Xatirə Abdullayeva: Həmin otaqda ikimizdən başqa heç kim olmayıb…

Ərini öldürməkdə təqsirli bilinən Yevlax şəhər sakini, 1980-ci il təvəllüdlü Xatirə Abdullayevanın cinayət işi üzrə məhkəmə prosesi başa çatıb.

Xatirə Abdullayeva ötən ilin mayın 26-da evdə əri, 1982-ci il təvəllüdlü Ağasəf Abdullayevi bıçaqlayıb. O, ağır vəziyyətdə xəstəxanaya yerləşdirilib. Ona xəstəxanada tibbi yardım göstərilsə də, həyatını xilas etmək mçümkün olmayıb. Ağasəf Abdullayev mayın 29-da xəstəxanada vəfat edib.

Xatirə Abdullayevaya Cinayət Məcəlləsinin 126.3-cü (ehtiyatsızlıqdan zərərçəkmişin ölümünə səbəb olma) maddəsi ilə ittiham elan edilib. Onun barəsində olan cinayət işi baxılması üçün Şəki Ağır Cinayətlər Məhkəməsinə göndərilib. Cinayət işi hakim Rəşid Hüseynovun sədrlik etdiyi kollegiyada araşdırılıb.

Məhkəmədə təqsirləndirilən şəxs qismində ifadə verən Xatirə Abdullayeva ona verilmiş ittihamda özünü təqsirli bilməyib. O, ifadəsində göstərib ki, əri Ağasəf Abdullayevlə 2007-ci ilin dekabr ayında ailə həyatı qurub, ancaq övladları olmayıb: “Ağasəfin əsəbləri pozuq olduğundan həmişə qayğısına qalmışam. Övladımız olmadığından Ağasəflə daimi müalicə almışıq. Hətta İrana da gedərək Ağasəfin əsəbləri üçün müalicə götürmüşük. Ağasəf çox əsəbi olub. Buna görə də onu qıcıqlandırmamağa çalışmışam”.

“Ərim heyvanada söyürdü”

Təqsirləndirilən şəxsin sözlərinə görə, hadisədən 2-3 gün əvvəl Ağasəfin halı özündə olmayıb, əsəbləri pozulub, hər şeyə əsəbləşib və deyinib: “O hər gördüyü əşyaya, heyvana da söyürdü. Mayın 25-də, saat 22:00-da Ağasəflə televizora baxdıq. Həmin vaxt çarpayıda uzanaqlı vəziyyətdə olduğum üçün yuxuya getdim. Ağasəfin yanımda yatmasından və ya digər otaqda yatmağa getməsini bilməmişəm”.

“Yataqda da süpürləşmişik”

Xatirə Abdullayeva bildirib ki, mayın 26­da, saat 04:30-da yatağında olan zaman qəflətən sinəsinə ağırlıq çöküb: “Yuxudan oyananda bir kişinin məni boğduğunu hiss etdim. “Aska” deyə çağıranda qəflətən sifətimin sağ tərəfinə yumruq dəydi. Dərhal özümü müdafiə etməyə başladım, əlimi onun sifətinə vuranda, həmin şəxsin üzü tüklü olmasını hiss etdim. Həmin şəxsi özümdən kənara itələyəndə, sol qolumun bilək hissəsini həmin şəxs dişlədi və onun başını çarpayının yaxınlığındakı tumbanın tininə vurdum. Həmin şəxs boğazımdan tutaraq məni boğduğuna görə fəal müdafiə olunmuşam, süpürləşən zaman həmin şəxs sol əlimin orta barmağını dişlədi. Onun ağzının üstünə yumruqla vuraraq barmağımı çıxartdım. Sonra isə onunla yerdə süpürləşdik, dalaşan zaman onun başını çarpayının tininə vurmuşam. Amma həmin şəxs məndən əl çəkməyib, yataqda da süpürləşmişik”.

“Həyat yoldaşımı döydüyünü dedim”

Təqsirləndirilən şəxs qeyd edib ki, aralarındakı dava 10-15 dəqiqə çəkib: “Həmin otaqda ikimizdən başqa heç kim olmayıb. Həmin şəxs ilə yataq otağında dava etmişəm, onunla ancaq yataq otağındakı çarpayıda süpürləşmişik. Başqa heç bir otağa getməmişik. Həmin vaxt Ağasəfin harada olmasını bilməmişəm. Həmin şəxs ilə süpürləşərək çarpayının qarşı tərəfinə düşdüm. Bu zaman huşum özündən getdi, alatoranlıq həmin şəxsin evdən çıxmasını gördüm. Ayılanda divardan tuta-tuta çölə çıxdım. Orada çöl qapının açıq olmasını gördüm. Qonşu Gülər xalanı çağırdım, ona kimsə evimizə girib, məni və həyat yoldaşımı döydüyünü dedim”.

“Polis əməkdaşı məni incidib”

Xatirə Abdullayeva ibtidai istintaq zamanı qətli törətməsini etiraf etməsi ilə bağlı ifadəsini təzyiq altında verdiyini deyib: “Gülərə xala Ağasəf məni öldürürdü, məni yeyirdi, köməyə gəlin!” deməmişəm. Məni boğan, xəsarət yetirən şəxs kənar şəxs olub. Həmin şəxsi tanımıram. Həmin şəxsi qaranlıq olduğundan və eynəyim gözümdə olmadığından tanıya bilməmişəm”.

