Lənkərana son səfərində köhnə obyekti yeni kimi prezidentə təqdim edərək kələk gələn başçı “qara siyahı”da; rayon rəhbəri Məhərrəmliyi yasaq edib
Özünə 150 minlik “Rang Rover” alan icra başçısının oğlu “Nardaran işi”ndə gedir; 15 dekabr arayışı hazırdır - Detallar

Lənkəranın icra başçısı Taleh Qaraşov rayonda Məhərrəmlik mərasimlərini qadağan edib. Bu barədə “Gündəm-Xəbər”ə verilən məlumata görə, Lənkəranda Məhərrəmlik qadağalarla keçir.
Rayon rəhbərliyinin göstərişi əsasında məscidlərdən kənarda mərasimlərin qeyd olunması, ehsanlar paylanması olmaz.
Ona görə də axşam saatlarında məscidlərə toplaşan əhali kənara çıxmır, yürüşlər təşkil etmir. Hazırda Lənkərandakı məscidlərin ətrafını post patrul maşınları mühafizə edir.
Hətta kəndlərdə, rayonun ərazisində evlərdə belə ehsanlar verilməsi qadağan olunub. Camaata xəbərdarlıq edilib ki, T.Qaraşovun əmridir, bir yerə yığışmaq olmaz.
Bu qərar lənkəranlılar arasında narazılıq doğursa da, əhali səsini çıxarmır. Çünki polis tərəfindən həbs olunacağı hədəsi var.
Odur ki, sakit şəkildə məscidlərdə qeyd olunan Məhərrəmlik artıq ikinci ildir ki, məhdudiyyətlərlə keçirilir.
T.Qaraşovun başqa bir əmri isə poçt idarəsindəndir. Onun barəsindən Bakıya gedən şikayət məktubları Prezident Administrasiyasına çatmır.
T.Qaraşov bu yolla öz əməllərini ört-basdır etməkdədir. Lakin sosial şəbəkələrdə icra başçısının fəaliyyəti haqda məlumatlar səngimək bilmir.
O baxımdan rayon rəhbəri Məhərrəmliyin keçirilməsini məhdudlaşdırsa da, öz əməllərini gizlətməyi məhdudlaşdıra bilmir.
Elə sonuncu dəfə prezidentin Lənkərana səfəri zamanı açılışını etdiyi “Xəzər Palace” istirahət mərkəzi və otelinin çoxdan fəaliyət göstərdiyi üzə çıxdı.
İcra başçısının isə bu obyekti yeni istifadəyə verilmiş kimi təqdim etməsi sosial şəbəkələrdə ciddi şəkildə müzakirə olundu.
Milyonluq layihənin memarı olan bir şəxsin obyektinin lentini kəsən prezidentə məlumat verilmədi ki, bu məkan kimə aiddir.
Sadəcə, qeyri-neft sektorunun, sahibkarlığın inkişafının vacibliyini qeyd edən prezident İlham Əliyevə çoxdan işləyən obyekti yenisi kimi təqdim etdilər. Faktiki olaraq, Lənkəranda müstəqil sahibkar yoxdur ki, belə bir bahalı proyekti həyata keçirsin.
Ona görə də Lənkəranın icra başçısı Taleh Qaraşov prezidentə ayrı-ayrı məmurlara aid obyektləri göstərməklə rayonda iş getdiyi təəssüratı oyatmağa çalışmışdı.

