"Azərsu"nun tikdiyi kollektor niyə birinci yağışa tab gətirmədi?

"Sentyabrın 30-dan başlayaraq, Bakıya normadan artıq yağan yağışlar rayonumuzun bəzi magistral küçələrində və fərdi yaşayış evlərinin həyətyanı sahələrində su gölməçələrinin yaranmasına səbəb olmuş, həmçinin yollarda avtomobillərin hərəkətində məhdudiyyətlər yaranmışdır".

Bu fikirlər Binqədi rayon İcra Hakimiyyətinin Feysbukdakı səhifəsində oktyabrın 3-də yerləşdirilmiş məlumatda əksini tapıb. Yəqin ki, əlavə təfsilata ehtiyac yoxdur. Artıq rayon rəhbərliyi də bir az yağış yağdıqdan sonra Binəqədi ərazisində necə bərbad, acınacaqlı durum yarandığını etiraf edir.
Onu da qeyd edək ki, həmin məlumatın ikinci hissəsində deyilir ki, qeyd edilən tarixdən güclü yağış sularının törətdiyi problemlərin aradan qaldırılması istiqamətində dərhal aidiyyəti qurumlar, o cümlədən bələdiyyələr tərəfindən texnikalar əraziyə cəlb edilərək, yağış sularının mövcud kollektorlara yönləndirilməsi istiqamətində təxirəsalınmaz tədbirlər görülmüş və problemlər aradan qaldırılmışdır: "Məlumat üçün bildiririk ki, ərazilərdə yaranan müvəqqəti problemlər- yağış suları ilə dolmuş ərazilərdə su axının təmin edilməsi işləri davam etdirilir".

Ancaq məlumatın bu hissəsi o qədərə də həqiqətə uyğun deyil. Biz istisna etmirik ki, hansısa ərazilərə müəyyən sayda texnika çıxarılıb. Bu elə həmin səhifədə yerləşdirilən fotodan da aydın görünür. Təqdim etdiyimiz fotoda bir neçə kadr birləşdirilib və onların hamısı eyni məkanda çəkilib. Elə bu özü də təsdiq edir ki, Binəqədi Rayon İcra Hakimiyyəti əhalinin hədsiz narazılığından sonra gözdən pərdə açmaq üçün bu kadrları paylaşıb. Əgər doğrudan da İcra Hakimiyyətinin qeyd etdiyi kimi, "güclü yağış sularının törətdiyi problemlərin aradan qaldırılması istiqamətində dərhal aidiyyəti qurumlar, o cümlədən bələdiyyələr" hərəkətə keçsəydi, onda bir çox məkanlarda yağış sularının kollektorlara yönləndirilməsi işi aparılar və İcra Hakimiyyəti müxtəlif məkanlarda bu işlərin aparıldığının təsdiqi kimi fərqli məkanlardan, həm də fərqli və çoxli fotolar yayardı. Ancaq icra hakimiyyətinin məsələyə formal yanaşdığı, əhalini aldatdığı, yalan söylədiyi elə onun özünün paylaşdığı məlumatdan da gün kimi aydın görünür. Bu, öz yerində. İkinci tərəfdən, Binəqədi rayon İcra Hakimiyyətinin başçısı Xaləddin İsgəndərov cənabları niyə bu vaxta qədər oturub gözləyirdi ki, yağış yağsın, küçələri sel-su bassın, kanalizasiya xəttləri dolub-daşsın və o, yalnız bundan sonra problemlə mübarizəyə başlasın? Görünür, icra başçısının yay istirahəti çox uzun çəkib, başı kef məclislərinə o qədər qarışıb ki, kanalizasiya məsələsi onun yadına düşməyib. Bir də ayıbdır axı, Xaləddin müəllim hara, Binəqədinin çirkab sular içində batması, kanalizasiya dərdi hara? Xaləddin müəllim çox mədəni adamdır, çox mühüm, ali, müqqədəs işlərlə məşğul olur. Məsələn, ev yıxmaqla. Yox, başqa cür başa düşməyin. Xaləddin müəllim qanunpərəst adamdır. O, yıxdığı evlərin adını "qanunsuz tikili" qoyur, sonra da yıxır. Heç çox vaxt da yıxmır, istədiyini alandan sonra humanistlik sərgiləyir və Sulutəpədə, Binəqədidə, Xocahəsəndə ev tikənlərə "yaşıl işıq" yandırır. Zatən Xaliəddin müəllimin "humanistliyinin" qiyməti elə də baha deyil. Qətiyyən. Ən çoxu 10-15 min manat. İndiki devalvasiya dövründə 10-15 min manat Xaləddin müəllim üçün nədir ki?... Siz də deyirsiniz ki, bu cür humanist, vətənpərvər, mənəviyyatlı, səxavətli, canım sizə desin, aristokrat adam durub kanalizasiya ilə məşğul olsun? Ayıb deyilmi?