O, qeyd edib ki, etirafedici ifadələrini onu aldadaraq alıblar: “Eynəyim gözümdə olmadığı üçün oxuya bilməmişəm, ifadələrimdə nələr yazılmasını bilməmişəm. Məni polis əməkdaşı Kərim Əzizov incidib. Ona görə də etirafedici ifadələr vermişəm. İfadəm yerində yoxlanan zaman isə hadisə barədə danışmışam”.

“Dedi ki, qardaşın qudurub”

Zərərçəkmiş şəxsin hüquqi varisi Rəsmiyyə Ələsgərova bildirib ki, Ağasəf ilə Xatirə 2007-ci ilin dekabr ayında ailə qurub, uzun müddət evli olmalarına baxmayaraq övladları olmayıb, bununla bağlı müalicələr götürüblər, hətta müalicə almaq üçün İran İslam Respublikasına da gediblər: “Mayın 26-da saat 05 radələrində bacım Ülviyyə yaşadığı Yevlax rayonu Səmədabad kəndinə gəldi və qardaşım Ağasəfin arvadı Xatirə ilə dalaşdığını bildirdi, bir yerdə İsmayılabad kəndinə getdik. Qardaşımın yaşadığı həyət evinə çatanda qonşulardan Gülər, Xəyalə, Şəlalə, Arifə, Qasım, bacım Pərvanə və Pərvanənin oğlu Salehin orada olduğunu gördük. Həmin vaxt orada olan qonşular ”qardaşınız Ağasəf qudurub içəri keçməyin” deyə bildirdi. Çünki qardaşım Ağasəfin həyat yoldaşı Xatirə qonşulara özü bildirib ki, evə kimsə girib, məni cırmaqlayıb, məni öldürməyə çalışırdı, mən də saqqallı adama zərbə vurmuşam və bismillah Aska demişəm. Bundan sonra Ülviyyə, Pərvanə, bacım oğlu Saleh və qonşumuz Qasımla birlikdə Ağasəfin olduğu otağa girdik. İçəri daxil olanda otaqda qardaşım Ağasəf üzü divara tərəf yanı üstə uzanmış vəziyiyyətdə, bir əli üzünə, bir əli isə ayaqlarının arasına qoyulmuş vəziyyətdə olduğunu gördük. Ağasəfə yaxınlaşdım. Bu zaman onun ağzı-üzü, burnu qanlı olduğunu, ağzında və başında xəsarətlər aldığını gördüm”.

“Qardaşımı arvadı öl­dürüb”

Rəsmiyyə Ələsgərovanın sözlərinə görə, Ağasifi xəstəxanaya aparıblar, mayın 29-da xəstəxanada vəfat edib. O, qeyd edib ki, qardaşının qətli ilə bağlı polisdən maraqlanıb: “Polislərdən eşitdim ki, qardaşımı həyat yoldaşı Xatirə vuraraq qəsdən öldürüb. Hətta hadisədən sonrkı gün polislər Xatirənin ifadəsini yerində yoxlayıb. Bu zaman Xatirə özü etiraf edərək Ağasəfi vuraraq xəsarət yetirdiyini bildirib. Bu zaman bilmişəm ki, Xatirənin Bakı şəhərində qohumlarının 2-3 gün sonra toyu olacaqmış, Xatirə də həmin məclisə dəvət alıb, Ağasəf isə Xatirəyə toya getməyə icazə verməyib. Oğlum Nemət hadisədən 2 gün əvvəl evdə su çəni üçün dəmir boru lazım olduğundan və həmin borudan qardaşım Ağasəfin yaşadığı ünvanda olduğu üçün Ağasəfin yaşadığı evə gedib, evə gələndə isə mənə dedi ki, boru lazım olduğu üçün dayım Ağasəf gilə getmişdim, dayım Ağasəflə Xatirə danışmırdı, küsülü idilər, küsülü olmasının səbəbini dayım Ağasəfdən soruşdum, dayım dedi ki, Xatirə Bakı şəhərində yaşayan qohumlarının toy mərasiminə dəvət alıb, pulum yoxdu toya getməyə, Xatirəyə də demişəm ki, heç kim toya getmiyəcək, lakin Xatirə məni saymır, mənə cavab qaytarır, sözümdən çıxır, buna görə neçə gündür ki, mənimlə mübahisə edir və deyir ki, evdə baldızım Qərənfilin pulu var, onu götürüb icazə versən də verməsən də toya gedəcəyəm. Hadisə baş verən vaxtda qardaşım Ağasəf arvadı Xatirəyə toya getməməsi üçün iradlarını bildirdiyinə görə aralarında mübahisə yaranıb və Xatirə də Ağasəfi döyərək öldürüb”.

Cinayət işi üzrə şahid qismində polis əməkdaşı Kərim Əzizov ifadə verib. O, Xatirə Abdullayevanı tutaraq polis şöbəsinə gətirdiyini, onu döymədiyini, incitmədiyini deyib.

Məhkəmənin hökmü ilə Xatirə Abdullayeva 10 il 6 ay müddətinə azadlıqdan məhrum edilib. O, hökmdən narazı qalıb, apelyasiya şikayəti verib və barəsində bəraət hökmünün çxıarılmasını istəyib.

Həmçinin zərərçəkmiş tərəf də apelyasiya şikayəti verərək, təqsirləndirilən şəxsə daha ağır cəzanın verilməsini istəyib. Tərəflərin şikayəti araşdırılması üçün Şəki Apelyasiya Məhkəməsinə göndərilib.

Hakim İmanverdi Şükürovun sədrliyilə baş tutan prosesdə qərar elan edilib. Qərara görə, həm təqsirləndirilən şəxsin, həm də zərərçəkmiş tərəfin şikayəti təmin edilməyib.

Aslan
gundemxeber.az