“Gündəm-Xəbər”in media üzərindən araşdırmalarına görə, rayon rəhbərinin son aylar bahalı avtomobil və dəbdəbəli həyat həvəskarı olduğu bildirilir.
Beləki, Lənkaranın icra başşısı özünə 150 min manata son model "Range Rover" avtomobili alıb. Qaraşovun bu illər ərzindəsahib olduğu bahalı malikanələr və obyektlərini nəzərə almasaq, aldığı 5-ci bahalı avtomobildir.
2017-ci il buraxılışlı və 150 min manata aldığı maşının nömrəsi də çox bahalıdır. 10 UH 002 seriyalı bu avtomobilin nömrəsini rayon rəhbərinə yaxın dostu hədiyyə edib.
İddia olunur ki, Taleh Qaraşovun müavini Rahilə xanım da həmin avtomobilin ağ rəngindən 120 min manata alıb. 90 EG 800 seriyalı bu bahalı maşın rayonda dillər əzbərinə çevrilib.
Mediada yayılan məlumatlarda isə vurğulanır ki, Lənkəranda satışa çıxarılan bir qarış torpaq belə icra başçısının oğlunun icazəsi olmadan realizə edilə bilməz. Təbii ki, bu qədər imkana sahib olan birinin bahalı maşın sürməsi elə də təəccüblü deyil.
Elə buna görədir ki, Taleh Qaraşovun oğlu səhərlər «Lexus», günortadan sonra eyni dövlət nömrə nişanlı (010) «Porşe» sürür.
Ümumiyyətlə, Qaraşov qədər Lənkəranda əraziləri qarış-qarış satan ikinci icra başçısı olmamışdı. Qaraşov özünü tətbiq etdiyi qaydaları qanunlardan üstün tutur.
Bəlkə də, o, elə düşünür ki, dövlət rəhbərliyi ona etimad göstərib bir rayona rəhbər təyin edirsə, deməli, onun dedikləri qanundur. Odur ki, mərkəzi xəstəxananın qabağını iş adamlarına satması da səs-səda doğurmadı.

Mərkəzi Qala küçəsində yol üstü, Nizami kinoteatrının yeri, uşaq xəstəxanasının binası, gimnaziyanın həyəti, Şilavar torpaqları satılıb.
Lənkəran taleyində Taleh Qaraşov qədər rayonu tar-mar edən ikinci icra başçısı görməmişdi. Hətta indi Süleyman Mikayılova şükür edən rayon sakinləri hazırkı icra hakiminin əməllərindən cana doyub.
Habelə, Digəh, Şilavar kəndlərinin yol üstündə torpaqlar peşkəş olunub, bələdiyyənin iştirakı ilə ayrı-ayrı adamlara satılır. İcra başçısı Lənkərana böyük bir bazar kimi baxır və gözqamaşdıran yerləri satışa çıxarır.
Üstəlik, dotasiyaların kəsilməsi Lənkəran RİH-ni “kasıblaşdırıb” və icra başçısı çıxış yolunu daxili resursların xərclənməsində görür.
Yaxın vaxtlarda bir neçə icra başçısının yerinin dəyişdirilməsi, bir neçəsinin isə ümumiyyətlə, vəzifədən kənarlaşdırılması ilə bağlı mətbuatda məlumatlar yayılmaqdadır.
Bakının Xətai rayon icra başçısı postuna daha bir namizəd Lənkəranın icra başçısı Taleh Qaraşovdur. Səhhətindəki problemlər onun Bakı rayonlarından birinə təyinatını uzatsa da, əslində onun iş təcrübəsi yetərlidir.
Həmçinin bu təcrübəyə görə, Taleh Qaraşovun hələ də Bakı rayonlarının birinə təyin edilməməsində mətbuatda yazılan silsilə tənqidi yazıların da təsiri ola bilər.
Üstəlik, Qaraşovun oğlunun adı Nardaran işi üzrə məhkəmədə hallanıb. Müsəlman Birliyi hərəkatı üzvü İsa İbrahimli məhkəmədə qeyd edib ki, icra başçısının oğlu ilə dost olub:
“Lənkəranın icra hakimi Taleh Qaraşov mənim barəmdə yazıb ki, guya mən terrorçuyam. Bu ağ yalandır. Əgər mən terrorçuyamsa o da ,oğlu da terrorçudur. Çünki mən Taleh Qaraşovun oğlu ilə dost olmuşam. Həmişə bir yerdə yemək yeyirdik.
O da həmişə deyirdi atam səni çox istəyir. Səndən razılıq edir .Əgər bir kəs terrorçudursa ,demək onunla dost olan, ondan razılıq edən də terrorçudur.
İstəyirəm ki, gəlsin ifadə versin ki, hardan bilirdi mən terrorçuyam . Mənim terrorçu olduğum haqda yazdığı məktubu sübut etsin”.
Bu fakt özlüyündə icra başçısını aciz vəziyyətdə qoyub. Taleh Qaraşovun oğlunun Taleh Bağırzadənin adamları ilə dostluğu, onlarla əlaqəsinin üzə çıxması, hətta məhkəmədə verdiyi ifadədə başçı oğlu ilə birgə yemək yediklərini deməsi siyasi
hakimiyyətin Qaraşovun üzərindən xətt çəkməsi ilə nəticələnib. Belə görünür ki, karyera yüksəlişi gözlənilməyn Qaraşov tezliklə “vurulacaq”. Onun vəzifə tutacağı ehtimalı çox aşağıdır.
İddialara görə, turizm potensialı yüksək olan Lənkərana yeni islahatçı bir icra hakimi təyin olunması planlaşdırılır ki, Qəbələ, Zaqatala, Şəki kimi bu region da inkişaf etdirilsin.

