrə qatlaşmadınız?. Ömrünüzü zəlil, əlil, kar və kor kimi insanların yolunda fəda etdiniz!. Nə fayda!. Fəzlullah Nəimini, Nəsimini dünya malına satan kəslər, bu gün də meydan sulayırlar. Hərçənd ki, at oynada bilməslər də, ortada yeyib tində-bucaqda gəzirlər. Təhsil vay, ay Mirzə müəllim!. Savadsızlıq baş alıb gedir. Baxmayaraq ki, əli diplomluların sayı günbəgün artır. Hələ də qəflət yuxusundan oyana bilməyən cəmiyyəti cəhalət əməlli-başlıca ağuşuna alıb. Əhəd adlı müəllimin təbirincə desək, “bizlərə təhsil yox, pul lazımdır. Orta-ixtisas, yaxud da ali məktəblərin qəbul imtahanlarında iştirak etmək üçün, gərək 20-40 manatından keçib qeydiyyata düşməlisən”. Təhsilin başında duran kəslər “kişinin sözü bir olar deyib” tərsliklərindən əl çəkmirlər. “Pulunuzun var girişin, yoxdusa sürüşün” deyirlər. Əhəd müəllim də nə karədir ki, Məleykə xanımın qoyduğu qaydalara qarşı çıxa bilsin. Nisyə ilə kisə dolmaz axı!. Biz qarının qardaşdan irəli tutulduğu cəmiyyətdə yaşayırıq ay Mirzə müəllim!. Ali məktəblər xarab dəzgahlar kimi ancaq xarab məhsullar istehsal edirlər. Belə təhsili olan cəmiyyətin gözləri vallahi-billahi heç vaxt açılmayacaq. Ay Mirzə müəllim, bu məmləkətdə “toxun acdan” demək olar ki, heç xəbəri xəbəri yoxdur. Şərəf və ləyaqət itir, mənəviyyat korlanır, mədəniyyətimiz də səhərdən axşamadək çılpaq bədənlərini efirlərdən nümayiş etdirən şou-biznes əhlindən və bir də hansısa arenalardan ibarətdir. Bir vaxtlar Yuli Sezar da “talpa” dediyi insanların diqqətini özündən yayındırması üçün, arenalar tikdirmişdi ki, başları ancaq əyləncəyə qarışsın. O, vaxtlar elə idi, indi də heçnə dəyişməyib ay Mirzə müəllim!. Məmurlar yeyib-içib, kef çəkirlər. Qara camaat isə, bir qarın çörəkdən ötrü bir-birilərinə qarşı hər nəyə desən əl atırlar. Bu gün yalan ayaq açıb yeriyir, haqq-ədalət deyilən nəsnədən əsər-əlamət qalamyır. Bircə dəyər prinsipi var ay Mirzə müəllim, o da yalnız puldur. Sovet dövrünü stroitipləri hələ də yaşadılmaqdadı. Kompaniyalar, şuarçılıq və şəxsiyyətə pərəstiş kimi insanların
düşünən beynini qapadan tendesiyalar, adlar və təltiflər və s. ay Mirzə müəllim kiçik zümrənin tərənnüm etməsi üçündür, özü də çox eybəcər şəkildə. Beləcə zurna çalanlar ordusu yaratmaqla, ölkəni qaranlığa sürükləyirlər. Birdə görürsən ki, yaltaq və məddahlar vicdan hissi keçirmədən, hüquq və demokratiyadan ağız dolusu danışırlar. Cəmiyyətin yazılmış və yazılmamış qanunlarından dəm vururlar. Belələrini gördükcə içim özümü yandırır, elə ki, yazıram ay Mirzə müəllim, çölüm də özgəni. Belələrinə axı nə deyəsən!. Gəlin görək, Azərbaycan reallığında hansısa bir məmur, yaxud da bank müdiri sadə bir vətəndaşın etdiyi şikayətə görə məhkəməyə cəlb edilib. Heç vaxt. Söyülsə də, döyülsə də həmişə olduğu kimi günahkar, yenə də ac camaat olacaq. İndi deyin görüm 200-300 manat məvaciblə 50-60 min manatlıq avtomobil almaq olar? Ya da ki, çoxsaylı obyektlərə, hektarlarla torpaq sahələrinə sahiblənmək necə? Özlərini qaragünə salan bu camaat imkansızlıq ucbatından yerli xəstəxanalara gedə bilmədiyi halda, bu varlı-hallı məmurlar gəzməli-görməli olan ölkələrin səhiyyə ocaqlarında müayinə və müalicə olunurlar. Sual yaranır, hansı pullarla? Bunun bir hesabını soran varmı? Vallahi-billahi yox!. Kasıbın heç harda yeri yoxdur, nə toyda, nə də ki, yasda. Ay Mirzə