Asif Lətifovu belə bir addımlar atmasına vadar edən əsas səbəb, onun “Kapital Bank”ın Nizami rayon filialında üz-üzə qaldığı problemlərin varlığı olur

Dünən “Gündəm Xəbər”in redaksiyasına Abşeron rayonu, Xırdalan şəhəri 27-ci məhəllə, ev-2B mən-40 ünvanda yaşayan Xüsusi Dövlət Mühafizə Xidmətinin sabiq zabiti Lətifov Asif Aydın oğlu tərəfindən növbəti müraciəti daxil oldu. Bu şəxs ünvanladığı müraciətində üz-üzə qaldığı probleminin həllinə hələ də nail ola bilmədiyindən, o, bir-iki gün bundan öncə ölkə rəhbəri cənab İlham Əliyevə, Azərbaycan Respublikasının 1-ci vitse-prezidenti Mehriban xanım Əliyevaya, Dövlət Təhlükəsizlik Xidmətinin rəisi cənab Mədət Quliyevə və Maliyyə Naziri cənab Samir Şərifova da müraciətlərini ünvanlayır. Asif Lətifovu belə bir addımlar atmasına vadar edən əsas səbəb, onun “Kapital Bank”ın Nizami rayon filialında üz-üzə qaldığı problemlərin varlığı olur.
Müraciət müəllifi “Gündəm Xəbər”ə ünvanladığı müraciətində yazır ki, “mən 24 fevral 1992-ci il tarixdə sovet dönəmində fəaliyyət göstərən dövlət bankına qoyduğum 11610 rubl pulumu üzürlü səbəblərdən ala bilməmişdim. Baxmayaraq ki, cənab Prezidentin imzaladığı sərəncama əsasən, vaxtilə vətəndaşların banklara qoyduqları əmanətlərin qaytarılması üçün, 2013-cü ilin 31 dekabrı son vaxt olaraq qeyd olunub. Amma, mən müəyyən səbəblər üzündən 29 avqust 2012-ci ildən 28 fevral 2017-ci il tarixə kimi azadlıqdan məhrum edildiyim üçün, cəzamı 9 saylı cəzaçəkmə müəssisəsində çəkmişəm. 2012-ci ildən 2013-cü ilin sonuna kimi Bakı İstintaq Təcridxanasında saxlandığımdan valideyinlərimlə görüşümə icazə belə verməyiblər. Hətta, valideyinlərimə qanuni nümayəndəm olmaları barədə etibarnamə də verə bilmədim.
Belə bir problemlərimlə bağlı “Kapital Bank”ın müştərilərlə şöbə müdiri vəzifəsini daşıyan Seymur Rzayevin iş otağında, adı çəkilən bankın idarə heyyətinin sədri cənab Rövşən Allahverdiyevə, vaxtilə dövlət bankına qoyduğum əmanətimin qaytarılması ilə bağlı yazdığım ərizəyə hələ də cavab verilməyib. Buna görə də, almalı olduğum əmanətimi hələ də ala bilməmişəm. Bu gün də getgələ salınmaqdan, süründürməçilikdən bezmişəm. 26 sentyabr 2017-ci il tarixdə növbəti dəfə “Kapital Bank”ın əsas binasına üz tutdum və müştərilərlə xidmət şöbəsinin müdiri Seymur Rzayevlə görüşdüm. Görüşümüz zamanı o, bildirdi ki, “cənab Rövşən Allahverdiyev vəzifəli şəxs olduğundan bir kimsəni qəbul etmir, amma onun adına yazmış olduğun ərizə, ona təqdim olunduqdan sonra müəyyən araşdırmalar aparılır”.
Seymur Rzayev yanımda bankın məktublar şöbəsinə daxili nömrə ilə zəng etdi və az sonra mənə bildirdi ki, “sənin əməanət bankında olan ödəniş kartıçkalarını bank əməkdaşları itiriblər”. O halda ona əməanət kitabçamın əslini göstərdim, növbəti dəfə isə kitabçamın surətini ona təqdim etdim. İndi məni təəccübləndirən hal odur ki, bank tərəfi bu günə kimi mənə məxsus vəsaitlərin faizlərini götürüb, indi də bildirirlər ki, “ödəniş kartıçkalarını itiriblər”. Belə olan halda, görəsən hansı şəxs ona məxsus vəsaitləri banka qoymaq qərarına gələr və banka da etibar edər? Axı, bu cür addımlar istənilən şəxsə, o cümlədən mənə qarşı da təhqiredici addımdır, utanc gətirən hadisədir! Mənə məxsus kartıçkaları “Kapital Bank”ın Nizami rayon filialında itiriblərsə, deməli məsuliyyəti də bank tərəfi daşıyır. Əgər bank əməkdaşları işlərinə məsuliyyətlə yanaşsaydılar, o halda belə bir olayla da üz-üzə qalmazdım. İndi bankdan hər hansı borc və yaxud kredit istəmirəm, sadəcə olaraq 1991-ci ildə dövlət bankına qoyduğum əmanət pullarımı istəyirəm. Bu mənim Konstitusiya ilə tənzimlənən hüququmdur və həmin pulllar da mənə verilməlidir. Bu günə kimi belə bir problemimi həll edə bilmədiyimdən, qarşı tərəfdən əsaslandırılmış cavab məktubu verilmədiyindən, artıq vəkilim Elçin Sadıqov məhkəməyə müraciət etmək qərarına gəlib.
Hörmətli Prezident və digər vəzifə sahibləri! Əgər 17 il XDMX-də xidmət etmiş bir zabit olaraq Sizə şikayət məktubu ünvanlayıramsa, bu artıq sözün bitməsi deməkdir. Görəsən “Kapital Bank” tərəfindən mənə qarşı bəslənilən ögey münasibətə, sayğısızlığa son qoymağın zamanı çatmayıbmı? Dəfələrlə “Kapital Bank”ın əsas binasında olub bankın səlahiyyətlilərinə müraciət etməyimə baxmayaraq, qarşı tərəfdən hər dəfə belə bir cavab almışam “Rövşən Allahverdiyev vəzifəli şəxsdir, o, bir kimsəni qəbul etmir, get gözlə”. Artıq bu gün belə bir qənaətə gəlmişəm ki, kimlərinsə günahı ucbatından mənə məxsus əmanətin üstündən xətt çəkilə bilməz. Odur ki, Sizdən artıq dərəcədə xahiş edirəm ki, bu məsələyə xüsusi diqqətin ayrılması və mənə məxsus 11610 rubl əmanətimin mövcud valyutamızın bugünkü dəyəri ilə hesablanaraq verilməsi üçün, aidiyyəti üzrə lazımi tapşırıqlarınızı verəsiniz”. Qəzetimiz bazar günü çapa hazırlandığından və həftənin bazar günü olduğundan, qarşı tərəfin problemin varlığına münasibətini öyrənə bilmədik. Onu da vurğulayaq ki, Asif Lətifov 4 il 6 ay müddətinə siyasi məhbus həyatı yaşamış şəxs olub. Qarşı tərəfin də mövqeyini dinləyə bilərik. Araşdırmamız davam edəcək.

Mirzə
"Gündəm Xəbər"