Nə isə, mövzudan uzaqlaşmayaq. Mövzumuz yağış sularının Binəqədini bərbad, üfunətli vəziyyətə salması idi. Üfunət demişkən, məni bir sual çox maraqlandırır. Görən, Xaləddin müəllim avqust ayında Binəqədidəki möhtəşəm iqamətgahından çıxıb, bahalı avtomobilinə əyləşib, Binəqədi kəndində, Fatmayıya, Mehdiabada, ya olsun, Novxanıya gedibmi? Demirik, problemlərlə maraqlanmağa. Sadəcə, dəniz sahilində təmiz hava udmağa, yaxud yayın istisindən bir az sərinləmək üçün dənizdə çimməyə?.. Bunu nəyə görə soruşuruq? Yəqin ki, yayın istisində (elə indinin özündə də) Binəqədi kəndinə, Fatmayıya, Pirşağıya, Novxanıya və s. yolu düşənlər bilməmiş olmaz, mədən ərazisindən nəciz iyindən keçmək olmur! Bəli, düz başa düşdünüz! Nəcis iyindən! Bu iy Bakının ən böyük rayonlarından olan Binəqədidən gəlir! Xaləddin müəllimin rəhbərlik etdiyi rayondan! Mən məətəl qalıram ki, insanlar burada necə yaşayır. Həmin ərazini marşrut 5 dəqiqəyə keçir. İnanın ki, pis qoxudan bu ərazidən keçmək mümkün deyil. Neçə dəfə qadın və uşaqların bu pis qoxudan ürəyinin bulanması və qaytarmalarının şahidi olmuşam. Görən, Xaləddin müəllim bu faktdan məlumatlıdırmı? Yoxsa, o isti havada belə bir dəhşətli mənzərənin şahidi olmayıb. Olmaz təbii! Kondisionerli, lüks avtomobldə bu üfunəti hiss etmək mümkün deyil. Bəs, onun ərazi nümayəndələri, bələdiyyələr hara baxır: Nədən onlar rayon rəhbərini bu biabırçılıqdan xəbərdar etmirlər? Əlbəttə, günah Xaləddin müəllimdə deyil. Xaləddin müəllim Respublika Gigiyena və Epidemiologiya Mərkəzinin direktoru deyil ki, pis qoxulara cavabdeh olsun. Xaləddin müəllim dağ işinə baxır. Harda çuxur görürsə dərhal orada əzəmətli bir dağ ucaldır. Həmin dağın ətəklərində də rəngbərəng gül-çiçək əkir. Odur ki, əziz binəqədililər, bir az da dözümlü olun, inşallah, yaz gələr, Xaləddin müəllimin dağlarının ətəklərindəki güllər çiçək açar və o zaman siz o nəcis iyini bilmərrə unudarsiz. Di, azca dözümlü olun.

