Problemin varlığı ondan ibarətdir ki, MİS əməkdaşları əmlak vergisini yığdıqdan sonra, sakinlərin mənzilləri bələdiyyə əməkdaşları tərəfindən döyülür və onlardan təkrar əmlak vergisi tələb olunur

Abşeron rayonu Xırdalan şəhəri 27-ci məhəllədə yaşayan sakinlərin problemləri bu gün də bitib tükənmək bilmir. Buna səbəb, 2 saylı MİS əməkdaşlarının ərazi üzrə yerləşən bina sakinlərinin mənzillərinə gələrək əmlak vergisi tələb etmələri və əmlak vergisi ödənildikdən sonra, hər kəsə adı çəkilən qurum əməkdaşları tərəfindən qəbzin verilməsi olur. Həmin vaxt problemin varlığı ondan ibarət olur ki, MİS əməkdaşları əmlak vergisini yığdıqdan sonra, çox keçmir ki, sakinlərin mənzilləri bələdiyyə əməkdaşları tərəfindən döyülür və onlardan təkrar əmlak vergisi tələb olunur.
Belə bir halın varlığının artıq on gündən çox olduğu da bildirilir. Bələdiyyə əməkdaşları sakinlərə “əmlak vergisi hər kvm-ə görə bələdiyyəyə ödənilməlidir” dedikdə, sakinlər bələdiyyə əməkdaşlarına “sizdən öncə 2 saylı MİS-nin əməkdaşları gəlmişdilər, biz əmlak vergisini onlara ödədik, bu da qəbz” dedikdə, bələdiyyə əməkdaşları verilən qəbzin saxta olduğunu və əmlak vergisinin birbaşa onlara ödənilməli olduğunu vurğulayırlar. İki yol ayrıcında qalan sakinlər 2 saylı MİS-ə müraciət etdikdə, adı çəkilən qurumdan onlara bildirirlər ki, “əmlak vergisi ilə bağlı mənzilinizə gələn bələdiyyə işçilərini qovun getsinlər, onlar əmlak vergisini yalnız həyətyanı sahələrdən istifadəyə görə toplamalıdırlar” deyirlər. Sakinlər artıq belə bir oyunlardan yorulduqlarını bildirir və ümid edirlər ki, bu cür çirkin oyunlara aidiyyəti qurumlar tərəfindən aydınlıq gətirilməlidir. Artıq çıxılmaz duruma düşən sakinlər qəzetimiz vasitəsilə ölkə rəhbəri cənab İlham Əliyevə, hörmətli 1-ci vitse-prezident Mehriban xanım Əliyevaya, PA-nın şöbə müdiri cənab Zeynal Nağdəliyevə müraciət edib xahişlərini çatdırırlar ki, “bu cür haqsızlığa son qoyulması üçün aidiyyəti üzrə lazımi tapşırıqlarınızı verin ki, tapdanmış hüquqlarımızı bərpa edə bilək. Eyni zamanda arzumuz budur ki, belə bir addım atan hər kəsə Allah-Təala ağıl versin ki, sakinlər belə bir çirkin oyunlara bir daha sürüklənməsinlər”.
Yaşanan problemlərə daha ətraflı aydınlıq gətirilməsi üçün, qeyd olunan ünvanda yaşayan sakinlərindən olan XDMX-nin sabiq zabiti olmuş Asif Lətifovla əlaqə saxlamağı özümüzə borc bildik. O, baş verənləri təsdiqlədi və bizə bildirdi ki, “29 avqust 2017-ci il tarixdə, saat təqribən 16:00-da yaşadığımız mənzilə bələdiyyə əməkdaşları gəlib bildirdilər ki, “siz əmlak vergisini yerli bələdiyyəyə ödəməlisiniz. Pulunuzu kimə vermisinizsə, gedin onlardan da geri tələb edin”. Daha sonra o, onu da bildirdi ki, “Vergi Məcəlləsinin 199-cu maddəsində vergi güzəştləri və azad olmalar haqqında Qanun tövsif olunub. Həmin Qanunun 199.3 maddəsində pensiyaçıların, müddətli hərbi xidmət qulluqçularının və onların ailə üzvlərinin müddətli hərbi xidmət dövründə yaşadıqları mənzillərə görə ödəməli olduqları əmlak vergisinin məbləği 30 manat azaldılır. Bu da həmin Məcəllənin 102.2-ci maddəsində göstərilən şəxslərin, 1-ci və 2-ci qrup əlillərin, sağlamlıq imkanları məhdud olan və 18 yaşa çatan şəxslərin əmlak vergisindən 30 manat azad olmaları deməkdir. Yəni, istifadədə olan ümumi sahənin 30 kvm-i həmin şəxslərə bağışlanılır. Ancaq həmin şəxslər hər nəfərə görə zibilpulu ödəməyə borcludurlar. Mənzillərə gedib sakinlərini narahat etməkdənsə, vəzifə sahibi olanlar Vergi Məcəlləsini qarşılarına qoyub oxusalar daha məqsədə uyğun olar” deyə Asif Lətifov bildirdi.