“Gündəm-Xəbər”in əldə etdiyi məlumata görə, T.Qaraşovun mövqelərinin zəifləməsi və mətbuatdakı emissarlarının azalması, Elnur adlı köməkçisinin mediadakı dostları ilə əlaqələrinin kəsilməsi icra hakiminin vəziyyətini daha da pisləşdirib.
Prezident Administrasiyasına çatan dosyelərdə və mətbuatda çıxan materiallarda Qaraşovla bağlı monitorinq aparılır.
PA-dakı məsul şəxslər dekabrın 15-dək dövlət başçısına icra başçıları haqda arayış təqdim etməlidirlər.
Son müşavirələrin birində prezident tələb etmişdi ki, 15 dekabra kimi arayışlar verilməlidir. Buna uyğun olaraq icra başçılarının fəaliyyəti qiymətləndiriləcək.
Görünür ki, 3 ay qalmış Qaraşovun arayışı heç də müsbət deyil. Lənkərana yolu düşənlər şahidi ola bilər ki, icra hakimiyyəti tərəfindən heç bir iş görülməyib.
Yalnız mərkəzdə görülən suvaq-boyaq işləri, daş-divarın bəzədilməsi icra olunub. Adi bir misal- Lənkəranın yolları hələ də bərbad vəziyyətdən xilas olmayıb.
Onu da deyək ki, prezidentin prioritet addımlarından biri də hakim komandanı gəncləşdirməkdir.
Bu islahatların nazir və komitə sədrləri, müavinləri barədə olacağını xəbər vermişdik. Növbə icra başçılarına çatıb.
Prezident İlham Əliyev gənc islahatçılardan ibarət komandanın təşkili istiqamətində siyasətini möhkəmləndirəcək.
Hakimiyyətin müxtəlif postlarında yerləşmiş məmur ordusu var ki, müasir texnoloji biliklərdən uzaqdır.
İcra hakimiyyətlərində komputeri bilməyən, sms oxumağı bacarmayan, sosial şəbəkələrdən uzaqda olan əli qırışlı, qocalmış, pensiya yaşında məmurlar işləyir. Eləcə də NK-də veteranlar çoxdur.
Onlar dövlət başçısının siyasi-iqtisadi reformalarına maneçilik törədir və islahatların tempinə uyğunlaşa bilmirlər. İqtidar komandasının çoxdan yenilənməsinə ehtiyac var.
Yada salaq ki, dövlət başçısı İlham Əliyev bu ilin əvvəlində və aprelində keçirdiyi müşavirədə yerli icra başçılarına sərt xəbərdarlıq etmişdi. Prezident icra başçılarına rəhbərlik etdikləri rayonlara investisiya cəlb edilməsini şərt kimi qoymuşdu.
“Gələcəkdə yerli icra orqanlarının fəaliyyətinə veriləcək qiymət, eyni zamanda, bu amilə də əsaslanacaqdır - bu və ya digər rayona nə qədər sərmayə gətirilib.
Yerli icra orqanları mərkəzi icra orqanları ilə birlikdə bu işləri təşkil etməlidirlər” deyə, prezident qeyd etmişdi.
Ölkənin valyuta ehtiyatlarının və mərkəzi büdcədən rayonlara ayrılan vəsaitlərin azalması fonunda dövlət başçısının bu tələbi icra başçıları üçün ciddi sınaq sayılırdı.
Məlumatlara görə, iki-üç rayon istisna olmaqla əksər icra başçısı bu tapşırığı yerinə yetirə bilməyib. Onlardan biri də Qaraşovdur ki. heç bir iş görməyib.
Fərqlənən rayon icra başçıları isə yalnız şəxsi əlaqələr hesabına Rusiyanın vilayətləri ilə əməkdaşlıq müqavilələri imzalayıb, qarşılıqlı biznes mühitini canlandırmağa çalışıblar.

Zöhrab Təmrazov
"Gündəm Xəbər"