Lənət şeytana. Mən axı yağış sularından danışacaqdım. Heç özüm də bilmirəm ki, söhbət hər dəfə niyə hərlənib-firlanıb türkün sözü, Xaləddin müəllimin üstünə gəlir. Nə isə, qayıdaq mövzumuza...
Xaləddin müəllimin xətrinə dəyməsin, amma Binəqədi rayonunda, eyni zamanda Binəqədi qəsəbəsində vəziyyət çox acınacaqlıdır. Qəsəbənin Birinci Mədən küçəsində abadlıq işləri aparılmadığından və məhəllədaxili küçələrin yolları təmir olunmadığından, kanalizasiya xətləri çəkilmədiyindən sakinlər əziyyət çəkirlər.
Hətta quraqlıq vaxtlarda belə Birinci Mədən, 40-cı korpus massivində yollar hələ də palçıq içində olur. Kanalizasiya suları küçələrə axdığından burada üfunət iyindən dayanmaq mümkün deyil. Sakinlər deyir ki, içməli su xətti kanalizasiya borusunun içərisindən keçir. Bu, antisanitariya, xəstəlik deməkdir və insan həyatı üçün təhlükə mənbəyidir. Burada insanlar hər an, hər dəqiqə yoluxucu xəstəliklərə, mənşəyi məlum olmayan viruslara yoluxa bilərlər. Zibil qutuları qoyulmadığından sakinlər məişət tullantılarını küçəyə, yol qırağına atırlar. Bu da istər-istəməz məhəllədə natəmizlik yaradır. Yollar pis vəziyyətdədir. Ucqar kənd yolları burdakı yoldan yaxşıdır. Az öncə güclü yağış olanda isə bura tamamilə keçilməz idi. Bundan başqa yağış və çirkli kanalizasiya sularının evlərə dolur. Yol gölməçələrin ağuşunda olduğundan valideynlər uşaqları məktəbə aparıb gətirə bilmir.

Birinci Mədən, 205-də də eyni vəziyyət hökm sürür. Həmin ünvanda ərazidə qazılmış torpaq topa halında qalıb. "DSK" deyilən yol, yəni, təzə avtovağzal istiqamətində gedən marşrut yolu bərbad vəziyyətdə, palçığın içindədir. Sakinlərin dediklərinə görə, yağışlı günlərdə yolu su basır, yollarda dərin göllər əmələ gəldiyindən avtobus və avtomobillərin də hərəkəti çətinləşir. Məişət tullantıları yolun qırağına atılıb. Yolboyunca ərazi zibilliyə qərq olub və ərazidə hər cür məişət tullantılarına rast gəlinir. Burdan da açıq şəkildə görünür ki, Binəqədi qəsəbəsi payız-qış mövsümünə hazır deyil.

Bələdiyyə və icra hakimiyyəti isə təbii ki, su və kanalizasiya probleminə görə "Azərsu" və “Azəravtoyol” ASC-ləri ittiham edirlər.

Onu da qeyd edək ki, Bakı şəhərində yağış kanalizasiya sisteminin təkmilləşdirilməsi ilə bağlı dövlət başçısı sərəncam imzalayıb.

Görün, indi "Azərsu" ASC nə deyir. Qurumun bu il sentyabrın 8-də yaydığı açıqlamada bildirilir: "Azərsu" Açıq Səhmdar Cəmiyyəti Bakı şəhərində yağış sularının yığılma təhlükəsi olan avtomobil yolları və ərazilərdə səth sularının kənarlaşdırılması üçün kompleks tədbirlərin görülməsi haqqında Azərbaycan Respublikası Nazirlər Kabinetinin sərəncamından irəli gələn layihələr çərçivəsində işlərin böyük hissəsi icra edib.

Sərəncama əsasən, Abşeron yarımadasının müxtəlif ərazilərində 13 layihənin həyata keçirilməsi nəzərdə tutulub və may ayından tikinti-quraşdırma işlərinə başlanılıb. Qısa müddət ərzində 6 ərazidə - Böyükşor gölü, Taşağıl gölü, Ramana Südçülük Sovxozu, Binəqədi şosesi, Əliyar Əliyev, Yusif Səfərov küçələrində layihələrin icrası yekunlaşıb, digər ərazilərdə tikinti-quraşdırma işləri davam etdirilir. Bu layihələr çərçivəsində layihələndirilmiş 17,5 km kanalizasiya kollektorlarının 13,5 km-lik hissəsi inşa edilib.