Asif Lətifovdan Abşeron rayonu Xırdalan şəhəri 27-ci məhəllədə yaşanan problemlərlə bağlı lazımi məlumatları əldə etdikdən sonra, adı çəkilən şəxslə bağlı redaksiyamıza daxil olan başqa bir məlumatı da dəqiqləşdirməyə çalışdıq. Ona ilk sualımız o oldu ki, siz vaxtilə banka qoyduğunuz əmanətlə bağlı hansısa problemlə üz-üzə qalmısınız, bu haqda nə deyə bilərsiniz? Asif Lətifov cavabında bildirdi ki, “ölkə rəhbəri cənab İlham Əliyevin 2012-ci ildə imzaladığı sərəncama əsasən, hər bir Azərbaycan vətəndaşı 1991-ci ilin dekabr ayına kimi SSRİ banklarına qoyduqları əmanət pullarını, milli valyuta dəyərində 2013-cü ilin dekabr ayına kimi əldə edə bilərlər. Mən isə, 2012-ci ildən 2017-ci ilin 28 fevral ayına kimi günəgün həbsdə olmuşam. 2012-ci ilin avqust ayından 2013-cü ilin axırına kimi təqsirləndirilən şəxs qismində istintaq təcridxanasında olmuşam və belə bir səbəb üzündən də valideyinlərimlə görüşə bilməmişəm. Həbsdən çıxdıqdan sonra 11610 manat pulumu almaq üçün, “Kapital Bank”ın Abşeron filialının müdirii Tofiq müəllimin qəbulunda oldum. O, məni qəbul edib dinlədikdən sonra, adı çəkilən bankın mərkəzi filialında idarə heyyətinin sədri Rövşən Allahverdiyevin qəbuluna getməyimi məsləhət gördü. Mərkəzi filialda olduğum vaxt məni Rövşən Allahverdiyev deyil, adı çəkilən qurumda şöbə müdiri vəzifəsini daşıyan Seymur Rzayev qəbul etdi və o, Rövşən Allahverdiyevin adına ərizə yazdırdı ki, əmanət kitabçamda olan pullarımı qaytara bilsinlər. Ərizə yazmağıma baxmayaraq, bu gün də həmin puldan heç bir xəbər yoxdur. O halda mətbuat vasitəsilə maliyyə naziri cənab Samir Şərifova sual ünvanlayıram. Cənab Nazir! Deyə bilərsinizmi ki, üzürlü səbəbdən bu günə kimi ala bilmədiyim 11610 manat pulumun “arxasına kim keçib” ki, mən halal pulumu ala bilmirəm?” Belə bir problemlə üz-üzə qaldığımdan, artıq məhkəməyə müraciət etmək məcburiyyətindəyəm. Mənim sifarişlə həbs olunmağım qalsın bir yana, indi də halal pulumu mənimsəyirlər. Onu da vurğulayım ki, mən 17 il Xüsusi Dövlət Mühafizə Xidmətində işləmişəm və hər zaman Vətənim üçün, xalqım üçün çalışmışam. Bu gün isə mənim pulumu mənimsəyirlər. Bu haqsızlıq deyil, bəs nədir?”
Baş verən belə bir olaylar daha çox diqqəti cəlb etdiyindən, bu yöndə müəyyən araşdırmalar aparıb çoxsaylı oxucularımızı yaxın günlərdə daha ətraflı məlumatlandırmağa çalışacağıq. Odur ki, bizi izləməyi unutmayın.