müəllim, əvəllər bütə sitayiş olunurdusa, indi ancaq pula. Pulun varsa yuxarı başda yerin var, başın boş olsa belə. Yaşadığımız bu cəmiyyətdə pul hər şeyin üstünü örtür. Varlı kəslərin yas məclislərində adam əlindən tərpənmək olmur. Özlərini dindar adlandırılan bu molla fasonlarda ki, milçək şirəyə yığışan kimi cərgəyə düzülürlər. Din indi ən yaxşı gəlir mənbəyidir. Hələ mən bir dəfə də şahidi olmamışam ki, əli təsbehli, başı əmamalı hansısa bir dindar arxasıza arxa durub, yıxılanın qolundan tutub qaldırsın. Günləri qara olan bu camaatın dini dəyərlərə olan baxışlarını da qara ediblər. Təmiz, vicdanlı vətən sevər insanlar əzilir və hər cür məşəqqətlərə məruz qalırlar. İrəli kimlər çəkilir, başda kimlər otuzdurulur? Ay Mirzə müəllim!. Ay Mirzə müəllim, bu banklarda taun xəstəliyindən betər olublar. Saxtakarlıq deyirsən orda, fırıldaqçılıq deyirsən yenə də orda. Kredit
götürmüş vətəndaşlar soyulur, pensiya və maaş kartları əllərindən alınır. Bir ay gecikməyə görə düz bir il çörək pulundan da mərhum olursan. Beləcə ay Mirzə müəllim, insanları vicdan hissi keçirmədən küçələrə salaraq əl açıb dilənməyə məcbur edirlər. Bank müdiri var ki, rayonun yarsını özəlləşdirib. Cibləri dolu, qarınların tox, bu işbazların heç bir əndizayə sığmayan özbaşınalığının Allahı yox! Bu yerdə yadıma bir şey düşdü. Bir gün kəndə xəbər yayılır ki, Əzrayıl bala paylayır. Camaat bilirsən nə deyir? “Balamıza dəyməsin, balası bizə lazım deyil”. İndi bax, ay Mirzə müəllim vəziyyət belədir. Camaata qənim kəsilən polis də, prokuror da, məhkəmə də ancaq məmur işbazların maraqlarını müdafiə edirlər. Camaatla əsl reket kimi davranırlar. İrili-xırdalı iaşə və ticarət obyektlərini, balıqçı, şorçu, yağçı, bir sözlə alış-verişlə məşğul olan kim varsa, hər kəsi “tas”a otuzdurublar. Saxlanılanları hələ demirəm. İdarə və təşkilatlar da öz yerində. İndi gəl bu prokurorla, polis rəisi ilə hünərin var hesablaşma. Belə olan halda ay Mirzə müəllim, vallahi-billahi şərlənib girov kimi götürülüb təcridxanalara atılacaqsan. Üzə duranlar, işverənlərdə ki, nə qədər istəyirsən var. Ya pulunu verib canını qutarmalısan, ya da ki, sonrasını özün bilirsən. Bankların vəkili qismində çıxış edən məhkəmələrin çıxardıqları hökm və qərarlar qanunlarla deyil, ancaq pullar hesabına ərsəyə gəlir. Ədalət prinsiplərindən uzaq, müstəqil olmayan məhkəmələrdən yaxşı nə isə gözləmək olmaz. Hər gün vətəndaşlara qara məzmunlu, qara məktublar göndərməkdədir, 41-45-ci illərdə olduğu kimi. Əgər 10 gün müddətinə filan məbləğdə borcunuz ödənməzsə, filan maddənin, nə bilim filan bəndinə əsasən ilaxır və sair. Maddələri də elə düzüb qoşublar ki, bərli-bəzəkli maddələr məmur işbazlara şamil olunmur. Bu qara camaatı adam yerinə qoyan yoxdur. Dərd bir deyil, iki deyil, üç deyil, on deyil.. Nə yazmaqla, nə də ki danışmaqla qutarası deyil. Pulun varsa toxunulmazlıq statusu alacaqsan. Amma, bir şərtlə ki, gərək səlahiyyət sahibləri ilə hesablaşasan. Əks halda yaşamaq hüququn əlindən alınıb, qul kimi əziləcəksən.
İndi Sizə kimdən deyim ay Mirzə müəllim! Əmək və Əhalinin Sosial Müdafiəsi Naziri cənab Səlim Müslümovdan və onun ünvanlı sosial yardım, pensiya təminatı və hətta Saatlıda apardığı kadr məsələləri ilə bağlı əndərəbadi işlərindən də danışım. Amma, bu haqda növbəti saylarımızda.

İlham Süleymanov
gundemxeber.az