Binəqədi şosesi boyu yağış sularının kənarlaşdırılması məqsədilə müxtəlif diametrli borularla 2,9 km uzunluğunda kollektor tikilib. Bununla da intensiv yağıntılar zamanı Binəqədi şosesində yığılan sular yeni inşa olunmuş kollektorla Böyükşor gölünə axıdılacaq. Eyni zamanda Böyükşor gölünün səviyyəsinin tənzimlənməsi layihəsi çərçivəsində 1,5 km uzunluğunda kanalizasiya kollektorunun inşası yekunlaşıb".

Qardaş, indi biz bu "Azərsu"ya necə inanaq? Bunlar sentyabrın 8-də deyir ki, Binəqədi şosesi boyu kollektor tikilib və problem həll olunub. Sentyabrın 30-da isə güclü yağış yağır və Binəqədi rayonu sel sularının altında qalır. Bəs, bu kollektorlar tikilmişdisə, onda niyə rayonda belə biabırçı vəziyyət yarandı? Niyə "Azərsu" rəhbərliyi çıxıb buna izahat vermədi?

Bir balaca yağış yağan kimi çıxılmaz gölə çevrilən Binəqədi yolu da uzun müddətdir təmir edilir, amma ortada nəticə yoxdur. Yol tamamilə sıradan çıxdığı üçün, yayda toz-torpaq, qışda palçıq-çirkab suları və yağan yağış buranı keçilməz vəziyyətə salır. Təbii ki, küçənin bu vəziyyətdə olması vətəndaşların gediş-gəlişinə problem yaradır.
Yolun təmirsiz olması ərazidə saatlarla davam edən tıxacların yaranmasına gətirib çıxarır. Səhər və axşam saatlarında "Zəngəzur"-un qarşısı bərbad şəkildə tıxac olur. İnsanlar saatlarla tıxacda qalır.
"Azərsu" və“Azəravtoyol” rəhbərlərindən fərqli olaraq, sakinlər deyirlər ki, onları daha məşəqqətli günlər gözləyir. Belə ki, payız-qış aylarında yolun "Venesiya"dan heç bir fərqi olmur. Sakinlərin dediyinə görə, ötən il Binəqədi rayonu yağış suları altında qalanda, FHN əməkdaşları bu ərazidə yaşayan sakinləri qayıqlarla xilas ediblər. Odur ki, deyəsən bu il də FHN-nin qayıqlarına böyük ehtiyac yaranacaq.

Bir daha xatırladaq ki, Azərbaycan Respublikası Prezidenti İlham Əliyev Bakı şəhərində yağış kanalizasiya sisteminin təkmilləşdirilməsi ilə əlaqədar işçi qrupunun yaradılması haqqında sərəncam imzalayıb. Həmin işçi qrupu tərəfindən 14 layihə hazırlanıb və onların bəziləri hətta həyata da keçirilib. Təkcə 12 layihəyə 14 milyon 200 min manat vəsait ayrılıb. Bu layihələr Bakının bütün ərazilərini əhatə edir. O cümlədən də haqqında danışdığımız Binəqədi rayonunu. Binəqədidə layihənin bir hissəsi başa çatıb. Ancaq vəziyyət yuxarıda qeyd etmiyimiz kimidir? Maraqlıdır, kanalizasiya sisteminin yaxşılaşdırılması üçün milyonlarla manat dövlət vəsaiti xərclənirsə, bəs niyə sentyabrın 30-da Binəqədi sel-suya qərq olmuşdu? Yoxsa Prezidentin ayırdığı pullar təyinatı üzrə xərclənmir və mənimsənilir? Ümid edirik ki, "Azərsu" və "Azəravtoyol"un səlahiyyətli şəxsləri yazıda qaldırdığımız suallara aydınlıq gətirəcəklər.

Rahib Bəxtiyarov
gundemxeber.az